Connect with us

ព័ត៌មានជាតិ

សម្តេច ស ខេង អំពាវនាវឲ្យពលរដ្ឋបង្កើនការយកចិត្តទុកដាក់ គោរពច្បាប់ចរាចរណ៍ក្នុងឱកាសបុណ្យចូលឆ្នាំថ្មី

បានផុស

នៅ

សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអំពាវនាវឲ្យប្រជាពលរដ្ឋ បង្កើនការយកចិត្តទុកដាក់គោរពច្បាប់ចរាចរណ៍ នៅក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ខាងមុខនេះ។ សម្តេចក្រឡាហោម បានអំពាវនាវបែបនេះ នៅក្នុងឱកាសអញ្ជើញជាអធិបតី ក្នុងពិធីសម្ពោធសមិទ្ធផលនានានៅវត្តពោធិគុម្ព ស្ថិតក្នុងភូមិជ្រៃមាន់ ឃុំឬស្សីស្រុក ស្រុកពាមជរ ខេត្តព្រៃវែង កាលពីថ្ងៃទី១១ ខែមេសា ឆ្នាំ ២០២២។

បើតាមសម្តេចក្រឡាហោម ស ខេង ការបង្កើនការយកចិត្តទុកដាក់គោរពច្បាប់ចរាចរណ៍នេះ ដោយសារជាមធ្យមមានមនុស្សស្លាប់ចំនួន ៥នាក់រាល់ថ្ងៃ ហើយអាចមានកំណើនថែមទៀតផងដែរ នៅក្នុងឱកាសនៃការធ្វើចរាចរណ៍ ក្នុងពិធីបុណ្យធំៗ ដូចជាបុណ្យចូលឆ្នាំថ្មីនេះជាដើម។

សម្តេចក្រឡាហោម ស ខេង ក៏អំពាវនាវឲ្យចៀសវាង ការបង្កហិង្សាដាក់គ្នាក្នុងពេលជួបជុំ ដូចជាការរាំងលេងកំសាន្ត ទទួលទានគ្រឿងស្រវឹងជាដើម។ ទទ្ទឹមនេះដែរ សម្ដេចក្រឡាហោម ក៏បានអំពាវនាវដល់អាជ្ញាធរ សមត្ថកិច្ច និងប្រជាពលរដ្ឋឲ្យចូលរួមប្រយុទ្ធប្រឆាំងគ្រឿងញៀនខុសច្បាប់ និងបន្តចូលរួមបង្កាទប់ស្កាត់ការឆ្លងរីករាលដាលជំងឺកូវីដ-១៩បន្តទៀត ទោះបីស្ថានភាពជំងឺមានភាពធូរស្រាលខ្លះក៏ដោយ។

លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន បានសម្ដែងនូវការព្រួយបារម្ភពីគ្រោះថ្នាក់ចរាចរណ៍ នៅក្នុងឱកាសចូលឆ្នាំថ្មី ប្រពៃណីជាតិខាងមុខនេះ ដោយហេតុថាគ្រាន់តែក្នុងរយៈពេល ៧ថ្ងៃដើមខែមេសា ឆ្នាំ ២០២២កន្លងទៅនេះ មានអ្នកស្លាប់ដោយគ្រោះថ្នាក់ចរាចរណ៍រហូតដល់ ៤៧នាក់។

យ៉ាងណាក៏ដោយ លោកស្រីមិនបានបញ្ជាក់ពីមូលហេតុនាំ ឲ្យមានអត្រាស្លាប់ដោយសារគ្រោះថ្នាក់ចរាចរណ៍ ក្នុងពិធីបុណ្យចូលឆ្នាំខ្មែរកើនឡើងនោះទេ។ ប៉ុន្តែការកើនឡើងនេះ អាចបណ្តាលមកពីនៅឆ្នាំនេះរាជរដ្ឋាភិបាល បានអនុញ្ញាតឲ្យមានការប្រារព្ធ ពិធីបុណ្យចូលឆ្នាំខ្មែរឡើងវិញ ឲ្យមានភាពអធិកអធម ដោយសារអត្រាឆ្លងជំងឺកូវីដ-១៩ មានការថយចុះបន្ទាប់ពីបានខកខាន អស់រយៈពេល២ឆ្នាំជាប់ៗគ្នា៕

អត្ថបទ៖ សំអឿន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម