ទឹកទន្លេសេកុង​ សេសាន ​និងទន្លេស្រែពក​ កំពុងហក់ឡើងអាច​ប្រឈមនឹងទឹកជំនន់ ដោយសារ​ឥទ្ធិពល​ព្យុះមូឡេន

ក្រសួងធនធានទឹក និងឧតុនិយម នៅថ្ងៃទី ៩ ខែសីហា ២០២២ នេះ បានប្រកាសថា ទឹកទន្លេមេគង្គ នឹងហក់ឡើងក្នុងរយៈពេល ៤ ទៅ ៥ ថ្ងៃខាងមុខ ជាពិសេសនៅភាគខាងលើ និងបណ្ដាខេត្តនៅក្នុងតំបន់ខ្ពង់រាប នៃប្រទេសកម្ពុជា មានខេត្តស្ទឹងត្រែង ទឹកអាចនឹងឡើងដល់ កម្ពស់ ៨,៥០ ម៉ែត្រ ខេត្តក្រចេះ ទឹកអាចនឹងឡើងដល់ ១៩ ម៉ែត្រ និងខេត្តកំពង់ចាម នឹងឡើងដល់ ១២ ម៉ែត្រ។

តាមការប្រកាសរបស់ក្រសួង ស្ថានភាពនេះ ដោយសារសារឥទ្ធិពលពីប្រព័ន្ធសម្ពាធទាប និងវិសម្ពាធដែលនឹងក្លាយទៅជាព្យុះទី៧ ឈ្មោះ មូឡេន (MULAN) ដែលបណ្ដាលឱ្យនៅតំបន់ផ្ទៃរងទឹកភ្លៀងទន្លេមេគង្គ ក្នុងប្រទេសថៃ ឡាវ វៀតណាម និងប្រទេសកម្ពុជា មានភ្លៀងធ្លាក់ច្រើន នៅក្នុងអាងទន្លេមេគង្គ។

ប្រភពដដែលបញ្ជាក់ថា ទឹកទន្លេដែលហក់ឡើងនៅពេលនេះ នៅមិនទាន់ដល់កម្រិតឱ្យមានការប្រុងប្រយ័ត្ននៅឡើយទេ តែទឹកអាចលិចតំបន់ទំនាបមួយចំនួន អមដងទន្លេ និងហូចូលទៅតាមបណ្ដាព្រែកមួយចំនួន។

ទឹកទន្លេនៅតំបន់ភាគឦសាន ទន្លេសេកុង​ ទន្លេសេសាន ​និងទន្លេស្រែពក​ កំពុងហក់ឡើងអាច​ប្រឈមនឹងទឹកជំនន់៕