ព័ត៌មានជាតិ
ព្រះសង្ឃ និងអាជ្ញាធរសង្កាត់ចំនួន ៣ នៃក្រុងសៀមរាប រៀបចំប្រណាំងទូកលក្ខណៈប្រពៃណី
ព្រះចៅអធិការវត្តអារញ្ញសាគរ សហការជាមួយអាជ្ញាធរសង្កាត់សៀមរាប សង្កាត់សាលាកំរើក សង្កាត់ជ្រាវ នៃក្រុងសៀមរាប និងសហភាពសហព័ន្ធយុវជនកម្ពុជាក្រុងសៀមរាប ខេត្តសៀមរាប មូលមតិគ្នាជាឯកច្ឆន្ទ ផ្ដួចផ្ដើមរៀបចំពិធីប្រណាំងទូក និងបណ្ដែតប្រទីប។
ក្នុងនោះ ដើម្បីអបអរសាទរថ្ងៃចេញព្រះវស្សា និងរក្សាប្រពៃណីទំនៀមទម្លាប់របស់អ្នកស្រុកភូមិដែលមានតាំងពីយូរលង់ណាស់មកហើយ ក្រោមការចូលរួមឧបត្ថម្ភគាំទ្រពីព្រះសង្ឃ ថ្នាក់ដឹកនាំអាជ្ញាធរមូលដ្ឋាន ក្រុមការងារយុវជន ស.ស.យ.ក ខេត្ត-ក្រុង អាជីវករ និងសប្បុរសជននានា បានបរិច្ចាគធនធានផ្ទាល់ខ្លួនទៅតាមសទ្ធាជ្រះថ្លានូវថវិកា ភេសជ្ជៈ សម្រាប់ជួយទ្រទ្រង់ឲ្យកម្មវិធីដំណើរការទៅយ៉ាងរលូន។
ពិធីប្រណាំងទូកលក្ខណៈប្រពៃណីនេះមានរយៈពេល ២ ថ្ងៃ គឺ កាលពីរសៀលថ្ងៃទី ១១ និងរសៀលថ្ងៃទី ១២ ខែតុលា ឆ្នាំ ២០២២ ចំណុចផ្លូវតាអាំ ភូមិចុងស្រុក សង្កាត់សៀមរាប ជាភូមិសាស្ត្រជាប់បឹងទន្លេសាប ដែលកីឡាករសុទ្ធតែជាបងប្អូនក្នុងមូលដ្ឋាន នៃបណ្ដាសង្កាត់និមួយៗ មានទូកសរុបចំនួន ៣០ ទូក ក្នុងនោះទូក ង ចំណុះ ២២ នាក់ ចំនួន ៤ ទូក ជាទូកកិត្តិយស និង ទូកប្រណាំងដណ្ដើមជ័យលាភី មាន ២៦ ទូក ដែលទូកនិមួយៗ មានចំណុះ ៦ នាក់។ ចំពោះចំណាត់ថ្នាក់ជ័យលាភី នឹងជ្រើសយកពីលេខ ១ ដល់លេខ ៤ នឹងទទួលបានប្រាក់ឧបត្ថម្ភពីគណៈកម្មការរៀបចំពិធីក្នុងពេលប្រកាសលទ្ធផល។
មានប្រសាសន៍ក្នុងឱកាសបើកការប្រណាំងទូកនេះ លោក ម៉ៃ សាមេត ចៅសង្កាត់សៀមរាប បង្ហាញនូវក្តីសោមនស្សដែលបានសហការរៀបចំកម្មវិធីនេះឡើង ព្រោះអស់រយៈពេលជាង ២ ឆ្នាំមកហើយ ដែលប្រជាពលរដ្ឋមិនបានប្រារព្ធពិធីជួបជុំ ឬពិធីបុណ្យនានានោះទេ។ ព្រោះដោយសារការឆ្លងរាលដាលជាសកល នៃជំងឺកូវីដ-១៩ និងការអនុវត្តតាមការណែនាំ និងវិធានការនានា ទប់ស្កាត់ការឆ្លងជំងឺនេះ។
លោកបន្តថា ដោយសារមានការយកចិត្តទុកដាក់ និងលះបង់ខ្ពស់របស់ប្រមុខថ្នាក់ដឹកនាំរាជរដ្ឋាភិបាល ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានស្វះស្វែងរកវ៉ាក់សាំងចាក់ជូនបងប្អូនគ្រប់ទីកន្លែង ដោយឥតគិតថ្លៃ តាំងពីដូសជំរុញ រហូតដូសមូលដ្ឋាន ទើបការឆ្លង នៃជំងឺដ៏កាចសាហាវនេះបានថយចុះជាបន្តបន្ទាប់ និងសម្រេចបើកប្រទេសពេញលេញឡើងវិញ តាមរយៈការរៀនរស់តាមបែបគន្លងថ្មីជាមួយនឹងកូវីដ-១៩ ដូចនេះ ទើបយើងទាំងអស់គ្នា មានឱកាសជួបជុំ និងប្រារព្ធពិធីផ្សេងៗ ឡើងវិញ ក្រោមម្លប់សុខសន្តិភាពតែមួយ។
លោក ម៉ៃ សាមេត បន្តទៀតថា ព្រះរាជពិធីអុំទូកនេះធ្វើឡើងដើម្បីដាស់តឿនឲ្យយើងទាំងអស់គ្នាដឹងគុណដល់ព្រះគង្គា និងព្រះធរណី។ រំលឹកមនុស្សចេះថែរក្សាការពារទឹកដីឲ្យបានគង់វង្ស និងចេះស្រឡាញ់គោរពព្រះធរណី គង្គា ដោយចូលរួមសម្អាតបរិស្ថានឲ្យបានស្អាត៕
អត្ថបទ ៖ គឿន វេត
-
ព័ត៌មានជាតិ៥ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៣ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានអន្ដរជាតិ១ សប្តាហ៍ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៣ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ព័ត៌មានជាតិ៣ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ជីវិតកម្សាន្ដ៧ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សេដ្ឋកិច្ច៤ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៣ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ