លោក សួន សេរីរដ្ឋា​៖ អ្នកនយោបាយ​ខ្មែរ​ច្រើនតែភ្លេចកំណើត​

លោក សួន សេរីរដ្ឋា ប្រធានវេទិកាសន្តិភាពកម្ពុជា​បានអះអាងថា អ្នកនយោបាយខ្មែរ​ច្រើនតែភ្លេចកំណើត ភ្លេចកំណើតនៅត្រង់ថា ខ្លួន​កំពុងតែ​ប្រើប្រាស់សមិទ្ធិផល​ នៃកិច្ចព្រមព្រៀងទីក្រុង​ប៉ារីស ២៣ តុលា ជាមធ្យោបាយក្នុងការរិះគន់​វាយប្រហារ​ដើម្បីកេងចំណេញផលប្រយោជន៍នយោបាយ។​

ថ្លែងនៅក្នុងវេទិកាមួយ​ស្ដីពីកិច្ចព្រមព្រៀង​សន្តិភាពទីក្រុងប៉ារីស​នៅថ្ងៃទី ២០ ខែតុលានេះ លោក សួន សេរីរដ្ឋា ​ប្រធានវេទិកាសន្តិភាពកម្ពុជាបានរំឭកថា ​កាលពីមុន​សេរីភាពបញ្ចេញមតិ​ប្រសិនបើឈរនិយាយ​នៅកន្លែងណា​ស្ដាប់បានតែកន្លែង​ហ្នឹងទេ​ ប៉ុន្តែឥឡូវ​យើងនិយាយនៅកន្លែង​នេះស្ដាប់បាន​មួយពិភពលោក ​មួយប្រទេស​ដោយសារ​មានអ៊ីធើណិត​ ផ្សាយតាមបណ្ដាញសង្គមជាច្រើន។

លោកថា អ្នករិះគន់ទាំង​អស់នោះ​កំពុងតែ​ប្រើសមិទ្ធិផល​ នៃកិច្ចព្រមព្រៀងក្រុងប៉ារីស​ សមិទ្ធិផល​​ដែលរាជរដ្ឋាភិបាល​កំពុងអនុវត្ត​យកទៅប្រើប្រាស់​ជាមធ្យោបាយរិះគន់​វាយប្រហារ​ប៉ុន្តែពួកគាត់​មិនទទួលស្គាល់​ថា សិទ្ធិទាំងនេះ​បានមកពីការអនុវត្តពេញលេញ​ នៃកិច្ចព្រមព្រៀង​សន្តិភាព​ក្រុងប៉ារីសនោះទេ។

លោក សួន សេរីរដ្ឋា ហៅសម្មភាពទាំងនោះ​ជាការនិយាយដើម្បីតែកេងចំណេញ​ពីព្រោះខ្លួនឯង​អត់ហ៊ានទទួលយកការពិត​ ហើយអ្នកនយោបាយ​ខ្មែរ​ច្រើនតែធ្វើអ្វីមួយ​ភ្លេចកំណើត​ ឬមិនទទួល​ស្គាល់​គុណ​អំពីអ្វី​ដែលខ្លួនកំពុងទទួល។

លោក សួន សេរីរដ្ឋាអះអាងទៀតថា កិច្ចការនយោយបា​ប្រសិនបើគ្មាន​ការអនុវត្តពេញលេញ​នូវកិច្ចព្រមព្រៀងក្រុងប៉ារីស និងគ្មានគោលនយោបាយ​ឈ្នះ-ឈ្នះ របស់សម្ដេចតេជោ ហ៊ុន សែន ដែលបាន​ដាក់ចេញ​ ដើម្បីបញ្ចប់នូវសង្គ្រាម​ស៊ីវិលទាំងស្រុង​ នោះសិទ្ធិនយោបាយ​របស់អស់លោក អ្នកនយោបាយ​ទាំងអស់​ក៏មិនអាច​អនុវត្តបានពេញលេញបានដែរ​។

ប្រធានវេទិកាសន្តិភាពកម្ពុជារូបនេះ​បញ្ជាក់ទៀតថា ​គណបក្ស និងអ្នកនយោបាយ ដែលចូលរួម​ង្វៀន​នយោបាយបច្ចុប្បន្ន​ មិនមែនសុទ្ធតែអ្នកនយោបាយថ្មី ​និងគណបក្សថ្មីទេ​ អញ្ចឹង!​ប្រសិនបើអ្នកនយោបាយ​នោះបានប្រឡូក​ក្នុងការបោះឆ្នោត​នៅឆ្នាំ ១៩៩៣ ​ពួកគាត់​ច្បាស់ជាដឹងហើយ​ថាតើឆ្នាំ៩៣ ទំហំដែនដី​ដែល​គណបក្សនយោបាយទាំងអស់​អាចឃោសនា​បោះឆ្នោត​បានប៉ុន្មាន?

តើអស់លោក​អាចទៅឃោសនា​នៅតំបន់ខ្មែរក្រហមកាន់កាប់បានអត់​ ប៉ុន្តែក្រោយឆ្នាំ ១៩៩៨ ពេលដែលសមិទ្ធិផលនៃនយោបាយឈ្នះ-ឈ្នះ បានសម្រេចជាស្ថាពរ​គ្រប់អង្គការគណបក្ស​នយោបាយទាំងអស់​គឺអាចធ្វើសកម្មភាពនយោបាយ​របស់ខ្លួនបានពេញផ្ទៃប្រទេស ១០០%។

បើតាមលោក សួន សេរីរដ្ឋា​ គ្រាប់ពូជនយោបាយ​ឈ្នះ-ឈ្នះ បានពន្លកឡើង​តាំងពីថ្ងៃទី ២ ខែធ្នូ ឆ្នាំ ១៩៨៧ ​ជំនូបរបស់សមមិត្ត ហ៊ុន សែន ជាមួយសម្ដេច នរោត្តម សីហនុ នៅទីក្រុង​ហ្វែរអង់តាដឺន័រ ប្រទេសបារាំង ហើយគ្រាប់ពូជនយោបាយ​ឈ្នះ-ឈ្នះ នេះបានផ្លែផ្កាពេញលេញ​នៅថ្ងៃទី ២៩ ខែធ្នូ ឆ្នាំ ១៩៩៨៕

អត្ថបទ៖ ឡេង ដេត