គ.ជ.ប ចេញសេចក្ដីណែនាំ ស្ដីពី បេក្ខជនលាលែង ឬទទួលមរណភាព ឬបាត់បង់សមាជិកភាពពីគណបក្សនយោបាយ

គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្ដីណែនាំ ស្ដីពី បេក្ខជនលាលែង ឬទទួលមរណភាព ឬបាត់បង់សមាជិកភាពពីគណបក្សនយោបាយ ដែលមានបញ្ជីបេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥ ឆ្នាំ​២០២២។

ក្នុងសេចក្ដីណែនាំនេះ បានឲ្យដឹងថា អនុលោមតាមច្បាប់ ស្ដីពី ការបោះឆ្នោតជ្រើសរើស ក្រុមប្រឹក្សាឃុំ-សង្កាត់ និងបទបញ្ជា និងនីតិវិធីសម្រាប់ការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥ ព្រមទាំងសេចក្ដីណែនាំ ចុះថ្ងៃទី ២៣ ខែឧសភា ឆ្នាំ ២០២២ ស្ដីពី បែបបទ និងនីតិវិធីនៃការបំពេញបេក្ខជនបម្រុងបន្ថែម នៃគណបក្សនយោបាយដែលត្រូវទទួលបានអាសនៈ ក្នុងក្រុមប្រឹក្សាឃុំ-សង្កាត់ គណៈកម្មាធិការជាតិរៀបចំការបោះឆ្នោត បានណែនាំដល់គណបក្សនយោបាយ ឬបេក្ខជនទាំងអស់ដូចខាងក្រោម៖

១. ការសុំលាលែង ឬមរណភាព ឬបាត់បង់សមាជិកភាពីគណបក្សនយោបាយ ត្រូវធ្វើឡើងតាមគណបក្សនយោបាយសាមី ដែលមានបញ្ជីបេក្ខជ​នឈរឈ្មោះ ដោយគណបក្សនយោបាយសាមី ត្រូវធ្វើលិខិតជូនដំណឹងជាបន្ទាន់ មកគណៈកម្មការរាជធានី-ខេត្តរៀបចំការបោះឆ្នោត (គធ.ខប) ពាក់ព័ន្ធឲ្យបានមុនថ្ងៃ គធ.ខប ស្រង់ឈ្មោះបេក្ខជនជាប់ឆ្នោតជាសមាជិកក្រុមប្រឹក្សាឃុំ-សង្កាត់។

២. ការសុំលាលែង ឬមរណភាព ឬបាត់បង់សមាជិកភាពីគណបក្សនយោបាយ ដែលមិនមានលិខិតជូនដំណឹងរបស់គណបក្សនយោបាយសាមីនោះទេ គធ.ខប ត្រូវធ្វើលិខិតជូនដំណឹងទៅគណបក្សនយោបាយសាមីវិញ ឲ្យបានជ្រាបពីករណីនេះ ហើយណែនាំឲ្យគណបក្សនយោបាយសាមី ធ្វើលិខិតជូនដំណឹងមក គធ.ខប ឲ្យបានទាន់ពេលវេលា ដូចមានចែងក្នុងចំណុច ១ខាងលើ៕