សម្តេចតេជោ អនុញ្ញាតឲ្យរៀបអាពាហ៍ពិពាហ៍ តែត្រូវអនុវត្តវិធានសុខាភិបាល

នៅព្រឹកថ្ងៃអង្គារ ទី២៩ ខែធ្នូ ឆ្នាំ២០២០នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍ថា ពិធីរៀបអាពាហ៍ពិពាហ៍ ការជួបប្រជុំ នានា អាចធ្វើបាន តែត្រូវអនុវត្តនូវវិធានរបស់ក្រសួងសុខាភិបាល ដើម្បីបង្ការ និងទប់ស្កាត់ កុំឱ្យមានជំងឺឆ្លងកូវីដ-១៩។

សម្តេច នាយករដ្ឋមន្ត្រី មានប្រសាសន៍លើកឡើងថា ការជួបជុំសប្បាយរីករាយជាមួយក្រុមគ្រួសារ និងមិត្តភ័ក្តិ អាចធ្វើបានជាធម្មតា តែត្រូវអនុវត្តនូវស្តង់ដារសុវត្ថិភាព ដោយរក្សាគម្លាត ១.៥ម៉ែត្រ ពីការអង្គុយតុ មានគ្នា១០នាក់ បន្ថយមកនៅត្រឹម៥នាក់។

នាពេលថ្មីៗនេះ អាជ្ញាធរបានហាមឃាត់ មិនអនុញ្ញាតឱ្យមានការជួបជុំគ្នាលើសពីម្ភៃនាក់ឡើយ ដោយហេតុថា កម្ពុជា មានករណីជំងឺកូវីដ-១៩ បានឆ្លងក្នុងសហគមន៍។

យ៉ាងណាក៏ដោយ ក្រោយការប្រឹងប្រែងយ៉ាងខ្លាំងរួចមក កម្ពុជា ពុំរកឃើញករណីឆ្លងចូលសហគមន៍ទៀតឡើយ ហើយសម្តេចតេជោ ហ៊ុន សែន បានប្រកាសបិទបញ្ចប់ព្រឹត្តិការណ៍ ២៨ វិច្ឆិកា តែម្ដង៕