សម្ដេចតេជោ ហ៊ុន សែន ៖ កម្ពុជា មានរូបភាពពីរ គឺកម្ពុជាពិត និងកម្ពុជានៅលើបណ្ដាញសារព័ត៌មាន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅចំពោះមុខឯកអគ្គរដ្ឋទូតសហភាពអឺរ៉ុបប្រចាំកម្ពុជា បានលើកឡើងថា រូបភាពរបស់កម្ពុជា មានពីរ គឺកម្ពុជាពិត និងកម្ពុជានៅលើបណ្ដាញសារព័ត៌មាន។

នៅក្នុងពិធីបិទ និងប្រគល់សញ្ញាបត្រក្នុងវគ្គបណ្ដុះបណ្ដាលឆ្នាំ ២០​២០-២០២១ និងបើកវគ្គបណ្ដុះបណ្ដាលឆ្នាំ ២០២២ របស់សាលាភូមិន្ទរដ្ឋបាលជាង ២ពាន់នាក់ នាព្រឹកថ្ងៃទី ១៣ ខែមិថុនានេះ សម្ដេចតេជោ ហ៊ុន សែន បានថ្លែងទៅកាន់ឯកអគ្គរដ្ឋទូតសហភាពអឺរ៉ុបប្រចាំកម្ពុជាថា «លោកជំទាវអគ្គរដ្ឋទូត បើសិជាលោកជំទាវ បើសិជាគេនិយាយអង់គ្លេស ឬនិយាយបារាំង គេនិយាយល្អណាស់ លោកជំទាវស្ដាប់ទៅល្អណាស់ លោកជំទាវស្ដាប់ទៅល្អឥតខ្ចោះ ប៉ុន្តែបើលោកជំទាវ យកភាសាខ្មែរដែលគេនិយាយ លោកជំទាវនឹងឃើញតើគេប្រមាថមាក់ងាយយើងខ្ញុំយ៉ាងម៉េច ត្រង់ហ្នឹងហើយ ដែលយើងខ្ញុំមិនសុខចិត្ត ជាមួយនឹងអ្វីដែលការប្រមាថ ឬមើលពីខាងក្រៅមកចំពោះយើងខ្ញុំ»។

សម្ដេចតេជោ ហ៊ុន សែន បានថ្លែងបន្តថា សម្រាប់កម្ពុជា មានពីររូបភាព គឺកម្ពុជាពិត និងកម្ពុជានៅលើបណ្ដាញសារព័ត៌មាន។ សម្ដេចតេជោនាយករដ្ឋមន្ត្រី បានថ្លែងយ៉ាងដូច្នេះថា «កម្ពុជា មានពីរលោកជំទាវ កម្ពុជាពិតគឺដូច្នេះ កម្ពុជាលើសារព័ត៌មានផ្សេង ចឹងបើសិនជាលោកជំទាវយកចិត្តទុកដាក់ ការបង្ហោះហ្វេសប៊ុកក្ដី លោកជំទាវឲ្យគេបកប្រែពីភាសាខ្មែរ ទៅអង់គ្លេស ឬក៏ទៅបារាំង ឬក៏ទៅអេស្ប៉ាញរបស់លោកជំទាវទៅ អាហ្នឹងបានលោកជំទាវអាចដឹងថា គេធ្វើអ្វីៗ»៕

អត្ថបទ៖ ឃួន សុភ័ក្រ