ឯកឧត្តម បណ្ឌិត ហ៊ុន ម៉ាណែត៖ សិស្សានុ​សិស្សត្រូវបណ្តុះសីលធម៌ គុណធម៌ និងតម្លៃក្នុងខ្លួន មុននឹងចេញពីវិទ្យាល័យ​ម្ចាស់ការឯករាជ្យ ចូលក្នុងសង្គម

ឯកឧត្តម បណ្ឌិត ហ៊ុន ម៉ាណែត បានមានប្រសាសន៍ថា ប៉ុន្មានថ្ងៃនេះមានការចាប់អារម្មណ៍ លើករណីមួយពាក់​ព័ន្ធនឹងសកម្មភាពរបស់សិស្សវិទ្យាល័យសេរីភាពក្រុងតាខ្មៅ ដែលក្មួយៗសិស្សានុ​សិស្សមួយចំនួនបាននាំគ្នាធ្វើ​សកម្មភាព (សរសេរ ឬគូសលើអាវគ្នាទៅវិញទៅមក) ដែលគណ:គ្រប់គ្រងសាលាយល់ថា បានធ្វើអោយខូច​សណ្តាប់ធ្នាប់នៅក្នុងសាលា រហូតដល់មានប្រតិកម្មក្តៅមួយពីលោកនាយកសាលាទៅលើក្មួយស្រីៗ ជាសិស្សមួយចំនួនតូច។ ហេតុការណ៍នេះ ត្រូវបានគេថតយកមកធ្វើការចែកចាយតាមបណ្តាញសង្គម ដោយមានការជជែកផុសផុល និងមានអ្នកបញ្ចេញនូវទស្សនៈខុសៗគ្នាផងដែរ។

ឯកឧត្តម បណ្ឌិត បានថ្លែងដូច្នេះថា« តាមដែលខ្ញុំបានស្តាប់ផ្ទាល់ និងដឹងផ្ទាល់តាមរយៈការចុះតាមមូលដ្ឋានមួយ​ចំនួននាពេលកន្លងមក បញ្ហាមួយដែលជាកង្វល់របស់មាតាបីតា (ក៏ដូចជាលោកគ្រូអ្នកគ្រូ)ជាច្រើន នៅក្នុងពេល​បច្ចុប្បន្នចំពោះអនាគតកូនចៅរបស់ខ្លួន នៅក្នុងខណៈពេលដែលប្រទេសជាតិមានសុខសន្តិភាព និងការអភិវឌ្ឍ ដែលបង្កលក្ខណៈឱ្យជីវភាពរស់នៅ និងសិទ្ធិសេរីភាពរបស់ប្រជាពលរដ្ឋមានការកើនឡើងនោះ គឺការជ្រើសរើសផ្លូវជីវិត​របស់កូនចៅតាមរយៈសកម្មភាពរបស់ពួកគេនាពេលបច្ចុប្បន្ន(ពិសេសវ័យសិក្សាថ្នាក់វិទ្យាល័យចុះក្រោម) ដែលជាកត្តាកំណត់មួយយ៉ាងសំខាន់សម្រាប់អនាគតរបស់ពួកគេ»។

ឯកឧត្តម បណ្ឌិត បានគូសបញ្ជាកថា ការអប់រំ គួរមិនត្រឹមតែផ្តោតទៅលើចំណេះដឹងទូទៅទេ ប៉ុន្តែត្រូវគិតទៅដល់វិន័យ សុជីវធម៌ សីលធម៌ និងគុណធម៌ផងដែរ។

ឯកឧត្តមបណ្ឌិត ហ៊ុន ម៉ាណែត មានប្រសាសន៍បែបនេះ តាមរយៈផេកផ្លូវការ នៅព្រឹថ្ងៃទី ១៨ ខែ កញ្ញា ឆ្នាំ ២០២២៕