សម្ដេច ស ខេង ស្នើភាគីពាក់ព័ន្ធត្រូវរួមគ្នា ធ្វើឲ្យដំណើរការបោះឆ្នោតឃុំ-សង្កាត់ ប្រព្រឹត្តដោយរលូន

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានស្នើដល់ភាគីពាក់ព័ន្ធទាំងអស់ត្រូវរួមសហការគ្នា ដើម្បីធ្វើឲ្យដំណើរការបោះឆ្នោត ជ្រើសរើសក្រុមប្រឹក្សាឃុំ-សង្កាត់ នាពេលខាងមុខនេះ ប្រព្រឹត្តទៅដោយរលូន និងគ្មានការគំរាមកំហែង។

ថ្លែងនៅក្នុងកិច្ចប្រជុំផ្សព្វផ្សាយផែនការអន្តរស្ថាប័ន ស្តីពី កិច្ចការពារការពិនិត្យបញ្ជីឈ្មោះការបោះឆ្នោតប្រចាំឆ្នាំ និងការបោះឆ្នោតថ្នាក់ជាតិ ថ្នាក់ក្រោមជាតិ ចាប់ពីឆ្នាំ ២០២២-២០២៤ នាព្រឹកថ្ងៃទី២៩ ខែមេសានេះ សម្ដេចក្រឡាហោម ស ខេង បានមានប្រសាសន៍ថា ក្រសួង-ស្ថាប័ន្ធពាក់ព័ន្ធ និងអាជ្ញាធរគ្រប់លំដាប់ថ្នាក់ ដែលទទួលខុសត្រូវលើការងារសន្តិសុខ សណ្ដាប់ធ្នាក់សាធារណៈ និងវិស័យផ្សេងៗទៀត ជាពិសេសយន្តការ និងរចនាសម្ព័ន្ធសន្តិសុខបោះឆ្នោតគ្រប់ថ្នាក់ ត្រូវផ្ដល់កិច្ចសហការជាដាច់ខាតដល់ គ.ជ.ប និងគណៈកម្មការរៀបចំការបោះឆ្នោតគ្រប់លំដាប់ថ្នាក់ ដើម្បីរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពក្នុងពេលពិនិត្យបញ្ជីឈ្មោះ និងចុះឈ្មោះបោះឆ្នោតប្រចាំឆ្នាំ និងសម្រាប់សម័យបោះឆ្នោតនីមួយៗ ឲ្យទទួលបានជោគជ័យ។

សម្ដេចក្រឡាហោម ស ខេង បានបន្តថា កិច្ចដំណើរការបោះឆ្នោត ជ្រើសរើសក្រុមប្រឹក្សាឃុំ-សង្កាត់នាពេលខាងមុខនេះ គឺជាដំណាក់កាលតស៊ូ ប្រកបដោយការប្រកួតប្រជែងយ៉ាងតឹងតែង និងក្ដៅគគុករបស់គណបក្សនយោបាយ ដែលបានចូលរួម ហើយក៏ជាដំណាក់កាលដែលងាយនឹងកើតឡើងនូវទំនាស់ ឬបទល្មើសផ្សេងៗ អាចបង្កជាឧបសគ្គរារាំង ឬបន្ទុចបង្អាក់ដល់កិច្ចដំណើរការបោះឆ្នោតទៀតផង។

ទន្ទឹមនឹងនេះ សម្ដេចកករឡាហោម ស ខេង ក៏ស្នើឲ្យមានការយកចិត្តទុកដាក់ខ្ពស់ លើការងារមួយ ចំនួន មានត្រូវពង្រឹងយន្តការព័ត៌មាន, គ្រប់ផែនការទំនាស់ផ្សេងៗកើតឡើងក្នុងមូលដ្ឋាន ត្រូវខិតខំដោះស្រាយពីដើមទី មិនត្រូវទុកក្លាយជាទំនាស់រ៉ាំរ៉ៃ អាចបង្កឲ្យមានចលាចលសង្គម និងក្លាយជាឧបករណ៍ នៃការកេងចំណេញផ្នែកនយោបាយ ហើយត្រូវលើកកម្ពស់តួនាទីដឹកនាំ ដោយត្រូវចាត់វិធានការតាមគ្រប់មធ្យោបាយ គ្រប់រូបភាព និងស្របតាមច្បាប់ ដើម្បីបង្ការហេតុការគ្រោះថ្នាក់នានា ក៏ដូចជាបង្ការទប់ស្កាត់ និងបង្ក្រាបរាល់បទល្មើសគ្រប់ប្រភេទ ក្នុងភូមិសាស្ត្ររបស់ខ្លួន។

សម្ដេចរដ្ឋមន្ត្រីក្រសួងមហាផ្ទៃ បានប្រគល់តួនាទីដល់គណៈឞញ្ជាការឯកភាពរដ្ឋបាលរាជធានី-ខេត្ត ទទួលខុសត្រូវដឹកនាំដោយផ្ទាល់ ក្នុងកិច្ចការធានាសន្តិសុខសណ្ដាប់ធ្នាប់សាធារណៈ និងសុវត្ថិភាពសង្គមក្នុងភូមិសាស្ត្ររបស់ខ្លួន និងធានាឲ្យបានដាច់ខាតនូវស្ថិរភាពសន្តិសុខ សម្រាប់ការបោះឆ្នោត Caពិសេសធានាឲ្យកិច្ចដំណើរការបោះឆ្នោត ជ្រើសរើសក្រុមប្រឹក្សាឃុំសង្កាត់អាណត្តិទី ៥នេះ ប្រព្រឹត្តទៅដោយរលូន ប្រកបដោយភាពស្ងប់ស្ងាត់ គ្មានការគំរាមកំហែង គ្មានអំពើហិង្សា និងប្រកបដោយតម្លាភាព។

គួរបញ្ជាក់ថា ការបោះឆ្នោត ជ្រើសរើសក្រុមប្រឹក្សាឃុំសង្កាត់អាណត្តិទី ៥ នឹងប្រព្រឹត្តិទៅនៅថ្ងៃទី ៥ ខែមិថុនា ឆ្នាំ ២០២២ខាងមុខ ដោយមានគណបក្សនយោបាយ ចូលរួមប្រកួតប្រជែងចំនួន ១៧៕

អត្ថបទ៖ សំអឿន