ឥណ្ឌូណេស៊ី នឹង​ទទួលស្គាល់អ៊ីស្រាអែល ប្រសិនបើរដ្ឋប៉ាឡេស្ទីនត្រូវបានទទួលស្គាល់

ប្រធានាធិបតីឥណ្ឌូណេស៊ី លោក Prabowo Subianto បានប្រកាល​នៅថ្ងៃពុធទី ២៨ ឧសភានេះ ថា ប្រទេស​​ឥណ្ឌូណេស៊ី​មានឆន្ទៈក្នុងការបង្កើតទំនាក់ទំនងការទូតជាមួយអ៊ីស្រាអែល ប៉ុន្តែលុះត្រាតែអ៊ីស្រាអែលទទួលស្គាល់ជាផ្លូវការនូវរដ្ឋប៉ាឡេស្ទីនឯករាជ្យមួយ។ នេះបើយោងតាមការចេញផ្សាយរបស់សារព័ត៌មាន​ CNA។

ថ្លែងជាមួយប្រធានាធិបតីបារាំង Emmanuel Macron នៅទីក្រុងហ្សាកាតា លោក Prabowo បានបញ្ជាក់ជាថ្មីនូវការគាំទ្រដ៏យូរអង្វែងរបស់ឥណ្ឌូណេស៊ីសម្រាប់ដំណោះស្រាយរដ្ឋពីរ ដោយបញ្ជាក់ថា សន្តិភាពអាចសម្រេចបានតាម​រយៈ​ការទទួលស្គាល់គ្នាទៅវិញទៅមក និងការធានាសន្តិសុខសម្រាប់ភាគីទាំងពីរ។

លោក​បាន​បន្ត​ថា​៖«​ប្រទេស​ឥណ្ឌូណេស៊ី​បាន​បញ្ជាក់​ថា ​នៅ​ពេល​ដែល​អ៊ីស្រាអែល​ទទួល​ស្គាល់​ប៉ាឡេស្ទីន​ ឥណ្ឌូណេស៊ី​បាន​​ត្រៀម​​ខ្លួន​ជា​ស្រេច​ដើម្បី​ទទួល​ស្គាល់​អ៊ីស្រាអែល​និង​បើក​ទំនាក់ទំនង​ការទូត»។

ឥណ្ឌូណេស៊ី ដែលជាប្រទេសមានប្រជាជនមូស្លីមធំជាងគេលើពិភពលោក បច្ចុប្បន្នមិនមានទំនាក់ទំនងផ្លូវការជាមួយអ៊ីស្រាអែលទេ ហើយជាអ្នកគាំទ្រដ៏រឹងមាំនៃបុព្វហេតុប៉ាឡេស្ទីន។ នៅក្នុងសេចក្តីថ្លែងការណ៍រួមមួយ បារាំង និងឥណ្ឌូណេស៊ី ក៏បានគាំទ្រដល់សន្និសីទសន្តិភាពអន្តរជាតិនាពេលខាងមុខ សំដៅស្តារឡើងវិញនូវដំណោះស្រាយរដ្ឋទាំងពីរ និងការសម្រេចបាននូវការទទួលស្គាល់គ្នាទៅវិញទៅមក។

ការគាំទ្រសាធារណៈចំពោះប៉ាឡេស្ទីនគឺរីករាលដាលនៅក្នុងប្រទេសឥណ្ឌូណេស៊ី។ នៅឆ្នាំ ២០២៣ FIFA បានដកហូតសិទ្ធិធ្វើជាម្ចាស់ផ្ទះ U-20 World Cup របស់ឥណ្ឌូណេស៊ី បន្ទាប់ពីមានការប្រឆាំងនយោបាយចំពោះការចូលរួមរបស់អ៊ីស្រាអែល នាំឱ្យមានការតវ៉ា និងការបដិសេធជាផ្លូវការក្នុងការធ្វើជាម្ចាស់ផ្ទះ៕

អត្ថបទ៖ ប៊ុន សុភាព