ព័ត៌មានជាតិ

កម្ពុជាមានផ្លូវយុទ្ធសាស្ត្រតាមព្រំដែន អាចធ្វើដំណើរមួយជុំប្រទេសបាន

បានផុស

៤ years មុន

នៅ

ថ្ងៃអង្គារ ១៨ តុលា ២០២២

ដោយ

បើតាមការអះអាងរបស់មន្រ្តីជាន់ខ្ពស់ក្រសួងការពារជាតិ យុទ្ធសាស្រ្តអភិវឌ្ឍផ្លូវតាមព្រំដែនជាមួយប្រទេសជិតខាងក្រៅពីពង្រឹងខឿនការពារជាតិ ក៏ដូចជាជំរុញចលនាប្រជាជនទៅរស់នៅតាមតំបន់ព្រំដែនកាន់តែច្រើន។

លោក ឈុំ សុជាតិ អ្នកនាំពាក្យក្រសួងការពារជាតិបានលើកឡើងក្នុងសន្និសីទពីវឌ្ឍនភាព ៥ ឆ្នាំរបស់ក្រសួងការពារជាតិនៅព្រឹកនេះថា ក្រៅពីការបំពេញការងារស្នូល កងយុទ្ធពលខេមរភូមិន្ទបានរួមចំណែកកសាងហេដ្ឋារចនាសម្ព័ន្ធ ក្នុងនោះមានការអភិវឌ្ឍផ្លូវយុទ្ធសាស្ត្រតាមព្រំដែនប្រទេសជិតខាងបានរាប់រយគីឡូម៉ែត្រ។

លោកឈុំ សុជាតិ អះអាងពីការស្ថាបនាផ្លូវក្រវាត់ព្រំដែនជាមួយប្រទេសជិតខាងថា៖ “ឥលូវនេះយើងអាចធ្វើដំណើរមួយជុំស្រុកខ្មែរបាន។ បើយើងចេញពីខេត្តកោះកុង អាចដើរមួយជុំប្រទេសតាមផ្លូវក្រវាត់ព្រំដែន គ្រាន់តែកន្លែងខ្លះខូចខាតត្រូវការជួសជុលឡើងវិញ តែនិយាយរួមគឺ ៩០% យើងអាចធ្វើដំណើរបាន”។

កាលពីឆ្នាំ ២០០៩ រដ្ឋាភិបាលបានបញ្ចេញថវិកាជាតិក្នុងការស្ថាបនាផ្លូវយុទ្ធសាស្ត្រតាមបណ្តោយព្រំដែនកម្ពុជា-ថៃ ចាប់ពីខេត្តបន្ទាយមានជ័យរហូតដល់ខេត្តស្ទឹងត្រែងមានប្រវែងសរុប ១.២៨៧គីឡូម៉ែត្រ ដែលបានដាក់សម្ពោធនៅឆ្នាំ ២០១២។

ការស្ថាបនាផ្លូវតាមក្រវាត់ព្រំដែន ជាយុទ្ធសាស្រ្តក្រៅពីជួយសម្រួលកងកម្លាំងដែលឈរជើងការពារបូរណភាពទឹកដី និងបានលើកស្ទួយជីវភាពពលរដ្ឋរស់នៅតាមតំបន់ព្រំដែន។

លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែនបានថ្លែងក្នុងបេសកកម្មចុះពិនិត្យផ្លូវក្រវាត់ព្រំដែនវៀតណាមកន្លងទៅថា រាជរដ្ឋាភិបាលកម្ពុជាបានដាក់ចេញនយោបាយកសាងព្រំដែន ជាមួយប្រទេសជិតខាងជាព្រំដែនសន្តិភាព មិត្តភាព សហប្រតិបត្តិការ និងអភិវឌ្ឍន៍ ដោយដើរទន្ទឹមនឹងការអនុវត្តគោលការណ៍កសាងខឿនការពារជាតិ។

លោកទេសរដ្ឋមន្ត្រីអះអាងថា ការកសាងបង្គោលព្រំដែននិងស្ថាបនាផ្លូវខ្សែក្រវាត់ព្រំដែន ដោយផ្អែកលើប្រជាជនធ្វើជាគ្រឹះរបងការពារជាតិ៕