លោកស្រី ម៉ែន ​សំអន​ផ្តាំផ្ញើឱ្យបង្កើន​ការប្រុង​ប្រយ័ត្នកូវីដ១៩​កំពុងឆ្លង​ចូលសហគមន៍

លោកស្រី ម៉ែន សំអន ឧបនាយករដ្ឋមន្រ្តី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ បានថ្លែងនូវការផ្តាំផ្ញើរនារីទាំងអស់ ត្រូវតែបង្កើននូវការប្រុងប្រយ័ត្នខ្ពស់បន្ថែមទៀត បើទោះបីជាស្ថានភាពនៃការឆ្លងរីករាលដាលនៃជំងឺកូវីដ១៩ នៅកម្ពុជា បច្ចុប្បន្នមានការថយចុះយ៉ាងណាក៏ដោយជាពិសេសអនុវត្តនូវវិធានការរបស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារ ៣កុំ។

លោកស្រីថ្លែងបែបនេះក្នុងឱកាសអនុញ្ញាតឲ្យគណៈប្រតិភូសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកោះកុងដឹកនាំដោយលោកស្រី មិថុនា ភូថង ចូលជួបសម្តែងការគួរសម និងពិភាក្សាការងារ នៅទីស្តីការក្រសួង នារសៀលថ្ងៃទី១៥ ខែកក្កដា ឆ្នាំ២០២២។

លោកស្រីក៏បាននាំមកនូវការផ្តាំផ្ញើ សាកសួរសុខទុក្ខ និងការនឹករលឹកពីសំណាក់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍន៍ ជូនដល់សមាជិក សមាជិកាទាំងអស់ ដែលបានចូលរួមក្នុងកម្មវិធីថ្ងៃនេះ។

លោកស្រី មិថុនា ភូថង អភិបាលខេត្តកោះកុងបានរាយការណ៍អំពីវឌ្ឍនៈភាព និងសកម្មភាពរបស់សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកោះកុងដែលអនុវត្តបាននាពេលកន្លងមកដោយទទួលបានលទ្ធផលគួរជាទីមោទនៈ ជាពិសេសការចូលរួមទប់ស្កាត់និងប្រយុទ្ធប្រឆាំងនឹងជំងឺកូវីដ១៩។

ទន្ទឹមនឹងនោះ លោកស្រី ម៉ែន សំអន ក៏បានថ្លែងអំណរគុណចំពោះនារីនៃខេត្តកោះកុងដែលបានចូលរួមយ៉ាងសកម្មក្នុងកិច្ចដំណើរការបោះឆ្នោតក្រុមប្រឹក្សាឃុំ សង្កាត់ ឆ្នាំ២០២២ នេះ ដោយទទួលបានលទ្ធផលយ៉ាងល្អ និងបន្តយកឈ្នះក្នុងការបោះឆ្នោតតំណាងរាស្រ្តឆ្នាំ ២០២៣ នាពេលខាងមុខ។

លោកស្រីបានផ្តាំផ្ញើរនារីទាំងអស់ ត្រូវតែបង្កើននូវការប្រុងប្រយ័ត្នខ្ពស់បន្ថែមទៀត បើទោះបីជា ស្ថានភាពនៃការឆ្លងរីករាលដាលនៃជំងឺកូវីដ ១៩ នៅកម្ពុជា នាពេលបច្ចុប្បន្ននេះមានការថយចុះយ៉ាងណាក៏ដោយ ជាពិសេស អនុវត្តនូវវិធានការរបស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារ ៣កុំ តែម្ដង៕

អត្ថបទ៖ វិមាន