ក្រសួងអប់រំ អំពាវនាវ សិស្សានុសិស្ស ភាគីពាក់ព័ន្ធ បន្តបង្កើនការប្រុងប្រយ័ត្ន នារដូវវស្សា

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានឱ្យ “កម្ពុជាថ្មី” ដឹងនៅថ្ងៃទី១៧ ខែតុលា ឆ្នាំ២០២២នេះថា ក្រសួងអប់រំ យុវជន និងកីឡា សូមចូលរួមរំលែកទុក្ខដ៏ក្រៀមក្រំបំផុតជាមួយគ្រួសារសព។ ក្រសួងអប់រំ យុវជន និងកីឡា​ សូមជូនពរសិស្សានុសិស្ស និងជនរងគ្រោះក្នុងឧបទ្ទវហេតុ ឆាប់បានជាធូរស្បើយ។ សូមសិស្សានុសិស្ស និងគ្រប់ភាគីពាក់ព័ន្ធបន្តថែរក្សាសុខភាពទាំងអស់គ្នា។

ក្រសួងអប់រំ យុវជន និងកីឡា នឹងចេញសេចក្តីណែនាំមួយ ស្តីពីការលើកកម្ពស់សុខសុវត្ថិភាពរបស់សិស្ស ផ្តោតលើការធ្វើដំណើរក្នុងរដូវវស្សា។ ទន្ទឹមនេះ ក្រសួងអប់រំ យុវជន និងកីឡា សូមអំពាវនាវដល់សិស្សានុសិស្ស លោកគ្រូ អ្នកគ្រូ បុគ្គលិកអប់រំ មាតាបិតា និងគ្រប់ភាគីពាក់ព័ន្ធទាំងអស់ មេត្តាបង្កើនការប្រុងប្រយ័ត្ននារដូវវស្សានេះ ក្នុងការបន្តថែទាំសុខភាព និងរក្សាសុវត្ថិភាព។

អ្នកនាំពាក្យក្រសួងអប់រំ យុវជន និងកីឡា សូមមាតាបិតាបន្តប្រុងប្រយ័ត្នខ្ពស់ ដើម្បីចូលរួមការពារមិនឱ្យកូនលង់ទឹក។ សូមគ្រប់ភាគីពាក់ព័ន្ធបន្តអនុវត្តវិធានការសុវត្ថិភាពសុខភាពទាំងអស់គ្នាឱ្យចៀសផុតពីការឆ្លងរោគា និងគ្រោះថ្នាក់នានា។ សិស្សានុសិស្សទាំងអស់ត្រូវបន្តខិតខំរៀនសូត្រក្នុងថ្នាក់ និងរៀនខ្លួនឯងបន្ថែម ព្រមទាំងស្តាប់ដំបូន្មានពីសំណាក់មាតាបិតា។ ក្រៅពីការបន្តរៀនសូត្រ សិស្សានុសិស្សទាំងអស់ត្រូវបន្តអនុវត្តវិធានការសុខាភិបាល គោរពច្បាប់ចរាចរណ៍ និងចៀសវាងការប្រើប្រាស់ថ្នាំញៀនខុសច្បាប់ និងបារីគ្រប់ប្រភេទ ដើម្បីរក្សាសុខភាព និងអាយុជីវិត។

លោក រស់ សុវាចា បន្តថា ក្រសួងអប់រំ យុវជន និងកីឡាបន្តយកចិត្តទុកដាក់កម្រិតខ្ពស់ តាមដានស្ថានភាពធម្មជាតិ ដោយយោងទៅលើការព្យាករណ៍ឧតុនិយមផ្លូវការ និងទិដ្ឋភាពផ្ទាល់នៅមូលដ្ឋាន។ ក្រសួងអប់រំ យុវជន និងកីឡា មានក្រុមការងារគ្រប់គ្រងគ្រោះមហន្តរាយវិស័យអប់រំ ដែលបានបន្តកិច្ចសហការជាមួយគ្រប់ភាគីពាក់ព័ន្ធដូចឆ្នាំកន្លងមក ជាពិសេសជាមួយគណៈគ្រប់គ្រងគ្រឹះស្ថានសិក្សា និងអាជ្ញាធរមូលដ្ឋានផ្ទាល់ ដើម្បីត្រៀមលក្ខណៈអន្តរាគមន៍ទៅលើកត្តាចាំបាច់តាមលទ្ធភាពជាក់ស្តែង។

ក្រសួងអប់រំ យុវជន និងកីឡា បន្តស្វាគមន៍កិច្ចសហការវិជ្ជមានពីសំណាក់គ្រប់ភាគីពាក់ព័ន្ធលើវិធានការទប់ស្កាត់ និងការឆ្លើយតបលើផលជះពីគ្រោះទឹកជំនន់ និងជំនន់ទឹកភ្លៀងតាមគ្រឹះស្ថានសិក្សា។

សូមរំលឹកថា កាលពីយប់ថ្ងៃទី១៣ ខែតុលា ឆ្នាំ២០២២ មានឧបទ្ទវហេតុលិចទូកដចម្លងសិស្សសាលា ១៥នាក់ នៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល បណ្ដាលឱ្យសិស្សានុសិស្ស ១១នាក់បាត់បង់ជីវិត និងរួចជីវិតចំនួន ៤ នាក់៕