ព័ត៌មានជាតិ

លោក សោម សម្បត្តិ កំពុងរកមេធាវីការពារក្ដី ពិភាក្សារឿងចូលបំភ្លឺនៅតុលាការ

បានផុស

៤ years មុន

នៅ

ថ្ងៃសុក្រ ២៩ កក្កដា ២០២២

ដោយ

លោក សោម សម្បត្តិ អគ្គនាយកក្រុមហ៊ុនខាំ-ផែន(CAM-PAINT) និងជាអ្នកប្រឹក្សាយោបល់អំពីការធ្វើជំនួញក្នុងប្រទេសកម្ពុជា កំពុងរកមេធាវីការពារក្ដីផ្ដល់យោបល់រឿងចូលបំភ្លឺនៅតុលាការនៅថ្ងៃទី ២ ដើមខែសីហា ឆ្នាំ ២០២២ ឆាប់ៗនេះ បន្ទាប់ពីរូបលោកទទួលបានដីកាកោះហៅជាផ្លូវការរបស់តុលាការសាលាដំបូងរាជធានីភ្នំពេញនៅព្រឹកថ្ងៃទី ២៩ ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមដីការបស់តុលាការ លោក សោម សម្បត្តិ ត្រូវបានកោះហៅឱ្យចូលបំភ្លឺ តាមពាក្យបណ្ដឹងរបស់មេធាវី ៣ រូប ពាក់ព័ន្ធនឹងបណ្ដឹងចំនួន ៥បទចោទ រួមមាន បទរំលោភលើទំនុកចិត្ត បទរំលោភលើភាពល្ងង់ខ្លៅ ឬភាពទន់ខ្សោយ បទញុះញង់ឱ្យប្រព្រឹត្តបទឧក្រិដ្ឋជាអាទិ៍ បទលួចអចលនវត្ថុអ្នកដទៃ ដែលមិនមែនជាកម្មសិទ្ធិរបស់ខ្លួន និងបទបំភាន់មន្ត្រីសុរិយោដីក្នុងការចុះបញ្ជី។

លោក សោម សម្បត្តិ ប្រាប់កម្ពុជាថ្មីនៅព្រឹកថ្ងៃទី ២៩ ខែកក្ដដា ២០២២នេះថា លោកកំពុងរកមេធាវីពិភាក្សាការចូលទៅឆ្លើយបំភ្លឺតាមដីកាកោះហៅរបស់តុលការនៅថ្ងៃទី ២ ខែសីហា ហើយសម្រេចថា ចូល ឬមិនចូលតាមដីកាគឺរង់ចាំការផ្ដល់យោបល់ពីមេធាវីរបស់លោក។

លោក សោម សម្បត្តិ ប្រាប់ថាការចោទប្រកាន់នេះលោកឃើញតែចំណងជើងនៅលើដីកាឯការចោទប្រកាន់ពិតប្រាកដគឺត្រូវឱ្យមេធាវីយកសំណុំរឿងនោះមកមើលសិន។

លោកបង្ហើបថា អ្នកដែលប្ដឹងរូបលោក ឈ្មោះ សាមិត្ត វិរៈ ឬហៅ ពេជ្រ ធឿន ដែលលោកធ្លាប់ជួយដើមបណ្ដឹងក្នុងការដោះស្រាយរឿងទំនាស់ដីធ្លីអំឡុងឆ្នាំ ២០១៧ ដែលកាលនោះលោកបានដោះស្រាយជាមួយមេធាវីឈ្មោះ សាមិត្ត វរៈ និងគូទំនាស់អស់ប្រាក់ជាង ៣០ ម៉ឺនដុល្លារបន្ថែម។

លោក សោម សម្បត្តិ បញ្ជាក់ថា «ខ្ញុំឆ្លើយដោយខ្លីថា វាអត់មានហេតុផលដែលខ្ញុំទៅធ្វើរឿងចឹងៗទាល់តែសោះ ហើយកុំថាដល់ខ្ញុំទោះបីអ្នកហ្នឹងល្បិចខូចប៉ិនប្រសប់យ៉ាងណាក៏អត់អាចទៅធ្វើរឿងហ្នឹងកើតដែរ»។

កម្ពុជាថ្មី មិនទាន់សុំការបញ្ជាក់ពីដើមបណ្ដឹងលោក សាមិត្ត វិរៈ បាននៅឡើយទេ៕

Related Topics:សហគ្រិន