មន្ទីរបរិស្ថាន ចុះបង្ក្រាបការលក់សាច់សត្វព្រៃនៅផ្សារសាមគ្គីក្រុងស្ទឹងត្រែង

កម្លាំងមន្ត្រីឧទ្យានុរក្សនៃមន្ទីរបរិស្ថានខេត្តស្ទឹងត្រែង បានចុះបង្រ្កាបបទល្មើសការលក់សាច់សត្វព្រៃបានមួយចំនួន ក្នុងផ្សារសាមគ្គីក្រុងស្ទឹងត្រែង កាលពីថ្ងៃទី១៨ និងទី១៩ ខែសីហា ឆ្នាំ២០២២កន្លងទៅ។

សម្រាប់ការចុះបង្ក្រាបបទល្មើសលក់សាច់ព្រៃក្នុងផ្សារសាមគ្គីក្រុងស្ទឹងត្រែងនេះ មន្ទីរបរិស្ថានខេត្តបង្រ្កាបបានសាច់ជ្រូកព្រៃចំនួន០៥គីឡូក្រាម សាច់ឈ្លូសចំនួន០១គីឡូក្រាម និងសត្វត្រកួនរស់ចំនួន០៣ក្បាល។ ចំពោះសាច់សត្វព្រៃដែលបង្ក្រាបបានត្រូវបានយកទៅដុតកម្ទេចចោលទាំងអស់ ចំណែកសត្វត្រកួន០៣ក្បាលត្រូវបានយកទៅលែងនៅឯស្រុកសេសាន ខេត្តស្ទឹងត្រែង។

យ៉ាងណាមិញ ការបង្ក្រាបបទល្មើសនេះ ក៏មានការចូលរួមពីព្រះរាជអាជ្ញារងអមសាលាដំបូងខេត្តស្ទឹងត្រែង ប្រធានមន្ទីរបរិស្ថានខេត្ត ក៏ដូចជាអភិបាលក្រុង និងមន្ត្រីឧទ្យានុរក្សខេត្តស្ទឹងត្រែងផងដែរ។

ទន្ទឹមជាមួយនឹងការបង្ក្រាបនូវបទល្មើសនេះ ក្រសួងបរិស្ថាន ក៏បានអំពាវនាវ និងសំណូមពរដល់ប្រជាពលរដ្ឋខ្មែរមួយចំនួនដែលតែងតែលបដាក់អន្ទាក់សត្វព្រៃ និងជួញដូរសាច់សត្វព្រៃគ្រប់ប្រភេទឱ្យបញ្ឈប់សកម្មភាពរបស់ខ្លួន ព្រមទាំងចូលរួមអភិរក្សសត្វព្រៃឡើងវិញ។ ចំពោះជនណាដែលប្រព្រឹត្តបទល្មើសនឹងត្រូវប្រឈមមុខច្បាប់៕

ដោយ៖ អុន ស្រីមាន