ក្រសួងហាមម្ចាស់រថយន្ត និងម្ចាស់យានដ្ឋាន​កែច្នៃដំឡើងម៉ូដែលរថយន្តដោយគ្មានការអនុញ្ញាត

ក្រសួងសាធារណការ និងដឹកជញ្ជួន បានហាមប្រាមដល់ម្ចាស់រថយន្តគ្រួសារ និងម្ចាស់យានដ្ឋានកែច្នៃដំឡើងម៉ូដែលរថយន្ត ដោយគ្មានការអនុញ្ញាត។

ក្នុងករណីម្ចាស់រថយន្តមិនអនុវត្តតាមក្រសួង នឹងមិនអនុញ្ញាតិឱ្យចូលត្រួតពិនិត្យលក្ខណៈបច្ចេកទេស ឬចុះបញ្ជីផ្តល់បណ្ណសម្គាល់និងបំពាក់ស្លាកលេខសម្គាល់យានយន្តឡើយ។ចំណែកម្ចាស់យានដ្ឋានដែលកែឆ្នៃត្រូវប្រឈមនឹងការបិទសកម្មភាពធ្វើអាជីវកម្មតែម្តង។

នៅក្នុងសេចក្តីជួនដំណឹងរបស់ក្រសួងសាធារណការនិងដឹកជញ្ជួនដែលទើបទទួលបាននៅថ្ងៃនេះ បានឱ្យដឹងថា កន្លងមក ក្រសួងសាធារណការ និងដឹកជញ្ជូន បានសង្កេតឃើញថា មានរថយន្តគ្រួសារមួយចំនួន បានកែច្នៃដំឡើងម៉ូដែលរថយន្តដោយមិនត្រឹមត្រូវតាមលក្ខណៈបច្ចេកទេស និងគ្មានការអនុញ្ញាតពីក្រសួង ដែលបានបណ្តាលឱ្យប៉ះពាល់ដល់ផ្នែកសុវត្ថិភាពរបស់យាន និងបានធ្វើឱ្យ ប្រែប្រួលអត្តសញ្ញាណសម្គាល់របស់រថយន្ត ហើយសកម្មភាពនេះបានផ្ទុយពីមាត្រា១៩ នៃអនុក្រឹត្យលេខ ១៨០ អនក្រ.បក ចុះថ្ងៃទី៣ ខែវិច្ឆិកា ឆ្នាំ២០០៨ ស្តីពីការគ្រប់គ្រងយានដ្ឋានជួសជុល និងយានដ្ឋានកែច្នៃ ដំឡើងយានយន្តហេតុដូចនេះ ដើម្បីធានានូវសន្តិសុខសណ្តាប់ធ្នាប់ សុវត្ថិភាព និងការគ្រប់គ្រងយានយន្ត ធ្វើចរាចរណ៍នៅលើផ្លូវថ្នល់។

 ក្រសួងសាធារណការ បានព្រមានថា រថយន្តដែលបានកែច្នៃដំឡើងម៉ូដែលរថយន្ត បានប៉ះពាល់ដល់ផ្នែកសុវត្ថិភាពរបស់យាន ដូចជាប្រព័ន្ធចង្កូត ប្រព័ន្ធទ្រ សាកស៊ី និងគ្រោងតួ និងគ្មានការអនុញ្ញាតពីក្រសួងសាធារណការ និងមិនអនុញ្ញាតិឱ្យចូលត្រួតពិនិត្យលក្ខណៈបច្ចេកទេស ឬចុះបញ្ជីផ្តល់បណ្ណសម្គាល់និងបំពាក់ស្លាកលេខសម្គាល់យានយន្តឡើយ។

ចំពោះយានដ្ឋានកែច្នៃដំឡើងរថយន្ត ដែលធ្វើសកម្មភាពកែច្នៃដំឡើងម៉ូដែលរថយន្ត ដែលប៉ះពាល់ដល់ផ្នែកសុវត្ថិភាពរបស់យាន និងមិនបានស្នើសុំការអនុញ្ញាតកែច្នៃដំឡើង ក្រសួងសាធារណការ និងដឹកជញ្ជូន នឹងចាត់វិធានការចុះបិទសកម្មភាពធ្វើអាជីវកម្មនៅទីតាំងយានដ្ឋាននោះ។

ក្រសួងសាធារណការសង្ឃឹមនិងជឿជាក់ថា ម្ចាស់ រថយន្តទាំងអស់ និងម្ចាស់យានដ្ឋានកែច្នៃដំឡើងរថយន្តគ្រប់ប្រភេទ, ចូលរួមអនុវត្តបទបញ្ញត្តិច្បាប់ និង លិខិតបទដ្ឋានគតិយុត្តជាធរមាន ប្រកបដោយស្មារតីទទួលខុសត្រូវខ្ពស់ទាំងអស់គ្នា៕សំអឿន