សម្ដេចតេជោ ហ៊ុន សែន៖ ប្រព័ន្ធសុខាភិបាលជឿនលឿន មិនប្រាកដថាឈ្នះកូវីដ ឯខ្សោយ មិនប្រាកដថាចាញ់

សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចកម្ពុជា មានប្រសាសន៍ ពីរដ្ឋធានី វ៉ាស៊ីនតោនឌីស៊ី សហរដ្ឋអាមេរិក ត្រូវនឹងពេលព្រឹក ម៉ោងនៅកម្ពុជា ថ្ងៃទី១២ ខែឧសភា ឆ្នាំ ២០២២នេះថា ប្រព័ន្ធសុខាភិបាលជឿនលឿន មិនប្រាកដថាឈ្នះកូវីដទេ ប្រព័ន្ធសុខាភិបាលទន់ខ្សោយ មិនប្រាកដថាចាញ់កូវីដដែរ ខណៈ ៥ថ្ងៃជាប់គ្នា កម្ពុជាមិនមានករណីឆ្លងថ្មី។នៅក្នុងពិធីជួបសំណេះសំណាលរវាង សម្តេចតេជោ ហ៊ុន សែន ជាមួយនឹងសហគមន៍ខ្មែរនៅអាមេរិក និងខ្មែរ នៅកាណាដា ពេលល្ងាច នៅរដ្ឋធានី វ៉ាស៊ីនតោនឌីស៊ី សហរដ្ឋអាមេរិក ត្រូវនឹងពេលព្រឹក នៅកម្ពុជា សម្ដេចតេជោ ហ៊ុន សែន មានប្រសាសន៍ថា៖ “គ្មានករណីឆ្លងកូវីដ-១៩ រយៈពេល ៥ថ្ងៃជាប់គ្នា នេះសបញ្ជាក់ឱ្យឃើញថាកម្ពុជា បានយកជ័យជម្នះក្នុងការគ្រប់គ្រងជំងឺដ៏កាចសាហាវនេះបាន។

សម្ដេចតេជោ ហ៊ុន សែន មានប្រសាសន៍បន្ថែមថា ដំបូងឡើយ មានការមើលស្រាលពីសំណាក់បរទេស ឬអ្នកយកព័ត៌មានខ្លះ អំពីភាពទន់ខ្សោយរបស់កម្ពុជា ទៅលើការគ្រប់គ្រងកូវីដ ឬសមត្ថភាពឆ្លើយតបរបស់កម្ពុជា និងគេនិយាយថា ប្រព័ន្ធសុខាភិបាលកម្ពុជាទន់ខ្សោយ មកដល់ពេលនេះ យើងអាចសន្និដ្ឋានបានថា ប្រព័ន្ធសុខាភិបាលជឿនលឿន មិនប្រាកដថាឈ្នះកូវីដទេ ប្រព័ន្ធសុខាភិបាលទន់ខ្សោយ មិនប្រាកដថាចាញ់កូវីដដែរ។

សម្ដេចតេជោ មានប្រសាសន៍បន្តថា៖ “មើលការជាក់ស្ដែង ពិនិត្យមើលនៅ ប្រទេសកម្ពុជា និងប្រទេសអាហ្វិចជាច្រើនដែលជាប្រទេសក្រីក្រ ហើយប្រព័ន្ធសុខាភិបាលខ្សោយ ក៏ប៉ុន្តែចំណុចស្ថិតលើការគ្រប់គ្រង ចាត់ចែង ប្រយុទ្ធជាមួយកូវីដ១៩។ យើងចាត់ទុកអាមេរិកជាប្រទេសមហាអំណាចនៃបច្ចេកវិទ្យា នៅបារាំង នៅអាល្លឺម៉ង់ នៅប្រទេសដទៃទៀតស្លាប់ច្រើនណស់។ កម្ពុជាយើងអាចធ្លាក់ក្នុងមហន្តរាយ បើកម្ពុជាយើងមិនមានវិធានការត្រឹមត្រូវ តែបើប្រជាជនអត់ចូលរួមជាមួយរដ្ឋាភិបាល ក៏អត់ជោគជ័យដែរ”។

សម្ដេចតេជោ ហ៊ុន បញ្ជាក់ថា នេះមិនមែនជាការប្រយុទ្ធធម្មតាទេ ជាការប្រយុទ្ធដ៏តានតឹង សម្ដេចបានថ្លែងអំណរគុណ ព្រសង្ឃ ប្រជាពលរដ្ឋក្នុងប្រទេសដែលទទួលយកវិធានការរបស់រដ្ឋាភិបាល តាមរយៈអនុវត្តវិធានការ ៣កុំ៣ការពារ និងការទទួលយកវ៉ាក់សាំងកូវីដ១៩។

គួរបញ្ជាក់ថា យោងតាមសេចក្តីជូនព័ត៌មាន ស្តីពីការសរុបស្ថានភាពជំងឺកូវីដ-១៩ ក្នុងព្រះរាជាណាចក្រកម្ពុជា សម្រាប់ថ្ងៃទី១០ ខែឧសភា ឆ្នាំ២០២២ នៅថ្ងៃម្សិលមិញនេះ ជាថ្ងៃទី៤ ដែលកម្ពុជា មិនមានករណីឆ្លងថ្មី (លទ្ធផលបញ្ជាក់ដោយ PCR) ជាប់គ្នា ខណៈថ្ងៃទី១១ ខែឧសភា ម្សិលមិញ ក៏មិនមានករណីឆ្លងថ្មី ដែលសរុប គឺ ៥ថ្ងៃជាប់គ្នា កម្ពុជា មិនមានករណីឆ្លងថ្មី នៃជំងឺកូវីដ១៩៕

អត្ថបទ៖ ច័ន្ទ វីរៈ