តើមានពលរដ្ឋខ្មែរណាខ្លះ នៅតែគាំទ្រកីឡាករជាតិឯង ទោះស្ថិតក្នុងស្ថានភាពបែបនេះ?

មានមតិជាច្រើនបានធ្វើការរិះគន់ទៅកាន់ក្រុមជម្រើសជាតិបាល់ទាត់ក្នុងសាលកម្ពុជា ក្រោយពីបានចាញ់ក្រុមជម្រើសជាតិបាល់ទាត់ក្នុងសាលថៃ រហូតដល់ទៅ ១៦ – ០ ក្នុងពានរង្វាន់ AFF Futsal Championship 2022 នៅប្រទេសថៃ កាលពីថ្ងៃទី៣ ខែមេសា ឆ្នាំ២០២២ម្សិលមិញ។

លោក កឹម ចំរើន ជាមន្ត្រីនៅស្ថានទូតព្រះរាជាណាចក្រកម្ពុជា ប្រចាំព្រះរាជាណាចក្រថៃ ដែលបានទៅគាំទ្រ និងទស្សនាការប្រកួតនោះដែរ បានបង្ហោះលើបណ្ដាញសង្គមផ្ទាល់ខ្លួននៅរសៀលថ្ងៃនេះ ថ្ងៃទី៤ ខែមេសា ឆ្នាំ២០២២ ថា ប្រជាពលរដ្ឋកម្ពុជាគួរបញ្ឈប់វប្បធម៌មើលងាយជាតិសាសន៍ឯង។

លោក កឹម ចម្រើន លើកឡើងថា៖ “ពេលចាញ់រិះគន់ មើលងាយ តែសូម្បីតែទឹកចិត្តទៅគាំទ្រគ្មានផង គួរបញ្ឈប់វប្បធម៌មើលងាយជាតិសាសន៍គ្នាឯងទៅ។ កីឡាមានចាញ់ឈ្នះ ថៃក្រុមគេលំដាប់ពិភពលោក ចំណាត់ថ្នាក់លេខ ២០ យើងលេខ ១០៩។ នៅបន្តគាំទ្រជានិច្ច”។

លោក ហ៊ ងែត ពិធីករកីឡា ជើងចាស់ បានលើកឡើងនៅរសៀលថ្ងៃទីទី៤ ខែមេសា ឆ្នាំ២០២២ បានលើកឡើងថា បើយើងត្រឡប់មកនិយាយពីកីឡាករជម្រើសជាតិក្នុងសាលកម្ពុជាវិញ មិនទាន់មានឈ្មោះជាកីឡាករកម្រិតអាជីព នៅឡើយនោះទេ បើនិយាយឱ្យត្រឹមត្រូវគឺ កីឡាករពាក់កណ្ដាលអាជីព។ ក្រោមហេតុផលគឺ ពួកគាត់មួយចំនួនលេងក្លឹបមួយចំនួនក្នុងស្រុក ជូនកាលចំណាយលុយផ្ទាល់ខ្លួនផង នឹងមានភាគតិចណាស់ដែលលេងបានលុយត្រឡប់ទៅវិញ។

លោក ហ៊ ងែត លើកឡើងបន្តថា៖ “ព្រោះថារាល់ថ្ងៃនេះយើងមិនទាន់មានពាន Futsal លក្ខខណៈដែលហៅថាអាជីពនៅឡើយនោះទេ ឆ្នាំខ្លះក៏មានសកម្មភាព នឹងឆ្នាំខ្លះក៏អត់មានសកម្មភាព។ គឺខុសឆ្ងាយពីប្រទេស ម៉ាឡេស៊ី ឥណ្ឌូនេស៊ី វៀតណាម និង ថៃ ដែលពួកគេមានពានក្នុងស្រុកលក្ខណៈអាជីពជាយូរឆ្នាំទៅហើយ ជាពិសេសគឺក្រុមក្នុងសាលថៃ តែម្ដង ព្រោះថៃជាក្រុមមួយដែលតែងតែមានវត្តមានគ្រប់ពានរង្វាន់ មិនថាពានកម្រិតតំបន់អាស៊ី និងពិភពលោកទេ គឺកម្របាត់មុខគេណាស់”។

លោក ហ៊ ងែត លើកឡើងថា សរុបមកក្នុងស្ថានភាពមួយនេះ ពួកយើងគឺគួរតែលើកទឹកចិត្តទៅកាន់ពួកគាត់វិញ ជាជាងការរិះគន់មិនល្អមួយចំនួនទៅកាន់ពួកគាត់ ។ គ្រាន់តែដឹងថា ពួកគាត់បានលះបង់ច្រើនណាស់ ដើម្បីទៅលេងតំណាងឱ្យជាតិនេះ។

គួរបញ្ជាក់ថា ក្រៅពីប្រភពទាំងពីរខាងលើ ក៏មានប្រជាពលរដ្ឋ និងអ្នកស្នេហាវិស័យកីឡាជាច្រើនរូបទៀត បានសម្ដែងការគាំទ្រកាលលើកឡើងរបស់លោកទាំងពីរផងដែរ៕

អត្ថបទ៖ ច័ន្ទ វីរៈ