លោក ស៊ុ សន្និសិទ្ធ៖ ជ័យជម្នះរបស់គណបក្សប្រជាជន បង្ហាញកាន់ច្បាស់ពីការជឿជាក់លើការដឹកនាំរបស់សម្តេច​តេជោ ហ៊ុន សែន

លោក ស៊ុ សន្និសិទ្ធ សមាជិកគណៈកម្មាធិការកណ្ដាលគណបក្សប្រជាជនកម្ពុជា អនុប្រធានក្រុមការងារចុះមូលដ្ឋានខេត្តកំពង់ធំ និងជាប្រធានក្រុមការងារចុះជួយស្រុកសន្ទុកបានមានប្រសាសន៍ថាជ័យជម្នះយ៉ាងត្រចះត្រចង់របស់គណបក្សប្រជាជនកម្ពុជាក្នុងការបោះឆ្នោតឃុំសង្កាត់ថ្មីៗនេះបានសបញ្ជាក់ឲ្យឃើញកាន់តែច្បាស់ពីការបន្តគោរព
ស្រលាញ់គាំទ្រនិងជឿជាក់ពីសំណាក់ប្រជាពលរដ្ឋកម្ពុជាទូទាំងប្រទេសចំពោះការដឹកនាំប្រកបដោយគតិបណ្ឌិតរបស់សម្តេចតេជោហ៊ុនសែនដែលបាននាំនាវាកម្ពុជាឲ្យមានការរីកចម្រើនជាបន្តបន្ទាប់លើគ្រប់វិស័យ។

លោក ស៊ុ សន្និសិទ្ធ បានលើកឡើងបែបនេះនៅព្រឹកថ្ងៃទី២៨កក្កដា ក្នុងកិច្ចប្រជុំផ្សព្វផ្សាយស្តីពីលទ្ធផលនៃសន្និបាតគណៈកម្មាធិការកណ្តាលវិសាមញ្ញរបស់គណបក្សប្រជាជនកម្ពុជា ជូនដល់ក្រុមការងារគណបក្ស មកពី ឃុំចំនួន ៤ គឺឃុំ
តាំង ក្រសាំង ឃុំព្នៅ ឃុំប្រាសាទ និងឃុំជ្រាប់របស់ ស្រុកសន្ទុក។ នៅក្នុងកិច្ចប្រជុំផ្សព្វផ្សាយនេះ ដែរលោក ស៊ុ សន្និសិទ្ធិ បានលើកយកខ្លឹមសារសំខាន់ៗ និងបានបញ្ជាក់លម្អិតបន្ថែមអំពីខ្លឹមសារនៃ លទ្ធផលសន្និបាត និងចំណុចសំខាន់ៗ​មួយចំនួនទៀតដែលជាទិសដៅអាទិភាពពាក់ព័ន្ធទៅនឹងក្របខណ្ឌរបស់គណបក្សឆ្ពោះទៅកាន់ការបោះឆ្នោតជ្រើសតាំងតំណាងរាស្រ្តនីតិកាលទី៧ឆ្នាំ២០២៣ខាងមុខជូនដល់ក្រុមការងារបានយល់កាន់តែច្បាស់ទៀតផង។

លោក ស៊ុ សន្និសិទ្ធ នូវបានចាត់ទុកការគាំទ្រនិងជឿជាក់របស់ប្រជាជនកម្ពុជាមកលើការដឹកនាំរបស់រាជរដ្ឋាភិបាលកម្ពុជានិងគណបក្ស ដែលមានសម្តេចតេជោ ហ៊ុន សែន ជានាយករដ្ឋមន្ត្រី និងជាប្រធានគណបក្សអាចវាយតម្លៃបានថាប្រជាពលរដ្ឋយើងបានប្រើប្រាស់សិទ្ធិរបស់ខ្លួនបានត្រឹមត្រូវ មិនចាញ់បោកការឃោសនាភូតកុហករបស់ជនអគិតមួយចំនួនទោះបីជាក្រុមទាំងនោះប្រឹងប្រើប្រាស់នូវមធ្យោបាយទុច្ចរិត និងឃោសនាពិសពុលយ៉ាងណាក៏ដោយ។

លោកបានបញ្ជាក់ថា «កត្តាដែលធ្វើឲ្យគណបក្សប្រជាជនកម្ពុជាទទួលបានជ័យជម្នះធំធេងដូចនេះពិតជាមិនអាចកាត់ផ្តាច់ពីការចូលរួមចំណែកយ៉ាងសកម្មនិងការលះបង់ទាំងកម្លាំងកាយចិត្តមិនខ្លាចនឿយហត់ពីសំណាក់ក្រុមការងារគ្រប់ជាន់ថ្នាក់របស់គណបក្សបានដែរទើបយើងទទួលបានលទ្ធផលដ៏គាប់ប្រសើរបែបនេះ»។

ក្នុងកិច្ចប្រជុំនោះដែរសមាជិកសមាជិកាបានតាមដានស្ដាប់ដោយយកចិត្តទុកដាក់អំពីខ្លឹមសារនៃសេចក្ដីជូនដំណឹងស្ដីពី
លទ្ធផលនៃសន្និបាតគណៈកម្មាធិការកណ្ដាលវិសាមញ្ញរបស់គណបក្សប្រជាជនកម្ពុជា និងរបាយការណ៍ស្ដីពី ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ និងទិសដៅការងារឆ្ពោះទៅកាន់ការបោះឆ្នោតជ្រើសរើសតាំងតំណាងរាស្រ្ដនីតិកាលទី៧ ឆ្នាំ២០២៣ផងដែរ៕

អត្ថបទ៖ សំអឿន