ពលរដ្ឋ​ស្នើឱ្យ​អាជ្ញាធរ​ជួយ​កែ​អក្ខរាវិរុទ្ធ​នៅ​លើ​ផ្លាក​តាម​ដងផ្លូវ​ល្បឿន​លឿន​ភ្នំពេញ​ទៅ​ព្រះសីហនុ​ផង

ប្រជាពលរដ្ឋ​បានស្នើ​ឱ្យ​អាជ្ញាធរ​ពិសេស​ក្រសួង​សាធារណការ​និង​ដឹក​ជញ្ជូន​ជួយ​កែ​អក្ខរាវិរុទ្ធ​ដែល​សរសេរ​នៅលើ​ផ្លាក​សំគាល់​នានា​តាម​ដងផ្លូវ​ល្បឿន​លឿន​ភ្នំពេញ​ទៅ​ព្រះសីហនុ​ផង​ព្រោះ​មាន​ខុស​អក្សរ​ច្រើនណាស់​។

ប្រជាពលរដ្ឋ​បាន​លើកឡើងថា​ ជាក់ស្តែង​ផ្លាក​សំគាល់​មួយ​នៅត្រង់ចំណុច​ច្រកចូល​ធំ​ផ្លូវជាតិ​លេខ​៤​បាន​សរសេរ​អក្សរ​ខុស​ដោយ​នៅលើ​ផ្លាក​នោះ​សរសេរថា​« ហាម​យានយន្ត​ដឹកទំនិញ​ធុន​ធំ​បត់​ឆេង»​។

ប្រជាពលរដ្ឋ​បាន​បន្តទៀត​ថា មិនមែន​ឆេង​ទេ​ពាក្យ​ត្រឹមត្រូវ​គឺ​« ហាម​យានយន្ត​ដឹកទំនិញ​ធុន​ធំ​បត់​ឆេ្វង​»​ ដែល​ការសរសេរ​បែបនេះ​បានធ្វើឱ្យ​ប៉ះពាល់​យ៉ាងខ្លាំង​ដល់​អក្សរសាស្ត្រ​ខ្មែរ​ដែល​ជា​ឌួង​ព្រឹង​របស់​ជាតិ​ដ៏​ផូរផង់​របស់​ខ្មែរ​យើង​ព្រោះថា​ផ្លូវ​ល្បឿន​លឿន​នេះ​នៅពេលដែល​ដាក់ឱ្យ​ដំណើរការ​នឹងមាន​ប្រជាពលរដ្ឋ​ខ្មែរ​និង​បរទេស​ជាច្រើន​ធ្វើដំណើរ​តាម​ដងផ្លូវ​នេះ​។​ដូចនេះ​សូមឱ្យ​អាជ្ញាធរ​ពាក់ព័ន្ធ​មេ​ត្តា​ជួយ​កែសម្រួល​ឱ្យបាន​ត្រឹមត្រូវ​ផង​។​

​ការលើកឡើង​របស់​ប្រជាពលរដ្ឋ​នេះ​ តប​ទៅតាម​ក្រសួង​សាធារណការ​និង​ដឹក​ជ​ញ្ជូន​ដែល​បាន​លើកឡើងថា​ ក្នុង​អន្តរ​ការដែល​ផ្លូវ ល្បឿន​លឿន​នៅ​មិនទាន់​ដាក់ឱ្យ​ប្រើប្រាស់​ជា​សាធារណៈ ក្រុមការងារ​គម្រោង កំពុង​ខិតខំ បង្ហើយ​ការងារ​សាងសង់​បំពាក់​បរិក្ខារ និង​ធ្វើការ​កែសម្រួល​លើ​រាល់​កំហុសឆ្គង ដែល​នៅ​សេសសល់ ជា​បន្តបន្ទាប់ ដើម្បី​ធានា​ពេល​ដំណើរការ ឱ្យមាន​ភាពរលូន និង​ស័ក្ដិសម​ជា​ផ្លូវ​ល្បឿន​លឿន​ដំបូងបង្អស់​របស់​កម្ពុ​ជា​។

ប្រសិនបើ​មាន​កំហុស​ឆ្គង​សូម​បងប្អូន​មេត្តា​រាយការណ៍ រាល់​កំហុស​ដែល​កើតមាន ក្នុង​ន័យ​ស្ថាបនា មកកាន់​ទំព័រ​ហ្វេ​ស​ប៊ុ​ក​ក្រសួង​សាធារណការ និង​ដឹកជញ្ជូន https://www.facebook.com/mpwt.gov.kh

ឬ​តាម កម្មវិធី Road Care Mobile App ដែល​អាច​ទាញយក​ពី App Store play store ឬ https://roadcare.mpwt.gov.kh​។​

​លោក​ទេសរដ្ឋមន្ត្រី​ស៊ុនចាន់ថុល រដ្ឋមន្ត្រីក្រសួង​សា​ធារ​ណការ​និង​ដឹក​ជ​ញ្ជូន​ធ្លាប់បាន​លើកឡើងថា​ផ្លូវ​ល្បឿន​លឿន​ពី​ភ្នំពេញ​ទៅ​ខេត្ត​ព្រះសីហនុ​នេះ​នឹង​ដាក់ឱ្យ​ដំណើរការ​នៅ​ខែតុលា​ឆ្នាំ​២០២២​ខាងមុខនេះ​ដោយ​មិន​យក​ថ្លៃ​សេវា​រយៈពេល​១​ខែ​ដើម្បីឱ្យ​ប្រជាពលរដ្ឋ​បាន​បើក​សាកល្បង​ធ្វើដំណើរ​នៅលើ​ដងផ្លូវ​នេះ​៕

ដោយ ៖ សំអឿន