កំណត់គោលដៅតំបន់ និងពេលវេលាចាក់វ៉ាក់សាំងដូសជំរុញ ចំពោះអ្នកមិនទាន់ចាក់នៅខេត្តកោះកុង

អាជ្ញាធររដ្ឋបាលខេត្ត និងមន្រ្តីសុខាភិបាលខេត្តកោះកុង កំពុងពិភាក្សាគ្នារៀបចំទីតាំងតំបន់គោលដៅ និងពេលវេលាជាក់លាក់ ដោយចុះចាក់វ៉ាក់សាំងបង្ការការពារជំងឺកូវីដ-១៩ ដូសជំរុញដល់ប្រជាពលរដ្ឋដែលខកខានមិនទាន់ចាក់។

លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង រសៀលថ្ងៃទី២៧ ខែមេសានេះ បានឲ្យដឹងថា រដ្ឋបាលខេត្ត កំពុងតែរៀបចំយុទ្ធសាស្រ្តថ្មីលើការកំណត់ទីតាំង ក៏ដូចជាពេលវេលា ដើម្បីផ្តល់សេវាចាក់វ៉ាក់សាំង ទៅកាន់ប្រជាពលរដ្ឋឲ្យបានគ្រប់ៗគ្នា នាពេលខាងមុខ។

លោកវេជ្ជបណ្ឌិត ទៅ ម៉ឹង បានលើកឡើងទៀតថា រដ្ឋបាលខេត្តកំណត់គោលដៅតំបន់ ដែលចាក់វ៉ាក់សាំងហើយ រួមមាន៖ តំបន់សេដ្ឋកិច្ចខេត្តកោះកុង តំបន់ទេសចរណ៍តារាសាគរ ចំណតរថយន្ត ចំណតទូក និងនៅតាមសាលារៀន។ បច្ចុប្បន្ននៅតាមផ្សារ បាននិងកំពុងអនុវត្តដោយមនុស្សជិត ៥០០០នាក់ចូលរួមកចាក់វ៉ាក់សាំង ភាគច្រើនដូសទី ៣។

រាជរដ្ឋាភិបាល បានជំរុញការចាក់វ៉ាក់សាំងកូវីដ-១៩ ជូនប្រជាពលរដ្ឋនៅទូទាំងប្រទេស។ ដោយឡែកក្នុងខេត្តកោះកុង បន្តចាក់វ៉ាក់សាំងដូសជំរុញ ជូនដល់សិស្សានុសិស្ស នៅតាមបណ្តាសាលានានា នៅក្នុងទូទាំងខេត្ត។ មន្រ្តីសុខាភិបាលខេត្តកោះកុង ក៏រម្លឹកដែរថា រាល់ការមកចាក់វ៉ាក់សាំង ប្រជាពលរដ្ឋចាំបាច់យកសំបុត្រកំណើត និងកាតចាក់វ៉ាក់សាំងមកជាមួយ ដើម្បីងាយស្រួលក្នុងការបញ្ចូលទិន្នន័យ។

អំឡុងថ្ងៃបុណ្យចូលឆ្នាំខ្មែរ ៣ថ្ងៃ កន្លងទៅ មន្រ្តីសុខាភិបាលប្រចាំការនៅតាមវត្តអារាម និងរមណីយដ្ឋានទេសចរណ៍កម្សាន្ត បានទទួលចាក់វ៉ាក់សាំងបង្ការការពារជំងឺកូវីដ-១៩ ដល់ប្រជាពលរដ្ឋចំនួន៣៤៤ ដោយមន្រ្តីសុខាភិបាល នៅតែបន្តយុទ្ធនាការចាក់វ៉ាក់សាំង ជូនដល់ប្រជាពលរដ្ឋជារៀងរាល់ម៉ោងបម្រើការងារ តាមមណ្ឌលសុខភាពនីមួយៗ ឬតាមភូមិទូទាំងខេត្ត៕

អត្តបទ៖ សិរីវឌ្ឍនៈ