កម្ពុជាដាក់ឱ្យប្រើ បច្ចេកវិទ្យាបញ្ញាសិប្បនិមិត្ត អាចកំណត់អត្តសញ្ញាណប្រភេទឈើ បានរហ័ស

កម្ពុជាបានប្រកាសដាក់ឱ្យប្រើប្រាស់បច្ចេកវិទ្យាបញ្ញាសប្បនិមិត្ត ឈ្មោះថា “WoodAI” ដើម្បីគាំទ្រដល់រោងចក្រកាត់ដេរ និងវិស័យវាយនភ័ណ្ឌ ក្នុងការកាត់បន្ថយសម្ពាធលើព្រៃឈើធម្មជាតិនៅកម្ពុជាតាមរយៈចង្វាក់ផលិតកម្មរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីសម្ពោធជាផ្លូវការ នៅរសៀលថ្ងៃទី ២៥ ខែសីហានេះ លោក នេត្រ ភក្ត្រា រដ្ឋលេខាធិការក្រសួងបរិស្ថានបាន មានប្រសាសន៍ថា កម្មវិធី WoodAI អាចកំណត់អត្តសញ្ញាណប្រភេទឈើបានរហ័ស និងអាចគាំទ្រដល់រោងចក្រកាត់ដេរបន្ថែមទៀតក្នុងការដោះស្រាយបញ្ហាកង្វះព័ត៌មានជុំវិញប្រភពជីវម៉ាសដែលពួកគេប្រើប្រាស់។ កម្មវិធីនេះអាចកំណត់អត្តសញ្ញាណប្រភេទឈើដោយប្រើទូរសព្ទដៃទំនើប និងកញ្ចក់ម៉ាក្រូ នៅច្រកចូលនៃរោងចក្រដើម្បីជួយរោងចក្រក្នុងការត្រួតពិនិត្យមើលដើម្បីធានាថា ប្រភេទឈើដែលពួកគេប្រើសម្រាប់ផលិតជាថាមពលក្នុងខ្សែសង្វាក់ផលិតកម្ម អនុលោមតាមគោលការណ៍របស់ក្រុមហ៊ុន H&M Group ពោលគឺឈើដែលបានមកពីចម្ការឈើដាំ។

លោកបានបន្តថា ក្រុមហ៊ុន H&M Group មានរោងចក្រជាសមាជិកប្រមាណ ៣០ ក្រុមហ៊ុននៅកម្ពុជាបានដាក់ឱ្យប្រើប្រាស់ប្រមាណ ២ ខែមកហើយនូវបច្ចេកវិទ្យានេះ និងអនុញ្ញាតប្រើប្រាស់ឈើដាំប្រមាណ ១០ ប្រភេទជាប្រភពថាមពលរបស់ខ្លួនរួមមាន៖ ដើមអាកាស្យា ដើមស្វាយចន្ទី ដើមអំពិល ដើមកៅស៊ូ ដើមច្រេស ស្វាយ ត្រសេក អង្កាំជាដើម។

លោក នេត្រ ភក្ត្រា លើកឡើងថា ក្រសួងលើកទឹកចិត្តដល់ក្រុមហ៊ុនផលិតសម្លៀកបំពាក់ដទៃៗ​ទៀតអនុវត្តតាមគំរូនេះ ​និងចូលរួមក្នុងកិច្ចការពារ ​និងថែរក្សាធនធានព្រៃឈើធម្មជាតិ​ និងសត្វព្រៃ ដើម្បីជាប្រយោជន៍យូរអង្វែងសម្រាប់មនុស្ស និងធម្មជាតិ។

ចំណែកលោក Christer Horn af Aminne នាយកក្រុមហ៊ុន H&M Group ប្រចាំប្រទេសកម្ពុជា បានគាំទ្រ​ចំពោះ​ការសាកល្បង​អនុវត្តបច្ចេកវិទ្យាថ្មីនេះនៅកម្ពុជា និង​ប្តេជ្ញា​ស្វែងរកនូវវិធីសាស្ត្រថ្មីៗដើម្បីគាំទ្រដល់​កិច្ចការ​របស់ខ្លួនជាមួយបណ្តាក្រុមអ្នក​ផ្គត់ផ្គង់ ​ដែលអាចជួយកាត់បន្ថយហេតុ​ប៉ះពាល់​អវិជ្ជមាន​លើ​ព្រៃឈើ​ធម្មជាតិរបស់កម្ពុជា​៕

អទ្ថបទ៖ សំអឿន