​អភិបាលក្រុងកំពង់ឆ្នាំង​ចុះពិនិត្យជំនន់ទឹកភ្លៀង​ជន់លិចផ្លូវក្នុងភូមិដំណាក់ពពូល​

​យោងសំណូមពរប្រជាពលរដ្ឋរស់នៅភូមិដំណាក់កំពូល ​សង្កាត់កំពង់ឆ្នាំង​ ក្រុងកំពង់ឆ្នាំង​ស្ដីពី​សា្ថន​ភាពជំនន់ទឹកភ្លៀងម្តងៗលិចលំនៅឋាន និងផ្លូវផងនោះ នៅព្រឹកថ្ងៃទី ១២ ខែកក្កដាឆ្នាំ២០២២ លោក យិន សាវ៉េន អភិបាលក្រុងកំពង់ឆ្នាំង រួមនិងលោកស្រី កែវ សុផាត ចៅសង្កាត់កំពង់ឆ្នាំង ចុះមកប្រជុំសម្របសម្រួលរកដំណោះស្រាយជាមួយប្រជាពលរដ្ឋ ដើម្បីរួមគ្នាជួសជុល​ផ្លូវក្នុងភូមិ​ឡើងវិញ។

នៅក្នុងពិធីប្រជុំនេះលោក យិន សាវ៉េន អភិបាលក្រុងកំពង់ឆ្នាំងបានបញ្ជាក់ថា ដោយសារតែបងប្អូនប្រជាពលរដ្ឋ កន្លងទៅចាក់ដីសាងសង់លំនៅដ្ឋាន មិនដាក់ប្រព័ន្ធលូទឹកមុខផ្ទះឲ្យបានត្រឹមត្រូវ ទើបពេលមានភ្លៀងបានជន់លិចបែបនេះ។

លោកក៏បានបញ្ជាក់ដែរថា ដើម្បីរំដោះទឹកជូនប្រជាពលរដ្ឋបានលុះ ត្រាតែកាយប្រឡាយតាមបណ្ដោយផ្លូវ ដោយប្រជាពលរដ្ឋត្រូវចូលរួម ដាក់លូតសមមុខផ្ទះរៀងៗខ្លួន ប៉ុន្តែបងប្អូនត្រូវចូលរួមបដិភាគក្នុងការកាយប្រឡាយផងដែរ។

ប្រជាពលរដ្ឋនៅក្នុងពិធីប្រជុំនេះក៏បានស្ម័គ្រចិត្តបដិភាគថវិកាដើម្បីរួមចំណែកក្នុងការរំដោះទឹកកាយប្រឡាយ និងដាក់លូតាមមុខផ្ទះរបស់ពួកគាត់ផងដែរ។ ដូច្នេះក្នុងពេលឆាប់ចាប់ខាងមុខនេះប្រជាពលរដ្ឋសង្ឃឹមថាអាជ្ញាធរនិងមន្ត្រីជំនាញនិងគិតគូរជួសជុលផ្លូវចំណុចខាងលើនេះឡើងវិញ ដើម្បីជួយសម្រួលចរាចរណ៍ និងកុំឱ្យទឹកភ្លៀងលិចលង់លំនៅដ្ឋានប្រជាពលរដ្ឋ។

មន្ត្រីជំនាញបានឲ្យដឹងថា ផ្លូវបឹងធំស្ថិតនៅក្នុងភូមិដំណាក់ពពូល ខាង លើនេះកំពុងរងការខូចខាតយ៉ាងខ្លាំង ប៉ុន្តែកន្លងមកគឺបានជាប់កិច្ចកង់ត្រាជាមួយអង្គការចៃការ ជួយជួសជុលកសាងទើបអាជ្ញាធរនិងមន្ត្រីជំនាញមិនហ៊ានជួសជុលនិងទើបធ្វើការខូចខាតកាន់តែមានសភាពធ្ងន់ធ្ងរទៅ៕

អត្ថបទ៖ ឈៀងថារិទ្ធ