ព័ត៌មានជាតិ

គ.ជ.ប ទទួលបានបណ្ដឹងសរុបចំនួន១២៦ ក្នុងនោះមាន៥៣បណ្តឹងសុំឲ្យមានការផាកពិន័យ

បានផុស

៤ years មុន

នៅ

ថ្ងៃពុធ ៨ មិថុនា ២០២២

ដោយ

លោក សោម សូរីដា អគ្គលេខាធិការរង និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានមានប្រសាសន៍ប្រាប់កម្ពុជាថ្មីនារសៀលថ្ងៃទី០៨ ខែមិថុនា ឆ្នាំ២០២២ នេះថា គិតត្រឹមថ្ងៃទី០៧ ខែមិថុនា ឆ្នាំ២០២២ ការដាក់ ការទទួល និងការដោះស្រាយពាក្យបណ្តឹងក្នុងដំណាក់កាលឃោសនាបោះឆ្នោត ដំណាក់កាលមុនថ្ងៃបោះឆ្នោត ឬថ្ងៃស និងក្នុងថ្ងៃបោះឆ្នោត គ.ជ.ប ទទួលបានបណ្ដឹងសរុបចំនួន១២៦បណ្តឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក សោម សូរីដា ក្នុង១២៦ បណ្តឹងនេះ គឺនៅក្នុងពេលឃោសនាបោះឆ្នោតចំនួន៥៣បណ្តឹង ដែលជាបណ្ដឹងសុំឲ្យមានការផាកពិន័យ ហើយក្នុងចំណោម៥៣ បណ្ដឹងនេះ គណបក្សនយោបាយ ឬភ្នាក់ងារគណបក្សនយោបាយបានប្ដឹងមកគណៈកម្មការរាជធានី ខេត្ត រៀបចំការបោះឆ្នោតចំនួន២២ បណ្ដឹង ហើយបន្តប្ដឹងមក គ.ជ.ប ចំនួន៩ បណ្តឹង។

ចំណែកនៅថ្ងៃស និងថ្ងៃបោះឆ្នោត គ.ជ.ប បានទទួលបណ្ដឹងចំនួន៧៣ ហើយក្នុងចំណោម៧៣ បណ្ដឹងនេះ បានប្ដឹងបន្តទៅគណៈកម្មការរាជធានី ខេត្ត រៀបចំការបោះឆ្នោតចំនួន១បណ្តឹង ហើយ២ បណ្ដឹង បានដាក់ផ្ទាល់ទៅគណៈកម្មការរាជធានី ខេត្ត រៀបចំការបោះឆ្នោតតែម្ដង ទាក់ទងទៅនឹងករណីចោទប្រកាន់ទៅលើប្រធានគណៈកម្មការឃុំ សង្កាត់ រៀបចំការបោះឆ្នោត។ លោកបញ្ជាក់ថា ក្នុងចំណោម៧៣បណ្ដឹង ៧១បណ្តឹង ជាបណ្ដឹងពាក់ព័ន្ធទៅនឹងការស្នើសុំឱ្យផ្ដន្ទាទោសចំនួន៣៩ បណ្តឹង និងបណ្តឹងទាក់ទងទៅនឹងភាពមិនប្រក្រតី នៅថ្ងៃបោះឆ្នោតចំនួន៣២ បណ្តឹង។

លោក សោម សូរីដា បានបញ្ជាក់ទៀតថា ក្នុងចំណោម៧១បណ្ដឹង នៅថ្ងៃសមានបណ្តឹងចំនួន៣ បណ្ដឹង ហើយបណ្ដឹងនៅថ្ងៃបោះឆ្នោតមានចំនួន៦៨ បណ្តឹង ហើយក្នុងចំណោម៦៨ បណ្ដឹងនោះ មានបណ្ដឹងស្នើសុំឲ្យដាក់ទោសចំនួន៣៦បណ្ដឹង ហើយបណ្ដឹងអំពីភាពមិនប្រក្រតីមានចំនួន៣២បណ្ដឹង៕

ដោយ ៖ កោះកែវ