និស្សិតពេទ្យ ៤៤ នាក់ ត្រូវលុបឈ្មោះចេញពីការប្រឡងថ្នាក់ជាតិ ដោយសារក្លែងបន្លំសញ្ញាបត្រ

គណៈកម្មាធិការប្រឡងថ្នាក់ជាតិសម្រាប់ការបណ្តុះបណ្តាល ក្នុងវិស័យសុខាភិបាល បានសម្រេចលុបឈ្មោះនិស្សិតពេទ្យ ៤៤ នាក់ ចេញពីការប្រឡង ក្រោយ​រកឃើញថា ​និស្សិត​ទាំងនេះ​បាន​ក្លែងបន្លំ​ឯកសារ​សញ្ញាបត្រ​មធ្យមសិក្សា​ទុតិយភូមិ​។

​លោក បណ្ឌិត សភាចា​រ្យ ហ៊ីង ថូ​រ៉ាស៊ី ប្រធាន​គណៈកម្មាធិការ​ប្រឡង​ថ្នាក់ជាតិ​សម្រាប់​ការបណ្តុះបណ្តាល​ក្នុង​វិស័យ​សុខាភិបាល​បានឱ្យដឹង​នៅក្នុង​លិខិត​លុបឈ្មោះ​ដែល​ទើប​ទទួលបាន​ថ្ងៃនេះ​ថា ​និស្សិត​ដែល​ត្រូវ​លុបឈ្មោះ​ចេញពី​បញ្ជី​ឈ្មោះ​និស្សិត​ប្រឡង​ថ្នាក់ជាតិ​ក្នុងនោះ​មាន​និស្សិត​ដែល​ត្រូវ ជ្រើសរើស​ចូលរៀន​ថ្នាក់​ឆ្នាំ​សិក្សា​មូលដ្ឋាន​សម្រាប់​កម្រិត​ប​រិ​ញ្ញាប​ត្រ​ និង​ថ្នាក់​ឆ្នាំ​ទី​១ សម្រាប់​កម្រិត​បរិញ្ញាបត្រ​រង​ជាប់​ចូលរៀន​ផ្នែក​បរិញ្ញាបត្ររង​គិលានុបដ្ឋាក បរិញ្ញាបត្ររង​បច្ចេកទេស​មន្ទីរពិសោធន៍​និង​បរិញ្ញាបត្ររង​ទន្ត​គិលានុបដ្ឋាក​ នៅតាម​គ្រឹះស្ថាន​បណ្តុះបណ្តាល​វិស័យ​សុខាភិបាល​ចាប់ពី​ឆ្នាំ​ ២០១៩​ ដល់​ឆ្នាំ ២០២០ ​ដោយសារ​មូលហេតុ​ក្លែងបន្លំ​ឯកសារ​សញ្ញាបត្រ​មធ្យមសិក្សា​ទុតិយភូមិ​។

​លោក​បាន​បន្តថា ​ក្នុងចំណោម​និស្សិត​ចំនួន​ ៤៤​ នាក់​ ដែល​ត្រូវ​លុបឈ្មោះ​ចេញពី​ការប្រឡង​ថ្នាក់ជាតិ​នោះ​រួមមាន ​ក្នុងនោះ​មាន​និស្សិត​ផ្នែក​វេជ្ជបណ្ឌិត​ចំនួន​ ១ ​នាក់ និស្សិត​ផ្នែក​គិលានុប្បដ្ឋាក​ចំនួន​ ២៨ ​នាក់ និស្សិត​ផ្នែក​បរិញ្ញាបត្ររង​បច្ចេកទេស​មន្ទីរពិសោធន៍​ចំនួន​ ៧ ​នាក់ និស្សិត​ផ្នែក​បរិញ្ញាបត្ររង​ទន្ត​គិលានុបដ្ឋាក​ចំនួន​ ៤​ នាក់ ​និង​និស្សិត​ផ្នែក​បរិញ្ញាបត្រ​ង​ង​ឆ្មប​ចំនួន​ ៤ ​នាក់​៕

អត្ថបទ៖ សំអឿន​

​