បណ្ឌិត សុខ ទូច ច្នៃប្រឌិតសាកល្បងផលិតស្រាពី«ផ្លែព្រីង»

ខុសពីប្រទេសលោកខាងលិច និងប្រទេសអាស៊ីខ្លះ លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជាបានបញ្ចេញគំនិតច្នៃប្រឌិតផលិតស្រាចេញពី«ផ្លែព្រីង»។ នៅពេលនេះ លោកគ្រាន់តែសាកល្បងផលិតវាសម្រាប់ទទួលទានដោយខ្លួនឯងសិន ដោយមិនទាន់គិតទីផ្សារអ្វីឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈទំព័រហ្វេសប៊ុកកាលពីដើមសប្តាហ៍នេះ លោកបណ្ឌិត សុខ ទូច បានបង្ហាញពីរូបភាព និងវីដេអូនៃបច្ចេកទេសផលិតស្រាពី«ផ្លែព្រីង»នេះ។ អមជាមួយរូបភាព និងវីដេអូនេះ លោកបណ្ឌិត សុខ ទូច បានសរសេររៀបរាប់ថា៖«សាកល្បងធ្វើស្រាពីផ្លែព្រីង កុំនិយាយអំពីទីផ្សារ ត្រូវតែកែច្នៃវាហើយអាចទុកបានកាន់តែយូរកាន់តែឆ្ងាញ់ កាន់តែថ្លៃ។ សាកល្បងធ្វើសម្រាប់ខ្លួនឯង និងចែកជូនភ្លក់។ សារធាតុផ្សំមានព្រីង៣គីឡូក្រាម ទឹក៦លីត មេដាក់ធ្វើនំបុ័ង១០ក្រាម ស្ករអំពៅ១.៨គីឡូក្រាម»។

សូមបញ្ជាក់ឲ្យដឹងថា ក្រៅពីការសាកល្បងផលិតស្រាចេញពី«ផ្លែព្រីង»នេះ ប្រធានរាជបណ្ឌិត្យសភាកម្ពុជារូបនេះ ក៏បានណែនាំឲ្យមន្រ្តីរបស់ខ្លួនធ្វើការច្នៃមុខម្ហូបផ្សេងៗផងដែរ ដើម្បីចងក្រងទុកជាឯកសារសម្រាប់អ្នកជំនាន់ក្រោយ និងសម្រាប់បង្ហាញទៅកាន់ពិភពលោក។ បន្ទាប់ពីការកែច្នៃនេះ លោកបណ្ឌិត សុខ ទូច បានបង្កើតឲ្យមានវគ្គសិក្សាពីការធ្វើម្ហូបអាហារនៅរាជបណ្ឌិត្យសភាកម្ពុជា៕

ដោយ៖ វណ្ណ សុគន្ធា