ចាប់ខ្លួន​បុរស​ដែល​ប៉ុនប៉ង​ឃាតកម្ម​លើ​គូរ​ដណ្ដឹង ​

បុរស​ម្នាក់ ត្រូវ​បាន​កម្លាំង​នគរបាល​ខេត្ត​កណ្ដាល ស្រាវជ្រាវ​ឃាត់ខ្លួន កាលពីថ្ងៃទី២៩ ខែធ្នូ ឆ្នាំ២០២០ បន្ទាប់ពីចាក់នារីដែលជាគូរ​ដណ្ដឹង​ ដោយកូនកាំបិតចុងស្រួច រងរបួសជ្រៅត្រង់ក្រោម​ឆ្អឹងជំនី​ខាងស្តាំ​ហើយ​រត់​គេចខ្លួន។

លោក​ឧត្ដមសេនីយ៍ត្រី​ រឿន ណារ៉ា ស្នងការរង នគរបាល​ខេត្ត​កណ្តាល បានឲ្យដឹងថា ជនសង្ស័យឈ្មោះ រ៉ា បូរី ហៅ​ទុយ ភេទប្រុស ជនជាតិខ្មែរ អាយុ២៣ឆ្នាំ ទីលំនៅភូមិសង្កាត់កើតហេតុ មុខរបរ លក់ស្រា​ក្រ​ឡុក ​។ចំណែក​ជនរងគ្រោះ ឈ្មោះ កែវ មួយគីម ភេទស្រី អាយុ១៩ឆ្នាំ មានទីលំនៅភូមិសង្កាត់ដើមមៀន ក្រុងតាខ្មៅ។

សូម​បញ្ជាក់​ថា កាលពីថ្ងៃទី០៨ ខែវិច្ឆិកាឆ្នាំ២០២០ វេលាម៉ោង១១.៣០នាទី នៅចំណុច តាម​ផ្លូវ​ភូមិស្ទឹង​ជ្រៅ​សង្កាត់​ដើម​មៀន ក្រុង​តាខ្មៅ ​បុរស​សង្ស័យ បាន​យក​កាំបិត​ចុង​ស្រួច ប្រវែង២២,៥សង់ទី​ម៉ែត្រ​ ធ្វើ​សកម្មភាពចាក់លើជនរងគ្រោះបណ្ដាលឱ្យមានរបួសស្នាមត្រង់ក្រោមឆ្អឹងជំនីខាងស្តាំ មានស្នាមដាច់​ចូល​ជ្រៅ។

​​​ជនសង្ស័យបានឆ្លើយសារភាពថា ​មូលហេតុដែលយក កូនកាំបិតចាក់ប៉ុនប៉ងសម្លាប់អតីតគូរដណ្តឹង ដោយសារភ្លើង ប្រចណ្ឌ និងខឹងគូរ​ដណ្ដឹង​ សុំ​ផ្ដាច់​ពាក្យ​ ។ បច្ចុប្បន្ន ជនសង្ស័យត្រូវបានឃាត់ខ្លួន ​​ដើម្បីបន្តចាត់ការតាមនីតិវិធី៕