កម្ពុជា កំពុងចរចានាំចេញស្វាយស្រស់ទៅកូរ៉េ ខណៈកសិផលចំនួន ៥៤មុខបាននាំចេញ​រួចហើយ

កសិផលកម្ពុជា ចំនួន ៥៤មុខ បាននាំចេញទៅទីផ្សារប្រទេសកូរ៉េខាងត្បូង ខណៈដែលភាគីទាំងពីរកំពុងចរចាបន្ថែមលើផ្លែស្វាយស្រស់ របស់កម្ពុជា ដើម្បីនាំចេញទៅកូរ៉េ។ បើតាមការបញ្ជាក់របស់លោក ងិន ឆាយ អគ្គនាយកនៃអគ្គនាយកដ្ឋានកសិកម្ម នៅក្នុងសន្និសីទសារព័ត៌មាន ស្ដីពី «លក្ខខណ្ឌគុណភាពឆ្លើយតប និងការនាំចេញកសិផល ទាក់ទងនឹងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងចិន» នៅថ្ងៃទី ១៨ ខែ មីនា។​

លោកថា « សាធារណៈរដ្ឋកូរ៉េនេះ យើងទើបចរចាបានមួយ ដែលថាទំនិញជាប់កម្រិតកំណត់ ទើបបានទេ ស្វាយស្រស់មួយគត់ នៅច្រើនទៀត ទំនិញជាប់កម្រិតកំណត់ ដែលយើងមិនទាន់ចរចាបាន»។

មន្រ្តីជាន់ខ្ពស់ក្រសួងកសិកម្មរូបនេះ សង្កត់ធ្ងន់ថា ទំនិញជាប់កម្រិតកំណត់នេះលំបាកក្នុងការចរចាជាមួយកូរ៉េខាងត្បូង ព្រោះលក្ខខណ្ឌរបស់គេមានការតឹងតែង។ លោកបន្ថែមថា ការនាំចេញផលិតផលកសិកម្មកម្ពុជា មានការកើនឡើងពីមួយឆ្នាំ​ទៅមួយឆ្នាំ បើទោះជារងផលប៉ះពាល់ដោយសារកូវីដក៏ដោយ ដែលនេះបង្ហាញពីភាពជោគជ័យរបស់កម្ពុជា គួរជាទីមោទនៈ។

ជាមួយគ្នានេះ លោកថា ផលិតកម្មនៅក្នុងប្រទេសក៏មានការកើនឡើងផងដែរ។ ដោយលោក ងិន ឆាយ ចាត់ទុកថា វិស័យកសិកម្មគឺជាវិស័យមួយដ៏សំខាន់ ជួយទ្រទ្រង់សេដ្ឋកិច្ចជាតិ នៅក្នុងវិបត្តិកូវីដ-១៩នេះ៕

អត្ថបទ៖ ទួន សុផល