លោក ចាន់ យុត្ថា៖​ ខេត្ត​កំពង់ស្ពឺ​ និង​តំបន់​មាត់សមុទ្រ​មាន​ភ្លៀងធ្លាក់​ច្រើន​នាប៉ុន្មាន​ថ្ងៃកន្លង​មកនេះ​

លោក ចាន់ យុត្ថា រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម នៅថ្ងៃទី ៣០ ខែមីនានេះ បានឱ្យដឹងថា នារយៈពេលឥទ្ធិពលសម្ពាធទាបនៅសមុទ្រចិនខាងត្បូងនៅតែកើតមាន ធ្វើឱ្យមានភ្លៀងធ្លាក់រ៉ាយបាយក្នុងក្របខ័ណទូរទាំងប្រទេស ហើយនឹងបន្តធ្លាក់រហូតដល់ថ្ងៃទី ២ ដើមខែមេសានេះ។

លោក ចាន់ យុត្ថាថ្លែងថា៖ “សម្ពាធទាបសកម្មមួយដែល នៅក្នុងសមុទ្រចិនខាងត្បូង នឹងធ្វើដំណើរ​មកកៀក ឆ្នេរប្រទេសវៀតណាមភាគកណ្ដាល ចឹងទេភ្លៀងនឹងនៅតែបន្តធ្លាក់រ៉ាយប៉ាយ។ កន្លងមកឃើញមានភ្លៀងធ្លាក់រហូតដល់ ៨០ មីលីម៉ែត្រក៏មាន ជាពិសេសដូចនៅខេត្តកំពង់ស្ពឺ និង​តំបន់មាត់សមុទ្រ និងតំបន់ខ្ពង់រាបក៏មានភ្លៀងធ្លាក់ដូចគ្នា។ បើនិយាយពី​ក្របខណ្ឌខេត្ត​គឺគ្រប់​ខេត្ត​ទាំងអស់ ដែលមានភ្លៀងធ្លាក់ ហើយបន្តធ្លាក់បន្ថែមទៀត”។

ក្រសួងធនធានទឹក និងឧតុនិយមបានប្រកាសថា កម្ពុជានឹងមាន​ភ្លៀងធ្លាក់ពីតិចទៅច្រើនចាប់ពីថ្ងៃទី ៣០ ខែមីនា ដល់ថ្ងៃទី ០៥ ខែមេសា ដោយសារឥទ្ធិពលសម្ពាធទាបសកម្ម​នៅសមុទ្រចិនខាងត្បូង​ភាគខាងត្បូងប្រទេសវៀតណាម។ បាតុភូតនេះក៏នឹងធ្វើឱ្យមានភ្លៀងធ្លាក់ លាយឡំផ្គរ រន្ទះ និង​ខ្យល់​កន្ត្រាក់កើតឡើងនៅតាមតំបន់ទំនាបកណ្ដាល តំបន់ជួរភ្នំ និងមាត់សមុទ្រ៕