លោក ជិន ម៉ាលីន លើកទឹកចិត្តកីឡាករទូកងស្រុកមោងឬស្សីប្រឹងយកជ័យជម្នះថ្នាក់ខេត្តឱ្យបាន ដើម្បីបានទៅប្រកួតថ្នាក់ជាតិ

លោក ជិន ម៉ាលីន បានលើកទឹកចិត្តឱ្យកីឡាករប្រណាំងទូកងនៃស្រុកមោងឬស្សីទាំងអស់ខិតខំប្រឹងប្រែងយកជ័យជំនះក្នុងវគ្គផ្តាច់ព្រាត់ឱ្យបាន ហើយអាចចូលទៅប្រកួតនៅក្នុងពីធីបុណ្យអុំទូកថ្នាក់ជាតិនៅទីក្រុងភ្នំពេញ ដែលនឹងប្រព្រឹត្តទៅនៅថ្ងៃទី១៤ ១៥ និង១៦ ខែវិច្ឆិកា ឆ្នាំ២០២៤ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជិន ម៉ាលីន រដ្ឋលេខាធិការប្រចាំការនៃក្រសួងយុត្តិធម៌ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកមោងឬស្សីនៃខេត្តបាត់ដំបង តំណាងដ៏ខ្ពង់ខ្ពស់ លោក អង្គ វង្ស វឌ្ឍានា ប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកមោងឬស្សី បានដឹកនាំក្រុមការងាររាជរដ្ឋាភិបាល និងក្រុមការងារគណបក្សប្រជាជនកម្ពុជាចុះជួយស្រុកមោងឬស្សី លើកទឹកចិត្តបែបនេះ  ក្នុងពេលជួបសំណេះសំណាលជាមួយកីឡាករប្រណាំងទូកងសរុបចំនួន៦០នាក់មកពីទូកងចំនួន២មកពីស្រុកមោងឬស្សី នៃខេត្តបាត់ដំបង។

ក្នុងឱកាសនោះ លោក ជិន ម៉ាលីន បាននាំយកថវិកាសរុបចំនួន១៥លានរៀល មី៥០កេះ ត្រីខ២៥០កំប៉ុង ទឹកសុទ្ធ៦០យួ ទឹកភេសជ្ជៈប៉ូវកំលាំង៦០យួ ទឹកត្រី១២យួ ទឹកស៊ីអ៊ីវ៥យួ ព្រមទាំងគ្រឿងសម្ភារៈចាំបាច់មួយចំនួនទៀត ជូនដល់ក្រុមកីឡាករ និងកីឡាការិនី ដែលត្រៀមចូលរួមប្រកួត។

ក្នុងឱកាសនៃការប្រារព្ធពិធីបុណ្យអុំទូកនៅខេត្តបាត់ដំបង ដែលនឹងប្រព្រឹត្តទៅនៅថ្ងៃទី១៦និង១៧ ខែតុលា ឆ្នាំ២០២៤នេះ ស្រុកមោងឬស្សី បានទូកងចំនួន២ចូលរួមប្រកួត គឺទូកងកន្លង់រ័ត្នរំពាត់មាស និង ទូកងកន្លង់ថោងសំរោងពេជ្រ។  

លោក ជិន ម៉ាលីន បានកោតសរសើរចំពោះអាជ្ញាធរមូលដ្ឋាននៃស្រុកមោងឬស្សី យុវជនយុវនារីស្ម័គ្រចិត្តនិងជាពិសេសកីឡាករទូកងស្រុកមោងឬស្សី ដែលបានខិតខំប្រឹងប្រែងឱ្យមានកីឡាករទូកងនៃស្រុកមោងឬស្សីចំនួន៦០នាក់ដែលមានទូកងចំនួន២គ្រឿងចូលរួមក្នុងការប្រណាំងទូកងដើម្បីអបអរសាទរពីធីបុណ្យអុំទូកនៅខេត្តបាត់ដំបង៕