ជំនន់ទឹកអូរ ធ្វើឲ្យដំណាំប្រជាពលរដ្ឋរងការខូចខាតធ្ងន់ធ្ងរ បន្ទាប់ពីធ្លាក់ភ្លៀងមួយមេកាលពីព្រឹកមិញ

សេចក្តីរាយការណ៍ពីប្រជាពលរដ្ឋដែលរស់នៅ និងអាស្រ័យផលតាមដងអូរ ស្ថិតក្នុងភូមិក្បាលព្រលាន និងភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន បានឲ្យដឹងថា ការធ្លាក់ភ្លៀងតាំងពីព្រឹករហូតមកដល់រសៀលម៉ោង៣និង០០នាទីថ្ងៃទី៣១ ខែសីហា ឆ្នាំ២០២២នេះ បានធ្វើឲ្យដំណាំហូបផ្លែ និងដំណាំបន្ទាប់បន្សំមួយចំនួនដែលពួកគាត់បានដាំដុះនៅក្នុងចំការ ក្បែរដងអូរ បានរងការខូចខាតធ្ងន់ធ្ងរ ព្រោះតែជំនន់ទឹកអូរ ហូរបក់បោកខ្លាំង។

បើតាមការឲ្យដឹងពីបុរសម្នាក់ឈ្មោះ នួន ប៊ុនថាច អាយុជាង៤០ឆ្នាំ បានបញ្ជាក់ថា គាត់មានដីជិតមួយហិកតា ដើម្បីដាំដំណាំហូបផ្លែ មានទុរេន ខ្នុរ ចេក ជាដើម ប៉ុន្តែនៅថ្ងៃនេះ ដំណាំរបស់គាត់ បានខូចខាតខ្លះៗ ដោយសារតែទឹកហូរកាត់ ព្រោះតែជំនន់ទឹកអូរហូរមិនទាន់បានជាច្រាលមកហូរកាត់បណ្តាលឲ្យដំណាំត្រូវរងការខូខខាតតែម្តង។

គាត់បានបន្តទៀតថា ទុរេន ដែលគាត់ដាំវាមានអាយុកាលមួយឆ្នាំមកហើយ ប៉ុន្តែពេលមានភ្លៀងធ្លាក់ម្តងៗ មិនដែលមានបញ្ហាដូចថ្ងៃនេះទេ មិនថាតែដំណាំរបស់គាត់ទេ ដែលរងការខូចខាត ដំណាំបងប្អូន ដែលនៅជាប់ៗគ្នា ជាមួយដំណាំគាត់ ក៏រងការខូចខាត់ធ្ងន់ធ្ងរដែរ ព្រោះតែមានភ្លៀងធ្លាក់មួយមេធំនេះ ។ គាត់មានការសោកស្តាយដែរ ប៉ុន្តែធ្វើម្តេចបើវាជាគ្រោះថ្នាក់ធម្មជាតិដូច្នោះ បន្ទាប់ពីទឹកស្រកទៅវិញ រូបគាត់និងគ្រួសារ ដើរតម្រង់ដើមទុរេនឡើងវិញផងដែរ។

សូមបញ្ជាក់ថា ក្រសួងធនធានទឹក និងឧតុនិយម នៅថ្ងៃទី៣០ ខែសីហា ឆ្នាំ២០២២នេះ បានចេញសេចក្តីជូនដំណឹង ស្តីពីស្ថានភាពធាតុអាកាសនៅកម្ពុជា ចាប់ពីថ្ងៃទី៣១ ខែសីហា ដល់ ថ្ងៃទី៦ ខែកញ្ញា ឆ្នាំ២០២២។ ក្រសួងធនធានទឹក ក៏បានបញ្ជាក់ថា ព្រះរាជាណាចក្រកម្ពុជាទទួលឥទ្ធិពលខ្សោយ ពីជ្រលងសម្ពាធទាបឥណ្ឌា និងខ្យល់មូសុងនិរតីបក់ ក្នុងកម្រិតពីខ្សោយទៅមធ្យម ។ នៅចន្លោះថ្ងៃទី៣-៥ ខែកញ្ញា កម្ពុជាទទួលរងឥទ្ធិពល ពីជ្រលងនៃប្រព័ន្ធសម្ពាធទាប ITCZ ដែលអូសបន្លាយលើភាគខាងជើងថៃ ឡាវ និងវៀតណាម។ ស្ថានភាពបែបនេះនឹងធ្វើឲ្យ៖

១៖ បណ្តាខេត្តនៅតំបន់វាលទំនាបកណ្តាល សីតុណ្ហភាពអប្បបរមា មានពី ២៣-២៦ °C សីតុណ្ណភាពអតិបរមា មានពី ៣២-៣៥ °C នឹងអាចមានភ្លៀងក្នុងកម្រិតពីខ្សោយទៅមធ្យម ជាមួយគ្នានោះផ្នែកខ្លះនៃបណ្តាខេត្ត នៅទំនាបភាគកណ្ដាល និងភាគពាយ័ព្យអាចមានភ្លៀង ដោយអន្លើរក្នុងកម្រិតបង្គួរ លាយឡំទៅដោយផ្គរ រន្ទះ ។

២៖ បណ្តាខេត្តជាប់ជួរភ្នំដងរែក និងខ្ពង់រាបឦសាន សីតុណ្ហភាពអប្បបរមា មានពី ២២-២៥ °C សីតុណ្ហភាពអតិបរមា មានពី ៣២-៣៥ °C នឹងអាចមានភ្លៀងក្នុងកម្រិតពីតិចទៅមធ្យម ជាមួយគ្នានោះផ្នែកខ្លះអាចមានភ្លៀង ដោយអន្លើរក្នុងកម្រិតបង្គួរលាយឡំ ទៅដោយផ្គរ រន្ទះ ។

៣៖ តំបន់មាត់សមុទ្រ សីតុណ្ហភាពអប្បបរមា មានពី ២៣-២៥ °C សីតុណ្ណភាពអតិបរមា មានពី ៣១-៣៣ °C នឹងអាចមានភ្លៀងក្នុងកម្រិតពីខ្សោយទៅមធ្យម លាយឡំទៅដោយផ្គរ រន្ទះផងដែរ៕

អត្ថបទ៖ សេង សុវណ្ណារិទ្ធ