​ក្រសួង​​ប្រារព្ធ​​ទិវាកម្មសិទ្ធិបញ្ញា​ពិភព​លោក​លើក​កម្ពស់​ការស្រាវ​ជ្រាវ​ និង​អភិវឌ្ឍ​ស្នាដៃថ្មី​

ក្រសួងវប្បធម៌ និងវិចិត្រសិល្បៈ នៅថ្ងៃទី ២៦ ខែមេសា ឆ្នាំ ២០២២ បានរៀបចំពិធីប្រារព្ធពិធី​ទិវាកម្ម​សិទ្ធិបញ្ញា​ពិភពលោក​ អមដោយ​សិក្ខាសាលា ក្រោមប្រធានបទ​ “កម្មសិទ្ធិបញ្ញា និងយុវជន ៖ ការ​បង្កើត​ថ្មី​សម្រាប់អនាគត​កាន់តែប្រសើរ”។

លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ​ មានប្រសាសន៍ថា ទិវាកម្មសិទ្ធិបញ្ញា និងសិក្ខាសាលានេះ មានសារសំខាន់សម្រាប់យុវជន​ ក្នុងការផ្ដល់ចំណេះដឹង ដើម្បីចូលរួមចំណែក​ក្នុងការ​លើកកម្ពស់​ការបង្កើតស្នាដៃថ្មីបន្ថែមទៀត​។

លោក ប៉ាន សូរសក្ដិ រដ្ឋមន្ត្រីក្រសួង​ពាណិជ្ជកម្មមានប្រសាសន៍ថា គោលបំណងនៃការប្រារព្ធទិវា​កម្មសិទ្ធិបញ្ញាពិភពលោក មិនត្រឹមតែជាការរំឭក​ខួបនៃការចូលជាធរមាន​នៃអនុសញ្ញា​ស្ដីពី​ការបង្កើតអង្គការកម្មសិទ្ធិបញ្ញាពិភពលោក​ប៉ុណ្ណោះទេ ប៉ុន្តែជាព្រឹត្តិការណ៍មួយ​ បង្កើតឱ្យស្ថាប័នរដ្ឋ រដ្ឋាភិបាល​ វិស័យឯកជន ប្រជាពលរដ្ឋ​ គ្រប់ស្រទាប់វណ្ណៈ រួមកម្លាំងគ្នា និងបង្កើនកិច្ចសហការចូលរួមលើកកម្ពស់​ការពារកម្មសិទ្ធិ​បញ្ញា​ និងផ្សព្វផ្សាយសារៈសំខាន់​នៃកម្មសិទ្ធិបញ្ញា ដែលផ្សារភ្ជាប់ជាមួយការរស់នៅរបស់យើង​ ពិសេសការអភិវឌ្ឍសង្គម សេដ្ឋកិច្ច វប្បធម៌ និងបច្ចេកវិទ្យា។

លោក ប៉ាន សូរសក្ដិ ឱ្យដឹងថា ក្របខណ្ឌនៃការគ្រប់គ្រងកម្មសិទ្ធិបញ្ញារបស់ប្រទេសកម្ពុជា​បានចាប់ផ្ដើមឡើងវិញ​តាំងពីទស្សវត្សរ៍៩០ ក្នុងដំណាក់កាលស្ដារ​ និងអភិវឌ្ឍន៍សេដ្ឋកិច្ច​ជាតិ​ ក្រោមការដឹកនាំ​របស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា​។

ក្នុងសារលិខិត​របស់​សម្ដេច​តេជោ ហ៊ុន សែន​ នាយករដ្ឋមន្ត្រីកម្ពុជា បានបញ្ជាក់ថា ទិវាកម្មសិទ្ធិបញ្ញា​ពិភពលោក​ ត្រូវបានប្រារព្ធធ្វើឡើងជារៀងរាល់ឆ្នាំ ដោយអង្គការកម្មសិទ្ធិបញ្ញាពិភពលោក និងប្រទេសជាសមាជិក ដើម្បីលើកម្ពស់ចំណេះដឹងសាធារណៈអំពីសារៈសំខាន់របស់កម្មសិទ្ធិបញ្ញា​លើគ្រប់វិស័យ​រួម​ទាំងការកសាងកេរ្តិ៍ឈ្មោះម៉ាក ការបង្កើតគំនិតថ្មី គំនិតច្នៃប្រឌិត ដែលមានឥទ្ធិពល​ក្នុងការលើកកម្ពស់​ជីវភាពរបស់ប្រជាពលរដ្ឋ និងជំរុញការចូលរួម​ការការពារកម្មសិទ្ធិបញ្ញា។

កម្ពុជា​បានចូលជាសមាជិកអង្គការកម្មសិទ្ធិបញ្ញាពិភពលោក នៅថ្ងៃទី ២៥ ខែកក្កដា ឆ្នាំ ១៩៩៥ ខណៈបច្ចុប្បន្នមានសមាជិកសរុប ១៩៣ ប្រទេស ហើយកម្ពុជាបានចូលរួមយ៉ាងសកម្ម ដើម្បីបំពេញកតព្វកិច្ចអន្តរជាតិ ពាក់ព័ន្ធនឹងការការពារ និងលើកកម្ពស់កម្មសិទ្ធិបញ្ញា។

យ៉ាងណាក៏ដោយ លោក​ស្រី ​ភឿង សកុណាសង្ឃឹមថាទិវាកម្មសិទ្ធិបញ្ញា​ពិភពលោក នឹងក្លាយជាទិវា​កម្មសិទ្ធិបញ្ញាជាតិ​ ដែល​នឹងត្រូវប្រារព្ធជារៀងរាល់ឆ្នាំ​សម្រាប់កម្ពុជា​នាឆ្នាំងខាងមុខ​បន្តបន្ទាប់ទៀត ដើម្បីលើកកម្ពស់​ ការស្រាវជ្រាវ និងអភិវឌ្ឍ ក្នុងការបង្កើតផលិតផលបច្ចេកវិទ្យា​ និងជំរុញគំនិតច្នៃប្រឌិត​ និងការបង្កើតថ្មី​។

ទន្ទឹមនឹងនេះ ក៏អាចលើកកម្ពស់ ឧស្សាហកម្មវប្បធម៌ ឱ្យឆ្លើយតបទៅនឹងបរិបទសេដ្ឋកិច្ច​ និងសង្គមឌីជីថល​ និងបដិវត្តឧស្សាហកម្មជំនាន់ទី៤ ហើយចូលរួមចំណែក​ក្នុងការសម្រេចបាន​នូវចក្ខុវិស័យកម្ពុជា​ឆ្នាំ ២០៥០៕

អត្ថបទ៖ ឡេង ដេត