សម្ដេច ស ខេង ណែនាំពលរដ្ឋខ្មែរមិនត្រូវជួលដីនៅព្រំដែន ឲ្យទៅប្រជាជននៃប្រទេសជិតខាងធ្វើស្រែចម្ការ នោះឡើយ

សម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានណែនាំដល់ប្រជាពលរដ្ឋខ្មែរនៅតាមព្រំដែន មិនត្រូវជួលដីទៅឲ្យប្រជាជននៃប្រទេសជិតខាង ជាពិសេសប្រជាជនវៀតណាមធ្វើស្រែចម្ការនោះឡើយ ពីព្រោះករណីនេះ អាចពិបាកដោះស្រាយនៅពេលក្រោយ ហើយប្រជាពលរដ្ឋក៏មិនមានសិទ្ធិធ្វើបែបនេះ នោះដែរ។

នៅក្នុងពិធីបិទសន្និបាត បូកសរុបលទ្ធផលការងារឆ្នាំ ២០២១ និងលើកទិសដៅការងារសម្រាប់ឆ្នាំ ២០២២ របស់រដ្ឋបាលខេត្តព្រៃវែង នាព្រឹកថ្ងៃទី ២២ ខែមីនានេះ សម្ដេចក្រឡាហោម ស ខេង បានលើកឡើងអំពីករណីប្រជាពលរដ្ឋខ្មែរជួលដី នៅតាមព្រំដែនទៅឲ្យប្រជាជន នៃប្រទេសជិតខាង ជាពិសេសប្រជាជន នៃប្រទេសវៀតណាមធ្វើស្រែចម្ការ ដែលនេះជាបញ្ហាមួយមិនងាយដោះស្រាយ នោះទេ។

សម្ដេចក្រឡាហោម បានថ្លែងថា «គឺថាប្រជាពលរដ្ឋ គាត់ជួលដីនៅតាមព្រំដែនហ្នឹង គាត់អត់ធ្វើទេ គាត់ជួលយកលុយ វាស្រួល ប៉ុន្តែវាក៏មិនស្រួលដែរ នៅពេលដែលយូរៗទៅ គាត់ថា គាត់មកនៅលើដីហ្នឹងយូរហើយ ដូច្នេះដោះមិនងាយចេញទេ នេះហើយជាបញ្ហា»។

ជាមួយគ្នានេះ សម្ដេចរដ្ឋមន្ត្រីក្រសួងមហាផ្ទៃ បានលើកឡើងថា ប្រជាពលរដ្ឋខ្មែរមិនត្រូវជួលដី ទៅឲ្យប្រជាជននៃប្រទេសដទៃ ដើម្បីធ្វើស្រែចម្ការនោះឡើយ ពីព្រោះច្បាប់មិនបានអនុញ្ញាត។ សម្ដេច​ក្រឡា​ហោម ស ខេង បានបញ្ជាក់ ថា«ចឹងហើយ មិនត្រូវទេ អត់មានសិទ្ធិទេៗ ខ្ញុំគិតថា យីអាសិទ្ធិជួលហ្នឹង ខ្ញុំមិនដឹងទេ មិនដឹងថា នរណាសម្រេចទេ សុំឲ្យសិក្សាមែនទែន សិទ្ធិជួលអញ្ចឹងៗ អើ អត់ឲ្យជួលទេ អាហ្នឹងអត់បានទេ តែជួលអញ្ចឹងទៅ យូរៗទៅ គឺថាហេ អាហ្នឹងដីគាត់តើ គាត់មកធ្វើយូរហើយ នេះជាបញ្ហា»។

នៅក្នុងពិធីដដែលនេះ​ សម្ដេចក្រឡាហោម ស ខេង ក៏បានលើកឡើងដែរថា នៅខេត្តព្រៃវែង មានព្រំដែនពីរកំណាត់ជាមួយប្រទេសវៀតណាម ដោយមួយកំណាត់វែង និងមួយកំណាត់ទៀតខ្លី។ ពាក់ព័ន្ធនឹងបញ្ហាព្រំដែននេះ សម្ដេច ស ខេង បានលើកឡើងអំពីការការពារបូរណភាពទឹកដី ដែលមានយន្តការចំនួនពីរ នោះគឺកងយោធពលខេមរភូមិន្ទ និងកងកម្លាំងនគរ​បាល ដែលរួមគ្នាដើម្បីការពារបូរណ​ភាពទឹកដី។

សម្ដេចរដ្ឋមន្ត្រីក្រសួងមហាផ្ទៃ បានបន្ថែមទៀតថា «ការការពារបូរណភាពទឹកដីៗ កន្លងទៅនេះ យើងមានយន្តការពីរ កងយោធពលខេមរភូមិន្ទ ហើយកងកម្លាំងនគរ​បាល ដែលរួមគ្នាដើម្បីការពារទឹកដី និយាយមែនទែនទៅ ការពារទឹកដី ហៅថា បូរណភាពទឹកដី កំណាត់ខ្លះកងទ័ព កំណាត់ខ្លះនគរបាល យើងបន្តធ្វើបញ្ហានេះឲ្យបាន»។

ចំពោះកងកម្លាំងនគរបាល សម្ដេច ស ខេង បានណែនាំបន្ថែម ដែលចាំបាច់ត្រូវតែយកចិត្តទុកដាក់ ទៅ​លើតួនាទីរបស់ខ្លួន នោះគឺការគ្រប់គ្រងសន្តិសុខនៅតាមព្រំដែន រួមមាន៖ ការលួចឆ្លងកាត់ព្រំដែនខុសច្បាប់, និងការរត់ពន្ធទំនិញខុសច្បាប់ ជាដើម៕

អត្ថបទ៖ ឃួន សុភ័ក្រ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត