ព័ត៌មានជាតិ

ប្រជាកសិករខេត្តកំពង់ឆ្នាំងធ្វើសែ្របាន ១១ ម៉ឺនហិកតាជិតសម្រេចតាមផែនការ

បានផុស

៧ ខែ មុន

នៅ

ថ្ងៃពុធ ៣ សីហា ២០២២

ដោយ

លោក ហិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំងនៅព្រឹកថ្ងៃទី ០៣ខែ សីហា ឆ្នាំ២០២២ បានឱ្យដឹងថា គិតត្រឹមថ្ងៃទី ៣ ដើមខែសីហានេះ ប្រជាកសិករនៅក្នុងខេត្តកំពង់ឆ្នាំងធ្វើស្រែវស្សាបានចំនួន ១១ ម៉ឺនហិកតាលើផែនការសរុប ១២ ម៉ឺនហិកតា ដែលយឺតជាងឆ្នាំមុន ១ ម៉ឺនហិកតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានមន្ទីរកសិកម្មរូបនេះបន្តថា ឆ្នាំនេះការធ្វើស្រែវស្សាយឺតដោយសារស្ថានភាពភ្លៀងធ្លាក់ពីដើមរដូវជាបន្តបន្ទាប់ជាប់ៗគ្នាធ្វើឱ្យដីស្រែនៅតាមតំបន់មួយចំនួនលិចទឹកយូរថ្ងៃ ដែលមិនអាចអោយប្រជាកសិករយើងភ្ជួររាស់សាបព្រោះបាន។

ដោយឡែកជំនន់ទឹកភ្លៀងនៅតំបន់អន្លង់ជ្រៃ ក្នុងស្រុកសាមគ្គីមានជ័យ និងជំនន់ទឹកភ្លៀងបាក់ទំនប់ចាក់ទឹមនៅក្នុងស្រុកទឹកផុសក្នុងពេលកន្លងមកនោះ គឺជំនន់ទឹកភ្លៀងបានជន់លិចស្រូវក្នុងស្រែអាមូលដ្ឋានមួយចំនួនរយៈពេលតែ ២, ៣ ថ្ងៃប៉ុណ្ណោះ មិនបង្កឲ្យស្រូវក្នុងស្រែរបស់ប្រជាពលរដ្ឋរងការខូចខាតនោះឡើយ។

ដំណាំកសិកម្ម និងដំណាំដាំនៅតាមគ្រួសារមួយចំនួនដែលបានដាំដុះនៅតាមមូលដ្ឋាន និងតំបន់ខ្ពង់រាបនោះ ក៏ពុំមានរងការខូចខាតដោយសារជំនន់ទឹកភ្លៀងនោះឡើយ។

ជាមួយគ្នានេះដែរលោកប្រធានមន្ទីរកសិកម្ម បានសំណូមពរដល់ប្រជាកសិករខេត្តទាំងអស់សូមតាមដាននូវការប្រកាសព័ត៌មានព្យាករណ៍អំពីអាកាសធាតុរបស់ក្រសួងធនធានទឹក និងឧតុនិយម ដោយសូមប្រុងប្រយ័ត្នទឹកជំនន់ ភ្លៀងផ្គរ និងនិងរន្ទះ ដែលអាចធ្វើឱ្យយើងបាត់បង់ ទ្រព្យសម្បត្តិ និងអាយុជីវិត៕