លោកបណ្ឌិត លី ឆេង តំណាងរាស្រ្តមណ្ឌលរាជធានីភ្នំពេញ និងជាអគ្គនាយកក្រុមហ៊ុន ប៊ែលធី គ្រុប និងលោកស្រី អញ្ជើញប្រគល់សញ្ញាបត្រភាសាអង់គ្លេសជូនដល់សិស្សប៊ែលធីកម្រិតទី១២ ជំនាន់ទី៥៣ ដល់ទី៦៣។ ពិធីប្រគល់សញ្ញាបត្រនេះ ធ្វើឡើងនៅថ្ងៃទី២២ ខែតុលា ឆ្នាំ២០២២ នៅសាកលវិទ្យាល័យ ប៊ែលធី អន្តរជាតិទី២ សាខាស្ពានអាកាសចោមចៅ ស្ថិតនៅផ្លូវជាតិលេខ៣ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។លោកបណ្ឌិត​បាន​​គូសបញ្ជាក់​ពី​ការបន្ត​​​​ខិត​ខំប្រឹង​ប្រែង​រៀន​សូត្រ​បន្ថែម​​​​​របស់យុវជន​ទាំង​​អស់ ​នឹង​អាច​ឈាន​ទៅ​​ប្រកួត​ប្រ​ជែង​ទីផ្សារ​ការងារ​ទាំងក្នុង​ស្រុក តំបន់​អាស៊ាន និង​ពិភពលោ​ក ពិសេស​ដើរ​ទាន់​សម័យ​បច្ចេកវិទ្យា​ឌីជីថល។ ​

លោកបណ្ឌិត​​បានថ្លែងចូលរួមអបអរសាទរចំពោះសិស្សជ័យលាភីទាំង ១៥២០នាក់ ដែលបានប្រលងជាប់សញ្ញាបត្រភាសាអង់គ្លេសប៊ែលធី (BELTEI ESL DIPLOMA) ហើយបានថ្លែងកោតសរសើរចំពោះសិស្សទាំងអស់ដែលបានខិតខំយកចិត្តទុកដាក់ប្រឹងប្រែងសិក្សារៀនសូត្រ និង​ស្តាប់គ្រូពន្យល់ ក៏ដូចជាគោរពបទបញ្ជាផ្ទៃក្នុងសាលា មានវិន័យ សីលធម៌ និងគុណធម៌ល្អ។ ត្រង់ចំណុចនេះ លោកបណ្ឌិត​បានលើកឡើងថា ការចេះគោរពបញ្ជា និងគុណធម៌ល្អ មិនបង្កផលលំបាកដល់គ្រួសារ និងសង្គមជាតិ រហូតទទួលបានជោគជ័យក្នុងការប្រឡងបញ្ចប់វគ្គ និងទទួលបានសញ្ញាបត្រភាសាអង់គ្លេសប៊ែលធី នាពេលនេះ។

លោកបណ្ឌិត លី ឆេង ក៏បានផ្តាំផ្ញើដល់សិស្សទាំងអស់ឲ្យខិតខំយកចិត្តទុកដាក់លើការរៀនសូត្របន្ថែមទៀត ដើម្បីអភិវឌ្ឍសមត្ថភាពផ្ទាល់ខ្លួន ក្នុង​ចាប់យកអាជីពការងារទៅថ្ងៃអនាគត និងការប្រកួតប្រជែងដណ្តើមទីផ្សារការងារជាមួយបណ្តាយុវជនទាំងក្នុងតំបន់អាស៊ាន និងពិភពលោក ជាពិសេសត្រូវដើរឲ្យទាន់នូវការរីកចម្រើនផ្នែកបច្ចេកវិទ្យា សម័យបដិវត្តឧស្សាហកម្ម៤.០។​

ជាមួយគ្នានេះ លោកបណ្ឌិត​បានគូសបញ្ជាក់ថា សិស្សជ័យលាភី នឹងទទួលបានសញ្ញាបត្រចំនួនពីរ គឺ៖១.សញ្ញាបត្រចេញដោយសាលា ប៊ែលធី អន្តរជាតិ និង២.សញ្ញាបត្រចេញដោយក្រុមប្រឹក្សាភាសាអង់គ្លេស នៃចក្រភពអង់គ្លេស​។ សញ្ញាបត្រទាំងពីរនេះ ក៏ត្រូវបានដាក់បញ្ចូល ទៅក្នុងវេបសាយរបស់សាលា ប៊ែលធី អន្តរជាតិ ដើម្បីទុកជាឯកសារយូរអង្វែងសម្រាប់សិស្សគ្រប់រូបទាញយកមកប្រើប្រាស់តាមតម្រូវការផងដែរ។​

បើតាមលោក ចាន់ ទីតា ប្រធានការិយាល័យភាសាអង់គ្លេសទូទៅ បានឲ្យដឹងថា បច្ចុប្បន្ននេះ សាលា ប៊ែលធី ​អន្តរជាតិ មាន ២៦សាខា​​ (២៤សាខា កំពុងដំណើរការ និង២សាខាកំពុងសាងសង់) ដែលមានបុគ្គលិកបម្រើការសរុបចំនួន ២៤៤៦នាក់ និងមានសិស្សានុសិស្សកំពុងសិក្សាសរុបចំនួន ៥៨,១៨៤នាក់ (នារី ២៩,០៩២នាក់)។កម្មវិធីសិក្សាផ្នែកភាសាអង់គ្លេសទូទៅ ត្រូវបានរៀបចំឡើងតាមកម្មវិធីសិក្សាមុខវិជ្ជាសិក្សាសំខាន់ៗ ហើយសៀវភៅសិក្សាត្រូវបានសហការគាំទ្រដោយក្រុមហ៊ុនរបស់សហរដ្ឋអាមេរិក។ សិស្សដែលបានបញ្ចប់ថ្នាក់ភាសាអង់គ្លេសទូទៅកម្រិត១២ មានសមត្ថភាពគ្រប់គ្រាន់ទាំងការនិយាយ ការស្តាប់ ការអាន និងការសរសេរ និងមានសមត្ថភាពប្រឡងតេស្តអន្តរជាតិបានគ្រប់ៗគ្នា​៕

ដោយ៖ ធឿន វ៉ាន់សុង