ព័ត៌មានជាតិ

តុលាការបារាំង នឹងបើកសវនាការលើសំណុំរឿងដែលសសម្តេចតេជោ ហ៊ុន សែន ប្តឹង សម រង្ស៊ី នៅថ្ងៃទី១ ខែកញ្ញា ខាងមុខ

បានផុស

៤ years មុន

នៅ

ថ្ងៃអង្គារ ១៤ មិថុនា ២០២២

ដោយ

តុលាការទីក្រុងប៉ារីស ប្រទេសបារាំង នឹងបើកសវនាការលើសំណុំរឿងដែលសសម្តេចតេជោ ហ៊ុន សែន និងលោកឧត្តមសេនីយ៍ឯក ឌី វិជ្ជា ប្តឹងទណ្ឌិត សម រង្ស៉ី ពីបទបរិហារកេរ្តិ៍ នៅថ្ងៃទី១ ខែកញ្ញា ឆ្នាំ២០២២ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់ឲ្យដឹងពីការបើកសវនាការនេះ ត្រូវបានធ្វើឡើង ខណៈសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឲ្យក្រុមមេធាវីជនជាតិបារាំងចំនួន៤ នាក់ ដែលជាមេធាវីតំណាងរបស់សម្តេច និងលោកឧត្តមសេនីយ៍ឯក ឌី វិជ្ជា ជាដើមបណ្តឹង ប្តឹងទណ្ឌិត សម រង្ស៉ី ទៅតុលាការបារាំង ជួបពិភាក្សានៅភូមិគ្រឹះរបស់សម្តេច នាទីក្រុងតាខ្មៅ ខេត្តកណ្តាល នារសៀលថ្ងៃទី១៤ ខែមិថុនា នេះ។

នៅក្នុងជំនួបនេះសម្តេចតេជោ ហ៊ុន សែន បានគូសបញ្ជាក់អំពីអង្គហេតុ និងចំណុចសំខាន់ៗមួយចំនួនរបស់ទណ្ឌិតសម រង្ស៊ី ។ ជាមួយគ្នានោះ ក្រុមមេធាវីបារាំង ក៏បានពិនិត្យ និងប្រមូលភស្តុតាងសំខាន់ៗ ដែលមានភាពច្បាស់លាស់ និងជាមូលដ្ឋានសម្រាប់ដាក់បន្ទុកលើទណ្ឌិត សម រង្ស៉ី ក្នុងពេលសវនាការ ដែលគ្រោងធ្វើនៅថ្ងៃទី១ ខែកញ្ញា ឆ្នាំ២០២២ខាងមុខនេះ។

សូមបញ្ជាក់ថា បណ្តឹងរបស់សម្តេចតេជោ និងបណ្តឹងរបស់លោកឧត្តមសេនីយ៍ឯក ឌី វិជ្ជា បានដាក់ចូលតុលាការទីក្រុងប៉ារីស ប្រទេសបារាំង កាលពីថ្ងៃទី២០ ខែសីហា ឆ្នាំ២០១៩ និងត្រូវបានចៅក្រមស៊ើបសួរ សម្រេចធ្វើការចោទប្រកាន់លើទណ្ឌិត សម រង្ស៉ី ពីបទបរិហាកេរ្តិ៍ជាសាធារណ:ប្រឆាំងបុគ្គល នៅថ្ងៃទី០៨ ខែមិថុនា ឆ្នាំ២០២០ ហើយការដាក់ពាក្យប្តឹងនេះ ដោយសារតែទណ្ឌិត សម រង្ស៊ី បានចោទប្រកាន់ថា សម្តេចតេជោជាមេក្លោងឲ្យគេសម្លាប់លោក ហុក ឡងឌី និងសម្លាប់លោកជា វិជ្ជា ជាដើម៕

ដោយ ៖ កោះកែវ