ព័ត៌មានជាតិ

ទិន្នន័យចុងក្រោយ កម្ពុជាកើនឡើងអ្នកប្រើប្រាស់បណ្តាញហ្វេសបុកនិង IG

បានផុស

៤ years មុន

នៅ

ថ្ងៃព្រហស្បតិ៍ ៤ សីហា ២០២២

ដោយ

នៅកម្ពុជាមានអ្នកប្រើប្រាស់បណ្តាញអ៊ីនធឺណិតច្រើនរាប់មិនអស់មិនថាហ្វេសប៉ុក ឬ Instagram។ យោងតាមទិន្នន័យរបស់ក្រសួងប្រៃសណីយ៍ និងទូរគមនាគមន៍គិតត្រឹមខែកក្កដា ឆ្នាំ ២០២២ នេះ កម្ពុជាមានចំនួនអ្នកប្រើប្រាស់បណ្តាញសង្គមហ្វេសប៉ុកប្រមាណ ១៣.២លាននាក់ និងអ្នកប្រើប្រាស់បណ្តាញ Instagram ២.០៧លាននាក់។

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានប្រសាសន៍ក្នុងសន្នីសីទបង្ហាញវឌ្ឍនៈភាពរយៈពេល ៥ ឆ្នាំរបស់ក្រសួងនៅព្រឹកមិញនេះថា ចំនួនអ្នកប្រើប្រាស់បណ្តាញ់អ៊ីនធឺណិតកាន់តែមានការកើនឡើងគួរឲ្យកត់សម្គាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំនួនអ្នកប្រើប្រាស់បណ្តាញសង្គមហ្វេសបុកក្នុងប្រទេសកម្ពុជាមានប្រមាណ ១៣.២ លាននាក់ និងអ្នកប្រើប្រាស់បណ្តាញ Instagram ២.០៧ លាននាក់។ លោកមើលឃើញកំណើនការប្រើប្រាស់បណ្តាញសង្គម ដោយសារការរីកចម្រើននៃបច្ចេកវិទ្យាលើការប្រើប្រាស់ទូរសព្ទ និងសេវាអ៊ីនធឺណិតរីកសាយកាន់តែទូលំទូលាយ។

តាមទិន្នន័យបង្ហាញថា អ្នកប្រើប្រាស់សេវាទូរស័ព្ទចល័តក្នុងប្រទេសកម្ពុជាមានចំនួន ១៩.៣៤៧.៨៩២ និងសេវាអ៊ីនធឺណិតចល័តមានចំនួន ១៧.៤៨៧.៩២២។ ជាមួយគ្នានេះ មានប្រតិបត្តករក្រុមហ៊ុនទូរស័ព្ទចល័តចំនួន ៥ និងក្រុមហ៊ុនផ្តល់សេវាអ៊ីនធឺណេត(ISP) ចំនួន ៣៨ កំពុងដំណើរការ។

ការប្រើប្រាស់ហ្វេសប៉ុក ឬ instagram អាចជួយឲ្យអ្នកប្រើប្រាស់ទទួលបានព័ត៌មាន និងបង្កើតការទំនាក់ទំនងគ្នាកាន់តែជិតស្និទ្ធិ។ ប៉ុន្តែកន្លងទៅក៏មានផលប៉ះពាល់ដោយសារការប្រើប្រាស់ខ្វះចំណេះដឹង និងមិនបានត្រឹមត្រូវ រួមទាំងករណីបោកប្រាស់កើតមានជាហូហែរ៕

អត្ថបទ៖ ឌឿនចាន់ ថារី

Related Topics:ក្រសួងប្រៃសណីយ៍ និងទូរគមនាគមន៍