រដ្ឋបាលក្រុងកំពង់ឆ្នាំង​ហាមរថយន្តគ្រប់ប្រភេទ​ធ្វើដំណើរ​លើផ្លូវគ្រោះក្រហម​នៅភូមិដំណាក់ពពួល

រដ្ឋបាលក្រុងកំពង់ឆ្នាំង​បានប្រកាសរដ្ឋបាលក្រុងកំពង់ឆ្នាំង​ហាមរថយន្តគ្រប់ប្រភេទ​ធ្វើដំណើរ​លើផ្លូវគ្រោះក្រហម​នៅភូមិដំណាក់ពពួលស្ថិតនៅក្នុងភូមិដំណាក់ពពួល សង្កាត់កំពង់ឆ្នាំង ក្រុងកំពង់ឆ្នាំងដោយសារតែកម្រិតទឹកទន្លេបានហក់ឡើងដល់កម្រិតប្រកាសអាសន្ន។

​រដ្ឋបាលក្រុងកំពង់ឆ្នាំងបញ្ជាក់ថា ​ដើម្បីថែរក្សាផ្លូវលំគ្រោះក្រហមដែលមានប្រវែង ២ ៧០០ម៉ែត្រនេះ ឲ្យបានគង់វង្សយូរអ ង្វែងកុំឲ្យបាក់ស្រុត និងកុំឱ្យមានគ្រោះថ្នាក់ជាយថាហេតុនោះ រដ្ឋ​បាលក្រុង​កំពង់ឆ្នាំង សូមផ្អាកជាបណ្ដោះអាសន្នទាំង​ស្រុង​ចំពោះការ​ធ្វើចរាចរណ៍តាមរថយន្តគ្រប់ប្រភេទ​ចូលទៅកាន់វត្តទួលអំពិល រហូតដល់មានសេចក្តីជូនដំណឹងជាថ្មី។

​សូមបញ្ជាក់ថា ​នៅពេលទឹកទន្លេហក់ឡើងពាបៗស្មើនឹងផ្លូវគ្រោះក្រ​ហមទៅវត្តទួលអំពិលហើយ​នោះខ្យល់នឹងរលកបានវាយខ្ទប់និងផ្លូវគ្រោះក្រហមនេះ បណ្ដាលឱ្យផ្លូវគ្រោះក្រហម​នេះមួយចំនួន​បានរលុះបាក់ខ្លះៗផងដែរ។

ដោយឡែកសភាពផ្លូវនេះក៏ទន់ជ្រាយដែរប្រសិនបើមានរថយន្តបើក​ពីលើផ្លូវនេះនឹងអាចរលុះ​បានត្រជាក់​ជាមិនខាន។ ​ដូចនេះហើយទើបរដ្ឋបាលក្រុងកំពង់ឆ្នាំងចេញសេចក្តីជូនដំណឹងផ្អាកការបើកបររថយន្តគ្រប់​ប្រភេទ​ចូលវត្ត​ទួលអំពិលជាបណ្ដោះអាសន្នសិន៕

អត្ថបទ៖ ឈៀងថារិទ្ធ