អាជ្ញាធរស្រុកទឹកផុស ផ្អាកការធ្វើដំណើរទៅតំបន់ទេសចរណ៍ធម្មជាតិ ទឹកធ្លាក់ថ្មក្រាល ខណៈទឹកជំនន់កំពុងឡើងខ្ពស់

រដ្ឋបាលស្រុកទឹកផុស ខេត្តកំពង់ឆ្នាំង បានចេញសេចក្ដីជូនដំណឹងពីផ្អាកបណ្ដោះអាសន្នការធ្វើដំណើរកំសាន្តទៅកាន់តំបន់ទេសចរណ៍ធម្មជាតិ ទឹកធ្លាក់ថ្មក្រាល ស្ថិតនៅភូមិកោះខ្ទម្ភ ឃុំជៀប ស្រុកទឹកផុស ខណៈប៉ុន្មានថ្ងៃនេះមានភ្លៀងធ្លាក់យ៉ាងខ្លាំងធ្វើឱ្យទឹកជំនន់ឡើងខ្ពស់ខ្លាំង។

យោងតាមលិខិតជូនដំណឹងរបស់រដ្ឋបាលស្រុកទឹកផុស ដែលចេញកាលពីថ្ងៃទី២៦ ខែកញ្ញា​ បានបញ្ជាក់ថា ក្នុងរយៈពេលប៉ុន្មានថ្ងៃនេះមានភ្លៀងធ្លាក់យ៉ាងខ្លាំងធ្វើឱ្យទឹកជំនន់ឡើងខ្ពស់ខ្លាំងនៅតំបន់ទេសចរណ៍ធម្មជាតិទឹកធ្លាក់ថ្មក្រាល និងធ្វើឱ្យមានការខូចខាតនូវហេដ្ឋារចនាសម្ព័ន្ធជាច្រើនដូចជា ផ្លូវ ទំនប់ ប្រឡាយ។ល។

ក្នុងសេចក្ដីជូនដំណឹងបន្ថែមថា ដើម្បីរក្សាបាននូវស្ថេរភាព សុវត្ថិភាពដល់អាយុជីវិតរបស់បងប្អូនប្រជាពលរដ្ឋ និងភ្ញៀវទេសចរដែលមានបំណងមកលេងកំសាន្តនៅតំបន់ទេសចរណ៍ធម្មជាតិ ទឹកធ្លាក់ថ្មក្រាល រដ្ឋបាលស្រុកទឹកផុស សូមធ្វើការផ្អាកជាបណ្តោះអាសន្នដំណើរកំសាន្តនូវតំបន់ទេសចរណ៍ធម្មជាតិ ទឹកធ្លាក់ថ្មក្រាល ចាប់ពីថ្ងៃទី២៦ ខែកញ្ញា ឆ្នាំ២០២២ តទៅ រហូតដល់ជូនដំណឹងសារជាថ្មីឡើងវិញ៕