មន្រ្តីអាជ្ញាធរជាតិអប្សរា ៖ ការសាងសង់សំណង់ខុសច្បាប់ នៅតែបន្តមានក្នុងតំបន់អង្គរ  

អគ្គនាយករងនៃអាជ្ញាធរជាតិអប្សរា លោក ឡុង កុសល បានលើកឡើងថា ការសាងសង់សំណង់ខុសច្បាប់ នៅតែបន្តមានក្នុងតំបន់វប្បធម៌អង្គរ។ មន្ត្រីរូបនេះ បញ្ជាក់ថា ការកើនឡើងនៃសំណង់អគារក្នុងតំបន់រមណីយដ្ឋានអង្គរនេះ អាចជាសម្ពាធនៃផលប៉ះពាល់ដល់របៀបរបរ ទំនៀមទម្លាប់ ប្រពៃណី និងប្រាង្គប្រាសាទនៅក្នុងតំបន់បេតិកភ័ណ្ឌរបស់កម្ពុជា បើគ្មានវិធានការទប់ស្កាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចសម្ភាសជាមួយ«កម្ពុជាថ្មី» លោក ឡុង កុសល ថ្លែងថា នៅក្នុងបរិបទបច្ចុប្បន្ន  បញ្ហាកំពុងប្រឈម នៅក្នុងតំបន់អង្គរ  គឺការកើនឡើងនៃការហូរចូលមករស់នៅក្នុងតំបន់បេតិកភ័ណ្ឌនេះជាបន្តបន្ទាប់ពីសំ ណាក់ប្រជាពលរដ្ឋខាងក្រៅ ដោយបានទិញដី ​ហើយសាងសង់សំណង់ខុសច្បាប់នៅក្នុងតំបន់អង្គរ។

បើតាមលោក ឡុង កុសល គឺបញ្ហានេះ កើតមានឡើងជាយូរមកហើយ ប៉ុន្តែក្នុងរយៈពេលថ្មីនេះ ពិសេស ក្នុងពេលកម្ពុជារៀបចំការបោះឆ្នោត បញ្ហានៃការទិញលក់ដីធ្លី និងសកម្មភាពសាងសង់សំណង់អគារខុស ច្បាប់ ពុំស្របតាមបទដ្ឋានបច្ចេកទេស តែងតែកើតមាន។

មន្ត្រីនៃអាជ្ញាធរជាតិអប្សរារូបនេះ គូសបញ្ជាក់ថា ការទប់ស្កាត់សំណង់ខុសច្បាប់នៅតំបន់អង្គរ គឺកិច្ចការដ៏ មានសារៈសំខាន់សម្រាប់លើកកម្ពស់របស់តម្លៃរមណីយដ្ឋានវប្បធម៌អង្គរកម្ពុជា កុំឲ្យឥទ្ធិពលខាងក្រៅ ជ្រៀតចូល ដែលអាចធ្វើឲ្យប៉ះពាល់ដល់អត្តសញ្ញាណជាតិ របៀបរបរនៃការរស់នៅ ជំនឿសាសនា ​ទំនៀម ទម្លាប់ ប្រពៃណីរបស់ប្រជាជននៅក្នុងតំបន់បេតិកភ័ណ្ឌដ៏ល្អផូរផង់របស់កម្ពុជា។  

តែបើទោះបីជាបញ្ហាសំណង់ខុសច្បាប់នៅក្នុងតំបន់អង្គរនៅតែបន្តកើតមានឡើងក៏ដោយ ប៉ុន្តែលោក ឡុង កុសល បានឲ្យដឹងថា អាជ្ញាធរជាតិអប្សរា ក៏បានខិតខំប្រឹងប្រែងអស់ពីកម្លាំងកាយ កម្លាំងចិត្ត លើកិច្ចការអភិរក្ស និងជួសជុលប្រាង្គប្រាសាទ ព្រមទាំងការកែលំអរចនាសម្ព័ន្ធរូបវន្ត ប្រកបដោយប្រសិទ្ធភាព និងភាពជោគជ័យ។  ចាប់តាំងពីឆ្នាំ១៩៩២ មកដល់ពេលនេះ ដំណើរការនៃកិច្ចការអភិរក្ស និងជួសជុលរមណីយដ្ឋានអង្គរ និងការអភិវឌ្ឍប្រកបដោយចីរភាពនៅក្នុងរមណីយដ្ឋានអង្គរ មានដំណើរការដោយរលូន និងមានភាពល្អប្រសើរ៕

ដោយ៖ ធឿន វ៉ាន់សុង