ទីតាំងស្តុក និងចែកចាយសត្វជ្រូករបស់ស៊ីភីមួយ​​​កន្លែង នៅស្រុកពញាក្រែក មានលាយសត្វជ្រូកគេចពន្ធ​ពីប្រទេសវៀតណាមឬ?

ទីតាំងស្តុក និងចែកចាយសត្វជ្រូកដ៏ធំមួយកន្លែង ស្ថិតក្នុងភូមិស្ពានជ្រៃ ឃុំដូនតី ស្រុកពញាក្រែក ខេត្តត្បូង​ឃ្មុំ កំពុងតែចរាចរ​ណ៍សត្វជ្រូកយ៉ាងសកម្ម ដែលមានរថយន្តជាច្រើនគ្រឿង ដឹកចូល-ដឹកចេញ ចែកចាយដាក់តាមទីសត្តឃាដកាប់លក់ ស្ទើរគ្រប់ស្រុកក្នុងខេត្តត្បូងឃ្មុំ។

ប្រភពព័ត៌មាន បានឲ្យដឹងថា ទីតាំងស្តុក និងចែកចាយសត្វជ្រូកនោះ មានលិខិតទិញលក់ពីក្រុមហ៊ុនស៊ីភីមែន។ ប៉ុន្តែមានជ្រូកគេចពន្ធដឹក ចេញពីប្រទេសវៀតណាមមកលាយក្នុងស្តុក ហើយត្រូវបានគេលក់ចែកចាយដោយសេរី និងគ្មានជំនាញបង្ក្រាបឡើយ។

ប្រភពដដែល បានឲ្យដឹងបន្តថា ចំណុចចែកចាយជ្រូកស៊ីភី ដឹកមកផ្គត់ផ្គង់មានតែទីសត្តឃាដក្រុងសួងមួយទេ ដែលអាជីវករមួយចំនួនមានលិខិតទិញលក់ ពីក្រុមហ៊ុនស៊ីភីច្បាស់លាស់នោះ។ សូមជម្រាបថា ខេត្តត្បូងឃ្មុំ មានទីសត្តឃាដសត្វគោ និងសត្វជ្រូកចំនួន ៧ស្រុក/ក្រុង ត្រូវបានវិនិយោគអស់ហើយ ស្រុកចំនួន ៦ទៀត សត្វគោ និងសត្វជ្រូក អ្នកយកទៅកាប់ទីសត្តឃាដមានតិចតួច ព្រោះអាជីវករមួយចំនួនលួចកាប់តាមផ្ទះ កាប់តាមភូមិ តាមឃុំ។

តាមការឲ្យដឹងពីប្រជាពលរដ្ឋ បានបញ្ជាក់ឲ្យដឹងថា ចំណុចស្តុកសត្វជ្រូកចែកចាយខាងលើ មានថៅកែឈ្មោះ​យក្ស និងមានលិខិតទិញជ្រូកពីក្រុមហ៊ុនស៊ីភីប្រាកដមែន តែក្រុមហ៊ុនស៊ីភីអាចលក់ឲ្យអាជីវករម្នាក់បានយ៉ាងច្រើនពី ១០ទៅ ២០​ក្បាល មិនអាចលក់ឲ្យឈ្មោះនេះ រហូតដល់ស្តុករាប់រយក្បាលនោះទេ។

គេឃើញមានដឹកសត្វជ្រូក ចូលតាមរថយន្តជាច្រើនស្ទើររៀងរាល់យប់ និងពេលល្ងាចដឹកចេញយកទៅចែកចាយតាមបណ្តាស្រុកក្នុងខេត្ត។ ក្នុងដំណាក់ការនេះ ឈ្មួញធ្វើសកម្មភាពដឹកសាងផ្ទេរសត្វជ្រូក តាមរយៈរថយន្តតូចៗជាច្រើនគ្រឿង តាមច្រករបៀងជាច្រើនជាប់ព្រំដែនវៀតណាម។

ជុំវិញបញ្ហានេះ ប្រជាពលរដ្ឋបានសំណូមពរដល់លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តត្បូងឃ្មុំ គួរចាត់កម្លាំងមន្ត្រីក្រោមឱវាទ ពិនិត្យលិខិតទិញសត្វជ្រូកពីក្រុមហ៊ុនស៊ីភី ឲ្យបានច្បាស់លាស់ទៅលើអាជីវករចំណុចខាងលើ ដែលលក់ជ្រូកចែកចាយយ៉ាងច្រើន ធ្វើឲ្យប៉ះពាល់ដល់កសិករដែលចិញ្ចឹមសត្វក្នុងស្រុក បន្ទាប់ពីមានការលំហូរចូលសត្វជ្រូក ពីប្រទេសវៀតណាមយ៉ាងច្រើនបែបនេះ។ ក្នុងនោះ ក្រុមហ៊ុនស៊ីភី ក៏គួរចុះមកពិនិត្យផងដែរ ដើម្បីធ្វើការកំណត់សម្គាល់ឈ្មួញរបស់ខ្លួ នដែលលក់ជ្រូកលាយឡំបែបនេះ។

ពាក់ព័ន្ធនឹងការលក់ចែកចាយ សត្វជ្រូកមិនប្រក្រតីខាងលើនេះ លោក សេង សុភា ប្រធានការិយា​ល័យពេទ្យសត្វខេត្តត្បូងឃ្មុំ បានបញ្ជាក់ថា សត្វជ្រូកទាំងនោះ ជាសត្វជ្រូករបស់ក្រុមហ៊ុនស៊ីភី យកមកពីខេត្តកំពង់ចាមទេ៕

អត្ថបទ៖ សាន វិឡែម