លោក​ ជិន ម៉ាលីន ៖ ការមិនអនុញ្ញាតឲ្យលោក កឹម សុខា ចេញទៅប្រជុំនៅក្រៅប្រទេស ជាឆន្ទានុសិទ្ធិរបស់តុលាការ

កាលពីថ្ងៃម្សិលមិញ ចៅក្រមសាលាដំបូងរាជធានីភ្នំពេញ បានបដិសេធសំណើរបស់លោក កឹម សុខា អតីតប្រធាន នៃអតីតគណបក្សសង្រ្គោះជាតិ ដែលស្នើសុំទៅចូលរួមដោយផ្ទាល់ ក្នុងកិច្ចប្រជុំមួយនៅប្រទេសអាល្លឺម៉ង់។ ប៉ុន្តែតុលាការ បានអនុញ្ញាតឲ្យលោក កឹម សុខា អាចចូលរួមប្រជុំតាមប្រព័ន្ធអនឡាញ។ បន្ទាប់​ពីមានការបដិសេធយ៉ាងដូច្នេះ មេធាវីម្នាក់របស់លោក កឹម សុខា បានបង្ហាញការសោកស្ដាយ។

ពាក់ព័ន្ធនឹងបញ្ហានេះ លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ មានប្រសា​សន៍ប្រាប់កម្ពុជាថ្មី នៅថ្ងៃទី ២៤ ខែមីនានេះថា ការដែលមិនអនុញ្ញាតឲ្យលោក កឹម សុខា អតីតប្រធាន នៃអតីតគណបក្សប្រឆាំង ទៅចូលរួមកិច្ចប្រជុំដោយផ្ទាល់នៅក្រៅប្រទេស គឺជាការអនុវត្តនីតិវិធីរបស់តុលាការ ហើយការសម្រេចបែបណានោះ ក៏ជាឆន្ទានុសិទ្ធិរបស់តុលាការដែរ។ ម្យ៉ាងវិញទៀតលោក កឹម សុខា នៅជាប់លក្ខខណ្ឌមួយចំនួនរបស់តុលាការ ដែលរួមមាន៖ ទីមួយ.ហាមប្រាមមិនឲ្យធ្វើនយោ​បាយ, ទីពីរ. ហាមប្រាមមិនឲ្យធ្វើដំណើរទៅក្រៅប្រទេស។

លោករដ្ឋមន្ត្រីក្រសួងយុត្តិធម៌ បានលើកឡើងយ៉ាងដូច្នេះថា «អាហ្នឹងជាការអនុវត្តនីតិវិធីរបស់តុលាការ ហើយការសម្រេចយ៉ាងណា វាជាឆន្ទានុសិទ្ធិរបស់តុលាការ ដោយសារគាត់នៅជាប់លក្ខខណ្ឌរបស់តុលាការទីមួយ​ គឺហាមប្រាមធ្វើនយោបាយ ទីពីរ គឺហាមប្រាមមិនឲ្យធ្វើដំណើរ ចេញទៅក្រៅប្រទេស ហើយបើគាត់ចង់ចេញគឺត្រូវសុំទៅតុលាការ ហើយបើតុលាការមើលទៅថា វាមានហានិភ័យក្នុងការចេញទៅប៉ះពាល់ ដល់ដំណើរការនីតិវិធីសំណុំរឿង ដែលកំពុងតែស្ថិតនៅក្នុងនីតិវិធីរបស់តុលាការ អាហ្នឹងក៏គេមិនឲ្យចេញដែរ អញ្ចឹងគេអនុញ្ញាតឲ្យតាម Zoom បើសិនជាគាត់ចង់ចូលរួមប្រជុំដូចមិនមានបញ្ហាអីទេតាម Zoom ទៅ ចាំបាច់អីចេញទៅផ្ទាល់»។

ជាមួយគ្នានេះលោក​ ជិន ម៉ាលីន ក៏បានលើកឡើងដែរថា ប្រសិនបើគោលបំណងពិតប្រាកដរបស់លោក កឹម សុខា គ្រាន់តែចង់ចូលរួមក្នុងកិច្ចប្រជុំនោះ ដូចជាមិនគួរទោ​មនស្ស​ជាមួយនឹងការសម្រេចរបស់តុលាការទេ ពីព្រោះតុលាការបានអនុញ្ញាតឲ្យចូលរួមប្រជុំ តាមអនឡាញហើយនោះ។ ម្យ៉ាងក្នុងបរិទនៃការរាតត្បាតជំងឺកូវីដ-១៩ ក៏កិច្ចប្រជុំជាច្រើនត្រូវបានធ្វើឡើងតាមប្រព័ន្ធអនឡាញ ហើយទទួលបានលទ្ធផល ដូចគ្នាដែរ។ បន្ថែមពីនេះលោក ជិន ម៉ាលីន ចោទជាសំណួរថា តើលោក កឹម សុខា មានបំណងអ្វីផ្សេង?៕

អត្ថបទ៖​ ឃួន សុភ័ក្រ