ព័ត៌មានជាតិ

អាជ្ញាធរខណ្ឌទួលគោក ឃាត់ខ្លួនមេកន្ទុយលេខពីរនាក់

បានផុស

៥ years មុន

នៅ

ថ្ងៃអង្គារ ៥ មករា ២០២១

ដោយ

បុរសម្នាក់ និងស្ត្រីម្នាក់ ត្រូវបានកម្លាំងគណៈបញ្ជាការឯកភាពខណ្ឌទួលគោក ឃាត់ខ្លួនតាមបញ្ជាលោក ឯក ឃុនដឿន អភិបាលខណ្ឌ ខណៈអ្នកទាំងពីរកំពុងកត់កន្ទុយលេខជាក់ស្ដែង ។

ប្រតិបត្តិការនេះ ធ្វើឡើងក្រោមការសម្របសម្រួលពីលោក សុក កែវបណ្ឌិត ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កាលពីរសៀលថ្ងៃទី០៤ ខែមករា ឆ្នាំ២០២១ ស្ថិតនៅផ្ទះលេខ២៨ ផ្លូវលេខ ២២០ហ្សិត ភូមិ៩ សង្កាត់ផ្សារដើមគ ខណ្ឌទួលគោក រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មនុស្សប្រុស ស្រីទាំងពីរនាក់ ដែលអាជ្ញាធរឃាត់ខ្លួន រួមមានទី១ ឈ្មោះ គាំ គង់ ភេទប្រុស អាយុ៦៥ឆ្នាំ ស្នាក់នៅផ្ទះលេខ២៨ ផ្លូវលេខ២២០ហ្សិត ភូមិ៩ សង្កាត់ផ្សារដើមគ ខណ្ឌទួលគោក រាជធានីភ្នំពេញ និងទី២ ឈ្មោះ លី លីន ភេទស្រី អាយុ២០ឆ្នាំ ផ្ទះលេខ២៨ ផ្លូវលេខ២២០ហ្សិត ភូមិ៩សង្កាត់ផ្សារដើមគ ខណ្ឌទួលគោក រាជធានីភ្នំពេញ។

មន្ត្រីខណ្ឌទួលគោក បានបញ្ជាក់ឱ្យដឹងថា ទីតាំងដែលបានបង្រ្កាបមានលួចបើកកត់កន្ទុយលេខវៀតណាម ហើយជំនាញក៏បានស៊ើបនិងស្រាវជ្រាវ រហូតដល់រសៀលថ្ងៃទី០៤ ខែមករានេះ ទើបចុះបង្ក្រាបជាក់ស្ដែងតែម្ដង ដោយឃាត់ខ្លួនមនុស្ស០២នាក់ និងដកហូតកន្ទុយលេខ នឹង លទ្ធផលឆ្នោតមួយចំនួន ត្រាចុះថ្ងៃខែ ម៉ាស៉ីនគិតលេខម៉ាក casio និងតាំប៉ុងមួយ។

លោក ឯក ឃុនដឿន អភិបាលខណ្ឌទួលគោកបានឱ្យដឹងថា យោងតាមប្រសាសន៍លោក ឃួង ស្រេង អភិបាលរាជធានីភ្នំពេញ បានព្រមានថា ផ្សារណាអនុញ្ញាតឱ្យមានកត់កន្ទុយលេខក្នុងផ្សារ នឹងត្រូវដកប្រធានផ្សារចេញ។

ក្រោយប្រតិបត្តការ កម្លាំងគណៈបញ្ជាការឯកភាពបាននាំខ្លួនមនុស្សប្រុស ស្រី ទាំងពីរនាក់ទៅសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី៕

អត្ថបទ ៖ ស្រីរ័ត្ន