លោកជំទាវ ម៉ែន សំអន ជំរុញមន្ត្រីគ្រប់ជាន់ថ្នាក់ ត្រូវបង្កើតប្រសិទ្ធភាពការងារបន្ថែមទៀត ក្នុងនាមជាអ្នកបំរើរាស្ត្រ

លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានប្រធានក្រុមការងាររាជរដ្ឋាភិបាល ចុះមូលដ្ឋានរាជធានីភ្នំពេញ បានជំរុញដល់​មន្ត្រីគ្រប់ជាន់ថ្នាក់ ត្រូវបង្កើតប្រសិទ្ធភាពការងារបន្ថែមទៀត ក្នុងនាមជាអ្នកបំរើរាស្ត្រដោយស្មោះត្រង់។

លោកជំទាវ ម៉ែន សំអន បានជំរុញបែបនេះ ខណៈអញ្ជើញជួបសំណេះសំណាល ជាមួយសមាជិកាក្រុមប្រឹក្សាខណ្ឌ-សង្កាត់ គណៈអភិបាល និងសកម្មជននារី នៃខណ្ឌមានជ័យ រាជធានីភ្នំពេញ កាលពីរសៀលថ្ងៃទី ២ ខែឧសភា ឆ្នាំ ២០២២។

លោកជំទាវ មានប្រសាសន៍ថា ក្រោមការដឹកនាំប្រកបដោយកត្តិបណ្ឌិត របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានដឹកនាំប្រទេសមានសុខសន្តិភាព មានស្ថេរភាពនយោបាយល្អ មានការអភិវឌ្ឍលើគ្រប់វិស័យ និងការទប់ស្កាត់នូវការឆ្លងរីករាលដាល នៃជំងឺកូវីដ-១៩ បានយ៉ាងល្អ ដែលបានធ្វើឲ្យកម្ពុជា ក្លាយជាប្រទេសដែលឈរលេខ ២ ក្នុងនាមជាប្រទេសមានសមត្ថភាព ងើបចេញពីកូវីដ-១៩ លឿនជាងគេនៅលើពិភពលោក ។

លោកជំទាវ ក៏បានកោតសសើរដល់នារីគ្រប់លំដាប់ថ្នាក់ នៅខណ្ឌមានជ័យ បានបំពេញតួនាទីភារកិច្ចបានយ៉ាងល្អប្រសើរ ដោយទទួលបានលទ្ធផលគួជាទីមោទនៈ និងបានផ្លាស់ប្តូរសម្រស់ក្នុងខណ្ឌ ដែលជាផ្នែកមួយ ក្នុងការរួមចំណែកអភិវឌ្ឍន៍រាជធានីភ្នំពេញ ស្របតាមផែនការអភិវឌ្ឍរបស់រាជរដ្ឋាភិបាលកម្ពុជា។

លោកជំទាវ បានបន្តទៀតថា មន្ត្រីមូលដ្ឋានគ្រប់លំដាប់ ត្រូវបង្កើតប្រសិទ្ធភាពការងារបន្ថែមទៀត ក្នុងនាមជាអ្នកបម្រើប្រជាពលរដ្ឋ។ ចំណែកឯអាជ្ញាធរមានសម្ថកិច្ច ត្រូវចូលរួមអនុវត្តឲ្យមានប្រសិទ្ធភាព នូវគោលនយោបាយអភិវឌ្ឍន៍សង្កាត់ ដែលបានដាក់ចេញសម្រាប់ អាណត្តិទី ៥ ឆ្នាំ ២០២២-២០២៧ ។ 

នាឪកាសនោះដែរ លោកជំទាវបាននាំអំណោយដ៏ថ្លៃថ្លា ចែកជូនសម្រាប់អ្នកចូលរួមចំនួន ២០០នាក់ ក្នុងម្នាក់ៗទទួលបាន សៀវភៅ ដបអាកុល ថង់យួរ និងថវិកា ៥ម៉ឺនរៀល ផងដែរ៕

អត្ថបទ៖ វិមាន