ទ័ពមួកខៀវ​កម្ពុជា​ហ្វឹកហ្វឺន​ត្រៀម​ចូលរួមជួយ​សង្គ្រោះ​ដល់ពលរដ្ឋ​ពេលទឹកជំនន់

​មជ្ឈមណ្ឌលជាតិរក្សាសន្តិភាព​បានហ្វឹកហ្វឺនដល់កងទ័ពមួកខៀវកម្ពុជាដើម្បីត្រៀម​ចូលរួម​ជួយ​អន្តរាគមន៍ដល់ប្រជាពលរដ្ឋនៅពេលជួបគ្រោះទឹកជំនន់។​

​នាយឧត្តមសេនីយ៍ ​សែម សុវណ្ណនី ​អគ្គនាយកមជ្ឈមណ្ឌលជាតិ​រក្សាសន្តិភាព​ បានមានប្រសាសន៍​នៅក្នុងពិធីហ្វឹកហ្វឺននៅចំណុចក្រោមស្ពានព្រែកក្តាមក្នុងភូមិព្រែកក្តាម ឃុំកោះចិន ស្រុកពញាឮ ខេត្តកណ្តាលកាលពីពេលថ្មីៗនេះថាអាកាសធាតុមានភ្លៀងធ្លាក់ជាប់ជាប្រចាំអាចធ្វើឱ្យមានស្ថានភាពទឹកជំនន់ជាយថាហេតុនៅតាមបណ្តាខេត្តមួយចំនួនជាបន្តបន្ទាប់។

ដូចនេះកងកម្លាំងទាំងអស់ត្រូវត្រៀមលក្ខណៈឱ្យបានគ្រប់គ្រាន់ដើម្បីចេញអន្តរាគមន៍ ២៤ម៉ោងលើ២៤ម៉ោង តាមបទបញ្ជារបស់រាជរដ្ឋាភិបាល និងការស្នើសុំពីអាជ្ញាធរមូលដ្ឋាន ដើម្បីចុះជួយសង្គ្រោះប្រជាពលរដ្ឋដែលរងគ្រោះដោយធម្មជាតិដោយយថាហេតុផ្សេងៗដែលកើតមានឡើងក្នុងភូមិសាស្រ្តនានា។

នាយឧត្តមសេនីយ៍ សែម សុវណ្ណនី បានបន្តទៀតថា នៅពេលនេះមជ្ឈមណ្ឌលបានត្រៀមកងកម្លាំង និងសម្ភាររួចរាល់ និងបានបើកហ្វឹកហ្វឺនប្រើប្រាស់សំភារៈយោធាទាំងនោះ ដើម្បីត្រៀមចូលរួមជួយសង្គ្រោះគ្រោះមហន្តរាយគ្រោះទឹកជំនន់នានា នៅថ្ងៃខាងមុខនេះ។

ជាងនេះទៀតនាយឧត្តមសេនីយ៍ សែម សុវណ្ណនី បានបន្ថែមទៀតថាការហ្វឹកហាត់ជំនាញសង្គ្រោះនាពេលនេះធ្វើឡើងស្របទៅនឹងកម្ពុជាត្រៀមលក្ខណៈក្នុងការបញ្ជូនកងកម្លាំងចូលរួមបេសកកម្មរបស់អង្គការសហប្រជាជាតិនាពេលខាងមុខនេះហើយក៏ជាការបន្ថែមនូវជំនាញសង្គ្រោះថ្មីមួយទៀតសម្រាប់កងយោធាមួកខៀវក្នុងការជួយសង្គ្រោះដល់មនុស្សជាតិទាំងក្នុងប្រទេសក៏ដូចជាក្នុងតំបន់បេសកកម្មរបស់អង្គការសហប្រជាជាតិ។

នាយឧត្តមសេនីយ៍ សែម សុវណ្ណនី បានបានបញក្ជាក់ថាពាក់ព័ន្ធនឹងការហ្វឹកហ្វឺនសង្គ្រោះមហន្តរាយក្នុងអង្គភាព​ទ័ពមួកខៀវនេះ គឺហ្វឹកហ្វឺនដើម្បីជួយសង្គ្រោះគ្រោះមហន្តរាយជូនប្រជាពលរដ្ឋនៅក្នុងប្រទេសផង និងហ្វឹកហ្វឺន​ដើម្បីត្រៀមប្រតិបត្តិការសង្គ្រោះគ្រោះមហន្តរាយនៅក្រៅប្រទេសផង៕

អត្ថបទ៖ សំអឿន