ព័ត៌មានជាតិ
កម្ពុជាគ្រោងចំណាយជិត ៣០០ លានដុល្លារ លើកកម្ពស់គុណភាព និងសមធម៌សុខាភិបាល
រាជរដ្ឋាភិបាលកម្ពុជាដោយមានការជួយគាំទ្រពីដៃគូអភិវឌ្ឍនានាគ្រោងនឹងចំណាយថវិកាប្រមាណជិត ៣០០លានដុល្លារអាមេរិកសម្រាប់អនុវត្តគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ ចាប់ពីឆ្នាំ២០២២ ដល់ឆ្នាំ២០២៧ខាងមុខនេះ។
នៅក្នុងពីធីប្រកាសដាក់ឱ្យដំណើរការអនុវត្ដគម្រោង លើកកម្ពស់គុណភាព និងសមធម៌សុខាភិបាល ដំណាក់កាលទី២ នៅថ្ងៃទី២០ ខែតុលានេះ នៅភ្នំពេញ លោកស្រីវេជ្ជបណ្ឌិត យក់ សម្បត្ដិ រដ្ឋលេខាធិការ ក្រសួងសុខាភិបាល និងជានាយកគម្រោងលើកកម្ពស់គុណភាព និងសមធម៌សុខាភិបាល (H-EQIP) មានប្រសាសន៍ថា ថវិកាទាំងនេះទទួលបានពីថវិកាបដិភាគពីរាជរដ្ឋាភិបាលកម្ពុជា និងថវិកាហិរញ្ញប្បទានដៃគូនានាដែលមានថវិកាសរុបចំនួន ២៩៩លានដុល្លារអាមេរិក សម្រាប់អនុវត្តគម្រោង រយៈពេល ៥ឆ្នាំ និង៦ខែ ដែលចាប់ផ្តើមពីខែកក្កដា ឆ្នាំ២០២២ រហូតដល់ខែធ្នូ ឆ្នាំ២០២៧។
លោកស្រីបានបន្តថា គម្រោងនេះមានគោលបំណងលើកកម្ពស់ សមភាពការប្រើប្រាស់សេវាថែទាំសុខភាពប្រកបដោយគុណភាពនៅកម្ពុជា ជាពិសេសសម្រាប់អ្នកក្រីក្រ និងជនងាយរងគ្រោះ ព្រមទាំងផ្តល់នូវការឆ្លើយតបបន្ទាន់ទៅនឹងគ្រោះអាសន្នបានទាន់ពេលវេលា និងមានប្រសិទ្ធភាព។
លោកសាស្ដ្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ថា លោកពិតជាមានមោទនភាព ដែលបានឃើញគម្រោងនេះលេចជារូបរាងឡើង ដើម្បីគាំទ្រដល់ការអនុវត្តផែនការ យុទ្ធសាស្ត្រសុខាភិបាល ឈានទៅសម្រេចការគ្របដណ្ដប់សុខភាព ជាសកលនៅឆ្នាំ២០៣០។
លោករដ្ឋមន្ដ្រី បានបន្តថា ការអនុវត្តគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ គឺជាគម្រោងសុខភាពមានវិសាលភាព គ្របដណ្តប់ធំបំផុតដែលមិនធ្លាប់មាន ហើយគម្រោងនេះបានចូលរួមចំណែកយ៉ាងសំខាន់ក្នុងការធ្វើឱ្យប្រសើរឡើងសុខភាព របស់ប្រជាជនកម្ពុជា។
លោករដ្ឋមន្ត្រីបានបន្ថែមថា ការអនុវត្តគម្រោងនេះត្រូវបានដាក់ឱ្យដំណើរការ នៅគ្រប់មូលដ្ឋានសុខាភិបាលរដ្ឋទូទាំងប្រទេស ចាប់ពីមណ្ឌលសុខភាព រហូតដល់មន្ទីរពេទ្យជាតិ ហើយការប្រើប្រាស់សេវាសុខភាព ដែលគាំទ្រដោយគម្រោងមូលនិធិសមធម៌សុខភាព បានកើនឡើងដល់ជិត ៣,៤ លានករណី ក្នុងឆ្នាំ២០២០ ធៀបនឹង ២,៤ លានករណី ក្នុងឆ្នាំ២០១៦ ហើយគុណភាពនៃការផ្តល់សេវាសុខភាពត្រូវបានធ្វើឱ្យប្រសើរឡើងគួរឱ្យកត់សម្គាល់។ ជាក់ស្តែងនៅឆ្នាំ២០១៦ មានមណ្ឌលសុខភាពត្រឹមតែ ៤៩ (៤%) សម្រេចបាន ៦០% នៃស្តង់ដារគុណភាពជាតិ ប៉ុន្តែចំនួននោះបានកើនឡើងដល់ ១១៨១ (៩៥%) ក្នុងឆ្នាំ២០២១។
លោករដ្ឋមន្ដ្រីបានបញ្ជាក់ថា គម្រោងនេះបានចូលរួមចំណែកក្នុងការកែលម្អគួរឱ្យកត់សម្គាល់ រួមមាន ការគ្រប់គ្រងបរិក្ខារ ចំណេះដឹង និងសមត្ថភាពបុគ្គលិក ការការពារ និងការគ្រប់គ្រងការឆ្លងរោគ ការគ្រប់គ្រង កាកសំណល់ អនាម័យ និងការគាំទ្រពង្រីកបណ្តាញមណ្ឌលសុខភាព ដោយបានសាងសង់មណ្ឌលសុខភាព បន្ថែមចំនួន ៤៥ ការសាងសង់អគារសម្ភព និងរោគស្ត្រីនៅក្នុងមន្ទីរពេទ្យបង្អែកចំនួន ១៥ និងសាងសង់ អគារមន្ទីរពេទ្យខេត្តចំនួន ២បន្ថែម។
លោករដ្ឋមន្ត្រីបានឱ្យដឹងថា គម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ គួរទាញយកមេរៀន បទពិសោធន៍ជោគជ័យ ក្នុងដំណាក់កាលទី១ ដោយបន្ថែមអន្តរាគមន៍នវានុវត្តន៍ ដើម្បីជៀសវាងនូវបញ្ហា ប្រឈមនានាដែលជួបប្រទះក្នុងការអនុវត្តដំណាក់កាលទី១ និងតម្រឹមជាមួយអាទិភាពរបស់រាជរដ្ឋាភិបាល ឈានទៅសម្រេចការគ្របដណ្តប់សុខភាពជាសកល តាមរយៈផែនការសកម្មភាព ៥ឆ្នាំរបស់ខ្លួន (២០២២- ២០២៧)៕
អត្ថបទ៖ សំអឿន
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
កីឡា៣ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត