ព័ត៌មានជាតិ

រដ្ឋមន្ត្រីការងារ ណែនាំឱ្យថៅកែរោងចក្រ ជំរុញឱ្យកម្មករទៅចាក់វ៉ាក់សាំងដូសជំរុញ ដើម្បីទប់ស្កាត់ការឆ្លងជំងឺអូមីក្រុងថ្មី

បានផុស

២ ខែ មុន

នៅ

ថ្ងៃសៅរ៍ ១៦ កក្កដា ២០២២

ដោយ

លោកបណ្ឌិត អ៉ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានណែនាំដល់ម្ចាស់រោងចក្រសហគ្រាសបន្តជំរុញឱ្យកម្មករនិយោជិតទៅចាក់វ៉ាក់សាំងដូសជំរុញបន្ថែមទៀត ដើម្បីបង្ការទប់ស្កាត់ការឆ្លងរាលដាលជំងឺកូវីដ ពិសេសមេរោគអូមីក្រុងប្រភេទបំប្លែងខ្លួនថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណែនាំនេះ បានធ្វើឡើងបន្ទាប់ពីមានកម្មករនិយោជិតនៅតាមសហគ្រាសរោងចក្រនានាភាគច្រើនទទួលបានការចាក់វ៉ាក់សាំងដូសទី ២ និងទី ៣ ប៉ុណ្ណោះ។ ថ្លែងក្នុងពិធីផ្សព្វផ្សាយរបបសន្តិសុខសង្គមផ្នែកប្រាក់សោធនសម្រាប់បុគ្គលទាំងឡាយ ដែលស្ថិតនៅក្រោមបទប្បញ្ញត្តិ

នៃច្បាប់ស្តីពីការងារដល់និយោជកកាលពីថ្ងៃទី ១៥ កក្កដា នៅសណ្ឋាគារហ៊ីម៉ាវ៉ារីលោក រដ្ឋមន្ត្រីបានមានប្រសាសន៍ថា « ភាគច្រើនកម្មករយើងចាក់វ៉ាក់សាំងបានដូសទី ២ និងទី ៣។ ដូចនេះខ្ញុំសូមស្នើឱ្យនិយោជកខិតខំលើកទឹកចិត្តបន្តជំរុញឱ្យកម្មករទៅទទួលចាក់វ៉ាក់សាំងដូសជំរុញទី ៤ និងទី ៥ បន្ថែមទៀត បន្ទាប់ពីកម្ពុជាមានឆ្លងករណីជំងឺកូវីដ១៩ ប្រភេទអូមីក្រុងថ្មី ដែលមានការចម្លងលឿនជាងមុនក្រោយពីសូន្យអស់រយៈពេល ៥២ ថ្ងៃរួចមក»។

លោករដ្ឋមន្ត្រីបានបន្តថា បច្ចុប្បន្ននេះជំងឺអូមីក្រុងបំប្លែអខ្លួនថ្មី បានឆ្លងចូលនៅក្នុងសហគមន៍ឡើងវិញ ហើយសូម្បីតែអ្នកនៅក្បែរខ្លួនយើងក្រុមគ្រួសារយើងក៏អាចឆ្លងដែរ។ ប៉ុន្តែដោយសារមានការចាក់វ៉ាក់សាំង ទើបបានជាការឆ្លងមានសភាពស្រាលៗមិនឈឺធ្ងន់ចូលសម្រាកពេទ្យ។ ប៉ុន្តែនៅពេលឥទ្ធិពលវ៉ាក់សាំងចុះថយក្នុងរយៈពេល ៦ ទៅ ៧ ខែនោះ យើងក៏អាចនឹងប្រឈមនឹងការឆ្លងជំងឺកូវីដ១៩ ហើយមានសភាពធ្ងន់ធ្ងរទៀតដោយសារវ៉ាក់សាំងជិតអស់ប្រសិទ្ធភាព។

លោករដ្ឋមន្ត្រីបានបន្ថែមថា « អីចឹងដើម្បីធានាបានដល់អាជីវកម្មក៏ដូចជាផលិតកម្មនៅក្នុងរោងចក្រសហគ្រាសរោងចក្រនីមួយៗ ខ្ញុំសូមរំលឹកដល់ម្ចាស់រោងចក្រទទួលយកវ៉ាល់សាំងដូសជំរុញទី ៤ ឬទី ៥ ព្រោះថាការផ្តល់វ៉ាក់សាំងនេះ មិនតម្រូវឱ្យរោងចក្របង់ថ្លៃទេ គឺធ្វើយ៉ាងម៉ិចជួយជំរុញឱ្យកម្មករទៅចាក់ឱ្យបានគ្រប់ៗគ្នា។ បើការណាកម្មករមានឆ្លងជំងឺកូវីដវានឹងធ្វើឱ្យប៉ះពាល់ដល់ដំណើរការច្រវ៉ាក់ផលិតកម្មនៅក្នុងរោងចក្រជាមិនខាន»។

លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានធ្វើការក្រើនរំលឹកឱ្យប្រជាពលរដ្ឋបង្កើនវិធានការការពារបន្ទាប់ ពីបានការរកឃើញជំងឺកូវីដ១៩ ប្រភេទអូមីក្រុងបំប្លែងថ្មី BA.4 និងBA.5 ដែលមានការចម្លងលឿនជាងពពួកអូមីក្រុងមុនៗទៅទៀត។ លោករដ្ឋមន្ត្រីបានមានប្រសាសន៍ថា ជំងឺកូវីដ១៩ ប្រភេទអូមីក្រុង បំប្លែងថ្មី BA.4 និងBA.5 ជាករណីដែលស្ថិតក្នុងចំណោមការរាលដាលសារជាថ្មីឡើងវិញនៅកម្ពុជា ចាប់តាំងពីថ្ងៃទី ២៨ ខែមិថុនា ក្រោយស្ងប់ស្ងាត់អស់រយៈពេល ៥២ ថ្ងៃ។ លោករដ្ឋមន្ត្រីបានបន្តថា ករណីវិជ្ជមានកូវីដ១៩ សារជាថ្មីនេះ ត្រូវបានរកឃើញនៅលើអ្នកដំណើរពីក្រៅប្រទេស អ្នកនៅក្នុងសហគមន៍ និងអ្នកធ្វើតេស្តសម្រាប់ធ្វើវិញ្ញាបនបត្រទៅបរទេស។

ចំណែកការចរាចរនៃពពួកអូមីក្រុងបំប្លែងថ្មី BA.4, BA.5 គឺមានសមត្ថភាពឆ្លងលឿនជាងពពួកអូមីក្រុងមុនៗ ដូចជា BA.1, BA2។ លោករដ្ឋមន្ត្រីបានបន្តទៀតថា ពពួកមេរោគបំប្លែងថ្មី BA.4, BA.5 នេះ មានលទ្ធភាពបញ្ជៀតចូលប្រព័ន្ធភាពស៊ាំរបស់មនុស្សបានងាយស្រួលជាងមុន ដែលធ្វើឲ្យភាពស៊ាំរបស់បុគ្គលឆាប់ធ្លាក់ចុះលឿនជាងមុន បើទោះបីជាពួកវាមានរោគសញ្ញា មិនខុសប្លែកពីប្រភេទវីរុសជំនាន់មុនៗដោយមានការក្តៅខ្លួន ក្អក ឈឺបំពង់កហៀរសំបោរ ស្រដៀងផ្តាសាយធម្មតា។

លោករដ្ឋមន្ត្រីបានក្រើនរំលឹកឲ្យបង្កើនការប្រុងប្រយ័ត្ននិងការពារ ដើម្បីបញ្ចៀសនូវការរីករាលដាលកូវីដ-១៩ ដ៏ធ្ងន់ធ្ងរសារជាថ្មី និងអំពាវនាវដល់ប្រជាជនទាំងអស់ទាំងកម្ពុជា និងបរទេសដែលរស់នៅកម្ពុជា បន្តនាំគ្នាអនុវត្តវិធានការ ៣ ការពារ ៣ កុំ ព្រមទាំងនាំគ្នាទៅចាក់វ៉ាក់សាំង ទាំងដូសមូលដ្ឋាន និងដូសជំរុញដោយមានគម្លាតពីមួយដូសទៅមួយដូសរយៈពេល ៣ ខែឡើងទៅ៕

អត្ថបទ៖ សំអឿន