លោក វេង សាខុន ៖ កម្ពុជាមានសហគមន៍ចំនួន ១៣១ អាចបង្កើតជាតំបន់ទេសចរណ៍ធម្មជាតិ

រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ លោក វេង សាខុន បានឲ្យដឹងថា ប្រទេសកម្ពុជា មានសហគមន៍ចំនួន ១៣១ ដែលមានសក្តានុពល អាចបង្កើតជាសហគមន៍ទេសចរណ៍ធម្មជាតិបាន ក្នុងចំណោមសហគមន៍ ៥១៦ នៅទូទាំងប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថ្លែងដូច្នេះ នៅក្នុងពិធីផ្សព្វផ្សាយសមាសភាពគណ:កម្មាធិការដឹកនាំអនុវត្តផែនការមេ អភិវឌ្ឍន៍វិស័យទេសចរណ៍ខេត្តមណ្ឌលគីរីហៅកាត់ថា (គ.ជ.ផ.ម) អមជាមួយការប្រកាសផែនការសកម្មភាព នៃផែនការមេអភិវឌ្ឍន៍វិស័យទេស ចរណ៍ខេត្តមណ្ឌលគីរី (២០២១-២០៣៥) នាព្រឹកថ្ងៃទី ៤ ខែកក្កដា ឆ្នាំ ២០២២នេះ។

លោក វេង សាខុន អះអាងថា ក្នុងចំណោមសហគមន៍ ៥១៦របស់កម្ពុជា មានសហគមន៍ចំនួន ២៧ បាននិងកំពុងដំណើរការទេសចរណ៍ធម្មជាតិនៅតំបន់មាត់សមុទ្រ និងតំបន់បឹងទន្លេសាប។

លោកបន្ថែមថា ក្រសួងកសិកម្ម ក៏បានបង្កើតសហគមន៍ព្រៃឈើសរុបចំនួន ៦៤៣ និងបានធ្វើផែនការដើម្បីគ្រប់គ្រងរួចរាល់ចំនួន ១០៣ សហគមន៍។ ក្នុងនោះ ក៏មានតំបន់ព្រៃឈើតាមបណ្តោយដងស្ទឹង ព្រែក បឹង ក្នុងដែនព្រៃបម្រុងទុកអចិន្ត្រៃយ៍ ចម្ការឈើដាំ ស្ថានីយផ្សព្វ​ផ្សាយ និងស្តារព្រៃឈើ ចម្ការកសិ-រុក្ខកម្ម ចម្ការរុក្ខទិវា ដែលអាចអភិវឌ្ឍទៅជាគោលដៅទេសចរណ៍ធម្មជាតិ កសិ-ទេសចរណ៍ និងតំបន់លំហែកម្សាន្តផងដែរ។

លោករដ្ឋមន្ត្រីរំពឹងទៀតថា សហគមន៍កសិកម្មមួយចំនួន អាចនឹងបង្កើតមុខរបរថ្មីមួយ ឬ“កសិ-ទេសចរណ៍” សម្រាប់ផ្តល់ឱកាសដល់អ្នកទេសចរណ៍ក្នុងស្រុក និងបរទេស ឲ្យបានទៅទស្សនាកសិដ្ឋានរបស់ប្រជាកសិករ ដែលជាសមាជិកសហគមន៍កសិកម្មមូលដ្ឋាន។

ដោយឡែកសម្រាប់ខេត្តមណ្ឌលគិរីលោក វេង សាខុន អះអាងថា ខេត្តភាគឦសានមួយនេះ គឺជាខេត្តដែលមានសក្កានុពលទេសចរណ៍ស្រាប់ និងក្រោមរូបភាពជា “សក្តានុពលទេសចរណ៍ និងវប្បធម៌” ដែលស្ថិតនៅក្រោមដែនសមត្ថកិច្ច របស់ក្រសួងកសិកម្ម។ បន្ថែមពីនេះទៀតខេត្តមណ្ឌលគិរី ក៏មានចម្ការព្រៃស្រល់របស់រដ្ឋទំហំ ៣៦៤ ហិកតា សួនផ្កាចម្រុះ និងសួនភូតគាមលើផ្ទៃដី ៤៧០ហិកតា គ្រោងរៀបចំសួនផ្កា ២០ហិកតា និងរៀបចំអាងទឹកបង្ហៀរ សម្រាប់បម្រើដល់វិស័យទេសចរណ៍។

បើតាមលោករដ្ឋមន្ត្រី វេង សាខុន ក្រសួងកសិកម្ម នឹងរៀបចំអភិវឌ្ឍកសិទេសចរណ៍ តាមរយ:ចម្ការឈើហូបផ្លែ ការអភិវឌ្ឍចម្ការឈើដាំ ដែលអនុវត្តដោយក្រុមហ៊ុនដីសម្បទានសេដ្ឋកិច្ច រួមជាមួយនឹងការស្តារព្រៃឈើ និងសហគមន៍ព្រៃឈើឡើងវិញផងដែរ។ ក្រៅពីនេះ ក្រសួងកសិកម្ម ក៏មានគម្រោងកិច្ចសហប្រតិបត្តិការជាមួយដៃគូមួយចំនួនទៀត ដែលនឹងចូលខ្លួនមកបម្រើឲ្យវិស័យទេសចរណ៍ (បន្លែ ផ្លែឈើ ត្រី សាច់) និងអេកូទេសចរណ៍ (ដំណើរកម្សាន្តក្នុងព្រៃចម្ការឈើដាំ ចម្ការស្រល់ ទស្សនាសហគមន៍ព្រៃឈើ សួនរុក្ខគីរី ជីវចម្រុះដ៏សម្បូរបែប រួមទាំងសួនសត្វ) នៅក្នុងខេត្តមណ្ឌលគិរីនេះទៀតផង៕

អត្ថបទ៖ លន់ សេនី