សម្ដេចតេជោ ផ្ដល់អំណោយរថយន្តដឹកវ៉ាក់សាំង ៣០ គ្រឿង ដល់ ១០ មន្ទីរសុខាភិបាលរាជធានីខេត្ត

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្ដល់អំណោយរថយន្តដឹកវ៉ាក់សាំង ៣០ គ្រឿង ដល់ ១០ មន្ទីរសុខាភិបាលរាជធានីខេត្ត និងឃ្លាំងឱសថកណ្តាលនៃក្រសួងសុខាភិបាល តាមរយៈក្រសួងសុខាភិបាល ថ្ងៃទី១០ ខែមីនា ឆ្នាំ២០២២ នេះ។

លោកស្រីវេជ្ជបណ្ដិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស បានអញ្ជើញជាអធិបតីក្នុងកម្មវិធីប្រគល់-ទទួលរថយន្តដឹកវ៉ាក់សាំងចំនួន ៣០គ្រឿង ដែលជាអំណោយរបស់សប្បុរសជន តាមរយៈសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់មន្ទីរសុខាភិបាលរាជធានី-ខេត្ត ដែលកម្មវិធីនេះប្រព្រឹត្តទៅនៅក្នុងបរិវេនឃ្លាំងឱសថកណ្តាល (CMS)។

រាជធានី-ខេត្ត ដែលទទួលបានរថយន្តដឹកវ៉ាក់សាំងនាឱកាសនោះរួមមាន៖
១.មន្ទីរសុខាភិបាលរាជធានីភ្នំពេញ
២.មន្ទីរសុខាភិបាលខេត្តបន្ទាយមានជ័យ
៣.មន្ទីរសុខាភិបាលខេត្តបាត់ដំបង
៤.មន្ទីរសុខាភិបាលខេត្តកំពង់ចាម
៥.មន្ទីរសុខាភិបាលខេត្តកំពង់ស្ពឺ
៦.មន្ទីរសុខាភិបាលខេត្តកំពង់ធំ
៧.មន្ទីរសុខាភិបាលខេត្តកំពត
៨.មន្ទីរសុខាភិបាលខេត្តកណ្តាល
៩. មន្ទីរសុខាភិបាលខេត្តព្រៃវែង
១០.មន្ទីរសុខាភិបាលខេត្តសៀមរាម
១១.មន្ទីរសុខាភិបាលខេត្តតាកែវ
១២.មន្ទីរសុខាភិបាលខេត្តត្បូងឃ្មុំ
១៣.និងឃ្លាំងឱសថកណ្តាលនៃក្រសួងសុខាភិបាល។

ជាមួយគ្នានេះ គួរបញ្ជាក់ថា យោងតាមការណែនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នៅថ្ងៃទី១២ ខែមីនា ឆ្នាំ២០២២ ខាងមុននេះ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាប្រធានគណៈកម្មការចំពោះកិច្ចចាក់វ៉ាក់សាំងកូរីដ-១៩ ក្នុង ក្របខណ្ឌទូទាំងប្រទេស (គ.វ.ក-១៩) និងជាតំណាងដ៏ខ្ពង់ខ្ពស់របស់ សម្ដេចតជោនាយករដ្ឋមន្ត្រី នឹងនាំយក ជំនួយរថយន្តដឹកវ៉ាក់សាំងចំនួន ១០គ្រឿង របស់រាជរដ្ឋាភិបាល និងប្រជាជនកម្ពុជា ទៅប្រគល់ជូនរដ្ឋាភិបាល និងប្រជាជននៃសាធារណរដ្ឋប្រជាធិបតេយ្យប្រជាមានិតឡាវ នៅច្រកព្រំដែនអន្តរជាតិត្រពាំងក្រៀល ស្ថិតនៅក្នុង ខេត្តស្ទឹងត្រែងជាប់ព្រំដែនខេត្តចម្ប៉ាស័កនៃប្រទេសឡាវ៕

អត្ថបទ៖ ច័ន្ទ វីរៈ