លោកជំទាវ ម៉ែន សំអន អរគុណចំពោះទឹកចិត្តដ៏ប្រពៃសប្បុរសជន ដែលបានផ្តល់ជំនួយសប្បុរសធម៌ ជួយដល់ជនងាយរងគ្រោះ

លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានថ្លែងអំណរគុណចំពោះទឹកចិត្តដ៏ប្រពៃរបស់សប្បុរសជន ដែលបានផ្តល់ជំនួយសប្បុ​រសធម៌ ជួយដល់ជនងាយរងគ្រោះ កុមារកំព្រា ជនពិកា និងអ្នករងគ្រោះដោយទឹកជំនន់នៅខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកជំទាវ ម៉ែន សំអន ថ្លែងបែបនេះ ខណៈទទួលអំណោយសប្បុរធម៌ពីលោក អៀង ពិសិដ្ឋ អគ្គនាយកក្រុមហ៊ុន RITHYSETH DEVELOPMENT នៅព្រឹកថ្ងៃទី ២២ ខែកក្កដា ឆ្នាំ ២០២២ នាទីស្ដីការក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច។

លោកជំទាវ ក៏បានថ្លែងអំណរគុណដល់លោក អៀង ពិសិដ្ឋ ដែលបានឧបត្ថម្ភអង្ករ ២០តោន ជួយដល់មូលដ្ឋានខេត្តស្វាយរៀង។ សណ្តានចិត្តដ៏ប្រពៃថ្លៃថ្លានេះ បានបង្ហាញអំពីសាមគ្គីភាព និងសកម្មភាពមនុស្សធម៌ ក្នុងការជួយដល់ជនរងគ្រោះ និងផលប៉ះពាល់នៃជំងឺកូវីដ-១៩ នៅខេត្តស្វាយរៀង។ សកម្មភាពមនុស្សធម៌ទាំងនេះ គឺជាកាយវិការដ៏ល្អប្រពៃរបស់វិស័យឯកជន ដែលបានជួយដល់រាជរដ្ឋាភិបាល ក៏ដូចជាការជួយដល់ការងារមនុស្សធម៌ ជួយដល់ប្រជាពលរដ្ឋកំពុងជួបប្រទះនូវជីវភាពខ្វះខាត និងជួបការលំបាក នៅក្នុងអំឡុងពេលនៃការឆ្លងរីករាលដាលជំងឺកូវីដ-១៩។

លោកជំទាវ ម៉ែន សំអន ក៏បានជូនពរឲ្យក្រុមហ៊ុនកាន់មានតែមានការរីកចម្រើន និងទទួលបានការគាំទ្រលើវិស័យ សំណង់ ស្ពាន និងផ្លូវបេតុងនៅកម្ពុជា ដើម្បីចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិលើវិស័យសំណង់ និងហេដ្ឋារចនាសម្ព័ន្ធនានា ដើម្បីរួមគ្នាបំរើផលប្រយោជន៍ជូនពលរដ្ឋផងដែរ៕

អត្ថបទ៖ វិមាន